मौलाकालिका केवलकार नयाँ वर्षदेखि सञ्चालन हुने

'गैंडाकोटको धारापानीमा चढ्ने स्टेसन र डाँडामा रहेको पुरानो हेलिप्याड भएको स्थानमा पनि ओर्लने स्टेसन निर्माण भैसकेको छ' साउदले भने 'तार तान्ने काम सम्पन्न भैसकेको छ, तारमा डब्बा जोड्ने काम आउँदो १० दिनभित्र सकिने छ ।' हरेक नयाँ वर्षमा एकै दिन मौलाकाली मन्दिरमा हजाराैं तिर्थालुहरु पुग्ने गरेका छन् । नयाँ वर्षका तिर्थालुलाई केवलकारमा यात्रा गराउनेगरी काम भइरहेको उनले सुनाए ।

आईएमई समूहको डेढ अर्ब लगानी रहेको केवलकार १२ सय मिटर लामो छ । यो केवलकारमा ६ वटा टावर रहने छ । ती टावरमा यात्रु चढने १४ वटा गोण्डोला (डब्बा ) रहने छ । त्यसमा १२ वटा डब्बामा यात्रु ओसार्ने , एउटामा सामान ओसार्ने र अर्को सर्भिसिङ प्रयोगमा आउने डब्बा हुने छ । केवलकार पूर्ण क्षमतामा सञ्चालन हुदा दैनिक ६ हजार यात्रु आउजाउ गर्न सक्छन् । केबुलकारले माथि डाँडामा सुविधा सम्पन्न ५० कोठाको होटल पनि निर्माण भएको छ । स्विङ पुल, स्पा , ब्याङ्केट हल समेत छ । होटलको छतमा हेलिप्याड राख्न मिल्ने व्यवस्था छ । केवलकारमा आईएमई ग्रुपको ५१ प्रतिशत र स्थानीयको ४९ प्रतिशत लगानी रहेको छ । यो केवुलकार यूरोपियन स्टयाण्डर्डको रहेको माैलाकालिका केवलकारकाे दाबी छ । आइएमई समूहले यसअघि काठमाडाैंको चन्द्रागिरिमा केवलकार सञ्चालनमा ल्याइसकेको छ । हाल यो समूहले बुटवल र गैंडाकोटमा केवलकारको काम अन्तिम चरणमा पुर्‍याएको छ ।

केवलकारको तल्लो स्टेसन (चढ्ने स्थान) बाट माथिल्लो स्टेसन (झर्ने स्थान)सम्मको दूरी ३ सय २० मिटर मात्र रहेको छ । तलबाट माथिसम्म ५ मिनेटमा पुगिने छ । हाल मौलाकालिका फेदीबाट करिब ४५/५० मिनेट उकालो हिँडेर यात्रुहरु मन्दिर पुग्ने गरेका छन् । बिहान उकोलो पैदल जादा स्वास्थ्य राम्रो हुने भएकाले त्यहा पुग्नेहरुको चाप हरेक बिहमन बाक्लै देखिन्छ । मन्दिर परिसरबाट चितवन, नवलपरासी र देबघाटको मनोरमदृश्य देख्न सकिन्छ । नेपालमा हाल मनकामना, चन्द्रगिरि, अन्नपुर्ण र कालिन्चोक केवलकार सञ्चालनमा छन् । निर्माणधीन अवस्थामा यो मौलाकालिका, रुपन्देहीमा लुम्बिनी तथा सिद्धार्थ केवलकार र तनहुँमा बन्दिपुर केवलकार छन् ।