काठमाडौँ — लघुवित्त विरुद्ध आन्दोलन गर्न खर्च जुटाउनुपर्ने भन्दै संघर्ष समितिले 'पीडित'बाटै पैसा असुली गर्ने गरेको भेटिएको छ । लघुवित्त वित्तीय संस्थाबाट लिएको ब्याज र साँवा मिनाहा गराइदिने प्रलोभन देखाउँदै संघर्ष समितिका नाममा सदस्यताका लागि भनेर 'पीडित'बाटै चन्दा असुली गर्न थालेको प्रमाण भेटिएको छ । 

लघुवित्त संस्था विरुद्धको संघर्ष समितिको रसिदमा हरेक सदस्यबाट ५ सय रुपैयाँका दरले चन्दा असुली गरेको देखिन्छ । केही महिनायता धेरै स्थानमा यसरी चन्दा उठाउने प्रवृत्ति बढ्दै गएको पाइएको छ । कपिलवस्तु चन्द्राैटा ६ का मणिराम कोरीले आन्दोलनका लागि भन्दै आफ्नो गाउँबाट ५/५ सय रुपैयाँ असुल गरिएको बताए । 'आन्दोलन गर्न भन्दै गाउँका सबै घरबाट ५ सय रुपैयाँ असुल गरिएको थियो' उनले भने 'ऋण नलिएकाबाट पनि जबरजस्ती पैसा लिएका हुन् ।'

उक्त समूहले रसिद नै काटेर चन्दा असुली गरिरहेको र स‌ंघर्ष समितिको सदस्य प्रमाणपत्र तथा परिचय पत्र पनि वितरण गरिरहेको छ । वित्तीय संस्था विरुद्ध अराजक गतिविधिमा नलाग्न र संस्थाहरुले निर्देशित सीमा भन्दा बढी ब्याज असुली गरे उजुरी गर्न राष्ट्र बैंकले चेतनामुलक सन्देश जारी गरेको छ । तर, गाउँगाउँमा भने आन्दोलनका लागि भन्दै पीडितबाट चन्दा उठाउने समूह सक्रिय रुपमा लागेको छ ।

लघुवित्त वित्तीय संस्थाले कर्जा प्रवाह गर्दा ऋणीबाट १५ प्रतिशतभन्दा बढी ब्याजदर असुली गरे उजुरी गर्न राष्ट्र बैंकले आम सर्वसाधारणलाई आग्रह गरिरहेको छ । राष्ट्र बैंकले चेतनामूलक सन्देश जारी गर्दै लघुवित्त वित्तीय संस्थाका लागि १५ प्रतिशत अधिकम ब्याजदर तोकिएकाले त्योभन्दा बढी कर्जा असुली गरेको अवस्थामा सिधै उजुरी गर्न र लिएको पाइए कारबाही गर्ने बताउँदै आएको छ ।