'राज्यले बर्दियालाई चिन्न सकेन'
काठमाडौँ — राज्यले बर्दियालाई चिन्न नसकेको होटेल संघ नेपाल बर्दियाका अध्यक्ष मोहन चौधरीले बताएका छन्। शनिबार कान्तिपुर मिडिया ग्रुपले आयोजना गरेको लुम्बिनीको सामर्थ्य बहसको 'पर्यटनको उडान' विषयक सत्रमा बोल्दै चौधरीले अन्तर्राष्ट्रिय क्षेत्रले बर्दियालाई चिन्दा पनि देशले चिन्न नसकेको बताएका हुन् ।
‘अन्तर्राष्ट्रिय क्षेत्रले चिनेको र देशले बिर्सिएको ठाउँ बर्दिया हो । म बदिएयाको परिचय यसरी दिन चाहन्छु,’ उनले भने, ‘बाघ हेर्नलाई संसारको उच्चतम गन्तव्य हो भनेर संसारका राम्रा टुरिजम जर्नलहरूले सम्मान दिइरहेका छन् । बाघको संख्या बढाएकोमा अन्तर्राष्ट्रिय सम्मान छ । पर्यटन गन्तव्य बन्यो भनेर अन्तर्राष्ट्रिय सम्मान छ । तर राज्यको कुनै पनि अंगमा देख्नुस् यो सम्मानको कुनै फोटो देख्नुहुन्न।’
कोभिडमा बर्दियाले थेगेको र हाल इकोनोमी क्रन्च भइरहेको अवस्थामा जेनतेन थेग्ने कोसिस गरिरहेको चौधरीले बताए । कोभिड पछाडि जेनतेन आन्तरिक पर्यटकले बर्दिया रिभाइब हुन खोजेको र त्यसमा नेपाल राष्ट्र बैंकले पनि केही राहत दिएको उनले बताए।
‘हालको जसरी अर्थतन्त्र संकुचित भएको छ त्यसले बर्दियाका अधिकांश होटेलहरू ताल चाबी कसैलाई बुझाउनु पर्छ की या आत्मदाह गर्न पर्छ की भन्ने अवस्थामा पुगेका छन्,’ उनले भने, ‘म यसो किन भन्दैछु भने विदेशी पर्यटक नआएपनि आन्तरिक पर्यटकहरूको एक किसिमको घुइँचो लाग्ने गरेको थियो बर्दियामा । तर अहिले हेर्नुहोस् निकुञ्जको गेटमा एउटा गाडी भित्र छिर्दैन । कुनै क्रियाकलाप हुँदैन । किनकी मान्छे आउँदैन मान्छेसँग पैसा छैन । यो अवस्थाबाट बर्दिया गुज्रिरहेको छ । तर बर्दियाको सम्पदाको विषयमा कुरा गर्नुहुन्छ भने देशको लामो नदी बगिरहेको छ। प्राकृतिक विविधता छ । ऐतिहासिकता छ । यी सबैको खानी हुँदाहुँदै पनि बर्दिया पछि परेको छ ।'
