सुनको मूल्यले बनायो हालसम्मकै उच्च रेकर्ड, पुग्यो १ लाख १० हजार

अघिल्लो कारोबार दिनको तुलनामा आइतबार एकै दिन प्रतितोला २ हजार ९ रुपैयाँले सुनको भाउ बढेको हो । गत शुक्रबार प्रतितोला १ लाख ७ हजार १ सय रुपैयाँमा सुनको कारोबार भएको थियो । अन्तर्राष्ट्रिय बजारमै सुनको मूल्य महँगिदा नेपालमा असर परेको नेपाल सुनचाँदी व्यवसायी महासंघले जनाएको छ । अन्तर्राष्ट्रिय बजारमा शुक्रबार कारोबार बन्द हुँदा सुनको मूल्य बिहीबारको तुलनामा ३.४७ प्रतिशतले बढेर प्रतिऔंस १९८८ डलर कायम भएको छ । जसको प्रभाव आइतबार नेपाली बजारमा परेको हो ।

अन्तर्राष्ट्रिय बजारमा किन महँगियो सुन ?

नेपाल सुनचाँदी व्यवसायी महासंघका पूर्व अध्यक्ष मणिरत्न शाक्यका अनुसार यसअघि नै अमेरिकाका दुई बैंक बन्द भएयता सुनमा लगानीकर्ताको विश्वास बढ्न गई माग बढेकाले मूल्य बढ्दै गएको थियो । पछिल्लो समय स्वीटजरल्याण्डको अर्को बैंकमा पनि समस्या देखिएपछि सुनको मूल्य अझ उकालो लाग्न पुग्यो । 'विश्वका प्रमुख स्टक मार्केट पनि ओरालो लागेका छन्, आर्थिक मन्दी छाउने विभिन्न रिपोर्टहरुले बताइरहेका छन् यसले गर्दा पनि सुनप्रति लगानी बढ्दा मूल्य बढेको हो' शाक्यले भने ।

रुस र अमेरिकाबीच थप द्वन्द्व बढ्ने संकेतले पनि पछिल्लो पटक सुनको मूल्य थप बढेको हो । 'अन्तर्राष्ट्रिय बजारमा द्वन्द्व बढ्ने संकेत देखिँदा नै सुनको माग बढ्न जान्छ, लगानीकर्ता मात्रै नभई राज्यले नै सुनको माग बढाउँछन्, यसले स्वभाविक रुपमा मूल्य बढ्छ' शाक्यले भने ।

हालै द हेगको अन्तर्राष्ट्रिय फौजदारी अदालतले रुसका राष्ट्रपति भ्लादिमिर पुटिनविरुद्ध पक्राउ पूर्जी जारी गरेको छ । युक्रेनसँग युद्ध अपराधमा जिम्मेवार ठहर गर्दै अदालतले पुटिनलाई पक्राउ पुर्जी जारी गरेपछि अमेरिकी राष्ट्रपति जो बाइडेनले स्वागत गरेका छन् । यद्यपि रुसले हेगको अदालतलाई कुनै मान्यता दिएको छैन । हेग अदालतले पक्राउ पुर्जी जारी गर्दैमा पुटिनलाई कुनै असर नपरे पनि अमेरिका र रुसबीचको आर्थिक तथा वैचारिक द्वन्द्व बढ्ने संकेतले सुरक्षित लगानीका लागि सुनमा आकर्षण बढेको व्यवसायी बताउँछन् ।