काठमाडौँ — सरकारी स्कुलको शैक्षिक क्षेत्र सुधारका लागि विश्व बैंकले १५ अर्ब ६० करोड रुपैयाँ (१२० मिलियन अमेरिकी डलर) सहयोग गरेको छ । बैंकको कार्यकारी निर्देशक समितिको बैठकले यो सहयोग रकम स्वीकृत गरेको हो । गुणस्तरीय शिक्षाका लागि शिक्षकलाई उपयुक्त मार्गदर्शन गर्दै विद्यालय क्षेत्र रुपान्तरण कार्यक्रममार्फत रकम परिचालन हुनेछ ।

विश्व बैंकका अनुसार प्राथमिक र माध्यमिक स्तरमा अंग्रेजी, गणित र विज्ञान विषयका लागि आवश्यक शैक्षिक सामग्री जुटाउन सहयोग रकम खर्च हुनेछ । ‘मानव पुँजीको विकासको लागि गुणस्तरीय शिक्षामा लगानी महत्त्वपूर्ण छ’ विश्व बैंकका लागि माल्दिभ्स, नेपाल र श्रीलंका हेर्ने निर्देशक फारिस हदाद जेर्भोसले भने ।

नयाँ संघीय राज्यको महत्वाकांक्षा पूरा गर्न र शिक्षामा समतामूलक पहुँच स्थापनाका लागि राष्ट्रिय एकीकृत कार्यक्रम कार्यान्वयन गरी आधारभूत सीप सुधार हुने उनको भनाइ छ । कोभिड–१९ तथा अन्य विपद्का कारण विद्यालय बन्द हुँदा सिकाइमा परेको क्षतिलाई सम्बोधन गर्न डिजिटल शिक्षण सिकाइ र शैक्षिक सामग्रीमा सहयोग रकम खर्च हुने बताइएको छ । छात्रा, अपाङ्गता भएका विद्यार्थी तथा विपन्न विद्यार्थीलाई प्राथमिकता दिएर सहयोग रकम परिचालन गर्नुपर्नेछ ।