पाल्पा — विद्युत् महशुल प्रतियुनिट ५ रुपैयाँ ८० पैसाबाट ११ रुपैयाँ बनाउने बुटवल पावर कम्पनी (बीपीसी) को निर्णयविरुद्ध उपभोक्ता आक्रोशित भएका छन् । अहिले तिर्दै आएको विद्यत् महशुल दोब्बर बनाइएपछि उपभोक्ता बीपीसीप्रति आक्रोशित भएका हुन् ।महशुल वृद्धि गर्ने कम्पनीको निर्णय विरुद्ध उपभोक्ता एकजुट भएका छन् ।

कम्पनीले विद्युत् नियमन आयोगमा ११ रुपैयाँ युनिट प्रस्ताव पेश गरेको छ । चैत १० गते काठमाडौंमा सार्वजनिक सुनुवाइ गरेपछि पाल्पा रम्भा गाउँपालिका र रामपुर नगरपालिका क्षेत्रका उपभोक्ताले असन्तुष्टि जनाएका छन् । ‘एक दुई रुपैयाँ होइन दोब्बर नै वृद्धि गर्नेगरी प्रस्ताव लगेको छ,’ रामपुर नगरपालिकाका नगरप्रमुख रमणबहादुर थापाले भने, ‘त्यसले उपभोक्ताको ढाड सेक्ने भएको छ ।’

नगर प्रमुख थापाले विज्ञप्ति नै निकालेर विद्युत् महशुल दोब्बर बनाउने कम्पनीको निर्णय स्वीकार्य नहुने बताएका छन् । स्थानीय सरकार, लाभग्राही सरोकारवालासँग कुनै किसिमको छलफल, अन्तर्क्रिया नगरी गरिएको विद्युत् महशुल वृद्धिप्रति नगरपालिका पूर्ण रुपमा असहमत रहेको उनले बताए । बीपीसीले बढेको मूल्य फिर्ता नलिए उपभोक्ता आन्दोलनमा उत्रिन बाध्य हुने चेतावनी दिए । ‘नगरपालिकाले वडा–वडामा विद्युत् विस्तारको लागि झण्डै ६० लाख रुपैयाँको पोल खरिद गरी बुटवल पावर कम्पनीलाई सहयोग गरेको छ,’ नगरपालिकाद्वारा जारी विज्ञप्तिमा भनिएको छ । रामपुर नगरपालिकाको नगरभित्रका प्रायः सबै वडामा बुटवल पावर कम्पनीले सिधा विद्युत् वितरण गर्दै आएको छ ।

रामपुर नगरपालिकामा मात्र झण्डै ६ हजार घरपरिवारले बीपीसीको विद्युत् उपभोग गर्छन् । रम्भा गाउँपालिकाको वडा नम्बर १ हुँगी र वडा नम्बर २ फोक्सिङकोटमा बीपीसीको विद्युत् वितरण गरिएको गाउँपालिका अध्यक्ष विष्णुप्रसाद भण्डारीले बताए । रम्भा गाउँपालिकाको दुई वटै वडामा १ हजार ६ सय घरधुरी ग्राहक छन् । ग्रामीण भेगका उपभोक्ताले थेग्ने नसक्ने गरी बीपीसीले गरेको मूल्यवृद्धि तत्काल फिर्ता लिनुपर्ने उनले बताए । बुटवल पावर कम्पनीका पाल्पा र स्याङ्जामा गरी झण्डै ३९ हजार प्रत्येक्ष ग्राहक छन् । स्याङजाको आँधीखोलामा ड्याम बाँधेर गल्याङमा विद्युत् निकालिएको छ ।