कान्तिपुर वेबसाईट
AdvertisementAdvertisement
१७.१२°C काठमाडौं
काठमाडौंमा वायुको गुणस्तर: १९६

गाईगोरुमा ‘लम्पी स्किन’ रोगको महामारी, २८ मरे, किसानले पाएनन् औषधोपचार

विप्लव महर्जन

सल्यान — तीन साताअघि कालिमाटी गाउँपालिकाको केही वडामा गाईगोरुमा देखिएको ‘लम्पी’ छाला (स्किन) रोग जिल्लाका बन्गाड कुपिण्डे नगरपालिका, शारदा नगरपालिका र त्रिवेणी गाउँपालिकामा समेत महामारीको रुपमा फैलिएको छ । महामारीका कारण एक महिना नबित्दै २८ गाईगोरु मरिसकेका छन् भने किसानले पालेका धेरै पशु बिरामी परेका छन् । 

गाईगोरुमा ‘लम्पी स्किन’ रोगको महामारी, २८ मरे, किसानले पाएनन् औषधोपचार

किसानले रोगको पहिचान समेत गर्न नसक्दा र रोग सर्ने बारेमा थाहा नपाउँदा गाईगोरुमा लम्पी स्किन रोगले महामारीको रुप लिएको हो । लम्पी स्किन रोगका कारण जिल्लाको चार पालिकाका झन्डै १ हजार ५ सय किसान प्रभावित भएका छन् । रोग निको हुनुको साटो थप पशु बिरामी पर्न थालेपछि किसान चिन्तित भएका छन् । रोग अन्य पशु हुँदै मान्छेमा सर्ने डरले उनीहरु त्रसित भएका छन् ।

कालिमाटी गाउँपालिका ५ का किसान ईन्द्रबहादुर गाहाले झन्डै एक महिनादेखि देखिएको लम्पी स्किन रोग अहिलेपनि पूर्ण रुपमा नियन्त्रणमा आउन नसकेको र रोगको महामारीले गर्दा आफ्नो १० हजार बराबरको दुई गोरु मरेको बताए । उनले छिमेकी लगायत अन्यका पनि मरेका र धेरै विरामी परेको जानकारी गराए । ‘सुरुमा गाईगोरुमा के रोग लागेको हो भन्ने थाहा भएन र उपचार गराइएन । थप समस्या देखिएपछि पालिकाको पशु शाखामा जानकारी गराइयो तर बिरामी पशु बचाउन सकिएन’ उनले भने ‘रोगबाट पशु मर्ने भन्दा मान्छेमा फैलने डर लाग्न थालेको छ ।’ रोगको महामारी फैलिएपनि सम्बन्धित निकायबाट उपचार पाउन नसकेको उनको गुनासो छ ।

बन्गाड कुपिण्डे नगरपालिकाका किसान नन्दराम बुढाले रोगको पहिचान गर्न नसकेकै कारण उपचार सम्भव नभएपछि आफूले पालेको दुई गाईगोरु मरेको बताए । उनले आफ्नो मात्र नभई छिमेकीले पालेका धेरै गाईगोरु बिरामी भएको जानकारी गराए । सम्बन्धित निकाय समक्ष उपचारमा सहयोग गर्न उनले आग्रह गरे ।

यता शारदा नगरपालिका– ९ का किसान कर्णबहादुर खत्रीका अनुसार गाईगोरुका छालामा फोका देखिने, ज्वरो आउने, अण्डकोष सुन्निने, नाभी सुन्निनेजस्ता समस्या देखिएको बताए । पशु अस्पताल तथा पशु शाखा कार्यालय सल्यानका प्रमुख गोबिन्दबहादुर महतले लम्पी स्किन रोगका कारण कालिमाटीमा १०, बन्गाड कुपिण्डे नगरपालिकामा ८ र त्रिबेणी गाउँपालिकामा १० गाईगोरु मरिसकेको बताए । यी पालिकामा किसानले ४४ हजार ८ सय ३३ गाईगोरु पालेकामा ७५ प्रतिशत रोगबाट प्रभावित भएको उनको भनाइ छ ।

भ्याक्सिन नभएकाले अहिले भ्याक्सिन माग गरिएको उनले बताए । ‘रोगबाट अन्य पशुलाई बिरामी पशुबाट अलग राख्ने नै हो । चेतनाको अभावले किसानले बिरामी पशुलाई छुट्टै नराखी सामुहिक रुपमा राख्दै आएका छन् । यसले गर्दा रोग बढ्दै गएको छ’ उनले भने ।

रोगको महामारी फैलिएपछि अहिले पशु कार्यालयका डाक्टर सहितको प्राविधिक टोली रोग फैलिएको स्थानमा पुगेर पुगेरसामान्य उपचार गरिरहेको र किसानलाई सचेतना गराइरहेको उनले जानकारी गराए । किसानले सचेतना नअपनाए चार पालिकामा मात्र नभई यो रोग जिल्लाभरका पालिकामा फैलिनसक्ने उनको भनाइ छ ।


प्रकाशित : चैत्र १९, २०७९ १३:२७
प्रतिक्रिया
पठाउनुहोस्
जनताको राय

चालु वर्षको ९ महिनामा वार्षिक लक्ष्यको ३२.२४ प्रतिशत मात्र विकास खर्च हुनुको अर्थ के हो ?