२१.१२°C काठमाडौं
मेवा–ढुंगेसाँघु प्रसारण लाइन निर्माण सुरु
काठमाडौँ — राष्ट्रिय प्रसारण ग्रिड कम्पनी लिमिटेडले ताप्लेजुङको मेवादेखि चाँगे (ढुंगेसाँघु) सम्म १३२ केभीको प्रसारण लाइन निर्माण थालेको छ । करिब २० किमि लामो प्रसारण लाइन ताप्लेजुङको मिक्वाखोला गाउँपालिका–१ मा १३२/३३ केभीको मेवा सबस्टेसन तथा त्यहाँदेखि मैवाखोला गाउँपलिका–१ स्थित ढुंगेसाँघु सबस्टेसनसम्म निर्माण गर्न लागेको हो ।
करिब २० किमि लामो यो प्रसारण लाइन १३२ केभीको डबल सर्किटको रहने कम्पनीले जनाएको छ । एक वर्षमा सक्ने लक्ष्य लिइएको उक्त प्रसारण लाइनका लागि ३० करोड रुपैयाँ लागत रहेको कम्पनीले बताएको छ । ऊर्जा, जलस्रोत तथा सिँचाइ मन्त्रालयका सचिव दिनेशकुमार घिमिरेले प्रसारण लाइनको शिलान्यास गरे । प्रसारण लाइनमा ६२ वटा टावर रहनेछन् ।
प्रसारण लाइनले मेवाखोला बेसिनमा निर्माण गरिने मेवाखोला जलविद्युत् आयोजना, तल्लो मेवाखोला जलविद्युत् आयोजना, सोनाखोला जलविद्युत् आयोजना, पालुङखोला–१ जलविद्युत् आयोजना, पालुङखोला सानो जलविद्युत् आयोजना र माथिल्लो मेवाखोला–ए जलविद्युत् आयोजना जोड्ने ग्रिड कम्पनीका प्रमुख कार्यकारी अधिकृत नेत्रप्रसाद ज्ञवालीले जनाए । जलविद्युत् आयोजनाहरूबाट उत्पादित करिब १५० मेगावाट बिजुलीलाई राष्ट्रिय प्रसारण प्रणालीमा जोड्न गरी प्रसारण लाइन निर्माण सुरु गरिएको ज्ञवालीले बताए ।
‘छुट्टाछुट्टै प्रसारण लाइन निर्माण गर्नुभन्दा एउटा साझा प्रसारण लाइन बनाएर विद्युत् प्रवाह गर्न प्राविधिक, आर्थिक तथा पर्यावरणीय दृष्टिबाट उपयुक्त देखिएकाले आयोजना अगाडि बढाइएको हो,’ उनले भने, ‘आयोजनाबाट मेवाखोला बेसिनमा निर्माण गरिने जलविद्युत् आयोजना लाभान्वित हुनेछन् । आयोजनाको समयसीमाभित्र नै निर्माण सम्पन्न गर्ने लक्ष्य छ ।’
स्थानीयस्तरबाट आयोजनालाई आवश्यक सहयोग गर्ने र प्रसारण लाइन आयोजनाबाट हुने विविध क्षति न्यूनीकरण गर्न एकीकृत प्रसारण लाइन निर्माण गर्नुपर्ने आवश्यकता रहेको मैवाखोला गाउँपालिकाका अध्यक्ष विजयप्रकाश वनेमले जनाए ।
प्रकाशित : चैत्र ८, २०७९ ०८:१३
