नेपाल उद्योग वाणिज्य महासंघको चुनाव चैत २९ गते बिहान ८ बजेदेखि
काठमाडौँ — वार्षिक साधारणसभामार्फत नयाँ कार्यकारिणी समितिको निर्वाचनका लागि नेपाल उद्योग वाणिज्य महासंघको तयारी अन्तिम चरणमा पुगेको छ । चैत २८ र २९ गते हुन गइरहेको महासंघको ५७ औं वार्षिक साधारण सभाबाट नयाँ कार्यकारिणी समिति निर्वाचित हुनेछ । वार्षिक साधारण सभा उद्घाटन कार्यक्रम चैत २८ गते बिहान १० बजेदेखि हुने छ भने निर्वाचन कार्यक्रम चैत २९ गते बिहान ८ बजेदेखि प्रज्ञा प्रतिष्ठान कमलादीमा हुने महासंघले जनाएको छ ।
वरिष्ठ उपाध्यक्ष, उपाध्यक्षहरू र कार्यकारिणी समितिका सदस्यको निर्वाचनको लागि उम्मेद्वार मनोनयन गर्न इच्छुक सदस्यहरुले चैत २१ भित्र महासंघ सचिवालयमा मनोनयन दर्ता गराइसक्नुपर्नेछ । आर्थिक वर्ष २०७९/८० सम्मको वार्षिक सदस्यता शुल्क, प्रतिनिधि शुल्क र उम्मेदवारी शुल्क सहित मनोनयनपत्र र प्रतिनिधि पत्र दर्ता गराई सक्नुपर्ने महासंघले जनाएको छ ।
‘साधारणसभामा जिल्ला/नगर उद्योग वाणिज्य संघ एवं वस्तुगत संघ र द्विराष्ट्रिय उद्योग वाणिज्य संघको हकमा अध्यक्ष स्वयम् मुख्य प्रतिनिधि रहनुपर्नेछ’ एक विज्ञप्ति जारी गर्दै महासंघले भनेको छ ‘अध्यक्ष स्वयम् उपस्थित हुन नसक्ने अवस्थामा सम्बन्धित सदस्य संघको कार्यकारिणी समितिले आफू मध्येबाट प्रतिनिधि छानी मुख्य प्रतिनिधि सहितको प्रतिनिधिमण्डलको नाम पठाउनुपर्ने छ ।’
महासंघका अनुसार वार्षिक साधारण सभामा जिल्ला/नगरस्तरीय उद्योग वाणिज्य संघहरूले मुख्य प्रतिनिधिसहित ३ जना, वस्तुगत संघहरूले मुख्य प्रतिनिधिसहित २ जना, द्विराष्ट्रिय उद्योग वाणिज्य संघहरूले मुख्य प्रतिनिधि १ जना र एसोसिएट सदस्यले मुख्य प्रतिनिधि १ जना पठाउनु पर्नेछ । सदस्यहरूले चालु आर्थिक वर्षसम्मको महासंघको वार्षिक सदस्यता शुल्क, प्रतिनिधि शुल्क र प्रतिनिधिपत्र चैत २७ गतेभित्र महासंघ सचिवालयमा बुझाइसक्नुपर्नेछ ।
