अस्ट्रेलिया — दक्षिण अस्ट्रेलियामा ४ वर्षपछि नेपाल महोत्सवको आयोजना गरिएको छ । दक्षिण अस्ट्रेलियाको मुख्य क्षेत्र एल्डर पार्क शनिबार बिहानैदेखि नेपालमय बनेको थियो । महोत्सवमा नेपालीबाहेकका समुदायका व्यक्तिहरूको उल्लेख्य सहभागिता थियो । 

कार्यक्रमलाई सफल बनाउन राज्य सरकारले झन्डै ४३ हजार डलर सहयोग गरेको थियो भने बहुसांस्कृतिकमन्त्री, विपक्षी दलका नेतालगायत दर्जनभन्दा बढी अस्ट्रेलियाली राजनीतिक दलका नेताहरूले सहभागिता जनाएका थिए । महोत्सवमा नेपाली कलासंस्कृति तथा झाँकीसहित बिहान प्रभातफेरी गरिएको थियो । उक्त प्रभातफेरीमा सयौं नेपाली तथा विदेशी सहभागी थिए ।

महोत्सवमा प्रदर्शन गरिएको धरहरा, बुद्धको प्रतिमा, ढिकी, जाँतो, गुन्द्री बुन्ने तान, नेपाली बाजाहरू, परम्परागत पोशाकलगायत विभिन्न वस्तुहरू आकर्षणको केन्द्रमा रहेका थिए । विदेशीले नेपाली कला, संस्कृति र परम्परागत वस्तुलाई चासोका साथ अवलोकन गर्नुका साथै नेपालको पर्यटकीय क्षेत्र र पर्यटनप्रति समेत चासो राखेका थिए ।

एनआरएनए दक्षिण अस्ट्रेलियाले आयोजना गरेको महोत्सवमा करिब १ लाख २० हजार डलर खर्च भएको जनाएको छ । हरेक दुई वर्षमा आयोजना गरिने महोत्सव कोभिड संक्रमणका कारण अघिल्लो वर्ष हुन सकेको थिएन । सहरको मुख्य पर्यटकीय क्षेत्रमा आयोजना गरिएका कारण समेत यस वर्ष अन्य वर्षको तुलनामा उल्लेख्य विदेशीको सहभागिता रहेको थियो । महोत्सवमा दोस्रो पुस्ताका नेपालीको उल्लेख्य सहभागिता थियो भने नेपालबाट घुम्न आएका अभिभावकले समेत सक्रियताका साथ सहभागिता जनाएका थिए ।