प्रकाशशरण महतलाई संकटोन्मुख अर्थतन्त्र सम्हाल्ने जिम्मेवारी
काठमाडौँ — मुलुकको अर्थतन्त्र संकटोन्मुख देखिएका बेला त्यसलाई सम्हाल्ने जिम्मेवारी लिएर नेपाली कांग्रेसका प्रवक्ता प्रकाशशरण महत पुष्पकमल दाहाल नेतृत्व सरकारको अर्थमन्त्री बनेका छन् । आर्थिक मामिलामा जानकार भएपनि विगतमा अरू मन्त्रालयमा काम गरेका महतले यसपटक अर्थकै जिम्मेवारी पाएका हुन् ।
योसहित उनी चौथो पटक मन्त्री बनेका छन् । यसअघि २०६१ सालमा परराष्ट्र राज्य मन्त्री बनेका थिए भने २०६६ सालमा ऊर्जा र २०७३ मा परराष्ट्र मन्त्री बनेका थिए ।
उनी कांग्रेस सभापति शेरबहादुर देउवाका विश्वास पात्र मध्ये एक हुन् । यसपटक उनलाई अर्थमन्त्री बनाउन कांग्रेसका अन्य नेताहरुले पनि जोडबल गरेका थिए । सभापति देउवाले पनि आफ्ना विश्वाव पात्रलाई नै अर्थको चाबी सुम्पिने निर्णय गरे । उनको दाजु रामशरण महत विगतमा पटक पटक अर्थमन्त्री बनेका थिए । सहोदर दाजु भाइ भएपनि कांग्रेस भित्रको राजनीतिक लाइनमा प्रकाशशरण देउवा र रामशरण कोइराला समूहमा बसे । अहिले रामशरण राजनीतिक रुपमा निष्क्रिय रहेका बेला दाजुले पटक पटक सम्हालेको मन्त्रालयको विरासत थाम्न भाइ प्रकाशशरण आइपुगेका छन् ।
विद्यार्थी संगठनबाटै राजनीतिमा लागेका महत २०४२ सालमा नेपाल विद्यार्थी संघको महासचिव थिए । २०५९ देखि उनी नेपाली कांग्रेसको केन्द्रीय सदस्य रहँदै आएका छन् । अमेरिकाको साउदर्न इलिनोई युनिभर्सिटीबाट अर्थशास्त्रमा पीएचडी गरेका उनले नीति अर्थशास्त्र (पोलिसी इकोनोमिक्स)मा स्नातकोत्तर तथा त्रिभुवन विश्वविद्यालयबाट अर्थशास्त्रमा स्नातकोत्तर गरेका छन् । वि.सं. २०१६ साल कात्तिक १९ गते नुवाकोटमा जन्मिएका महतले आर्थिक, विकास, शान्ति र राजनीतिक मामिलासम्बन्धी विषयमा नीतिपत्र, लेख तथा प्रतिवेदन बनाउँदै आएका छन् ।
यतिबेला महत अर्थमन्त्री हुँदा मुलुकका आर्थिक सूचक भने संकटोन्मुख छन् । संकलित राजस्वभन्दा चालु खर्च बढी हुनु, मूल्यवृद्धि र ब्याजदर उच्च हुनु, अर्थतन्त्रमा मन्दी देखिनुजस्ता चुनौती छन् । महतलाई आर्थिक सूचक सुधार गर्दै अर्थतन्त्र चलायमान बनाउनुपर्ने चुनौती छ । यसअघि जनार्दन शर्मा अर्थमन्त्री हुँदा उनले गरेका कतिपय क्रियाकलाप विवादास्पद बनेका थिए । त्यस्ता विवादास्पद क्रियाकलापभन्दा माथि उठेर मुलुकको अर्थतन्त्रलाई उनले सही दिशामा लैजाने भूमिकामा कसरी उत्रिन्छन् ? आगामी दिनले नै देखाउनेछन् ।
