सुनकोसीमा जलयात्रालाई चाहिन्न मौसम

माघ १४, २०७९राजकुमार कार्की

सिन्धुली — जाडो मौसममा पनि सुनकोसी नदीमा जलयात्रा गरेर आनन्द लिनेको भीड बढेको छ । गर्मीयामका फागुन, चैत, वैशाख र जेठलाई जलयात्रा (र्‍याफ्टिङ) को मौसम मानिए पनि जाडो र वर्षायाममा समेत सुनकोसीमा आकर्षण बढेपछि व्यवसायी उत्साहित छन् ।

राजधानी काठमाडौंलाई तराईका जिल्लासँग जोड्ने छोटो दूरीको बीपी राजमार्ग सञ्चालनमा आएसँगै सिन्धुलीको सुनकोसी गाउँपालिकाको मूलकोट जलयात्राका लागि ‘हब’ बन्दै गएको छ । यहाँमा होटलले जलयात्राको व्यवस्था गरी आन्तरिक तथा बाह्य पर्यटक आकर्षित गरिरहेका छन् ।

जलयात्रामार्फत आन्तरिक तथा बाह्य पर्यटक तान्ने अभियानमा जुटेको व्यवसायी बताउँछन् । चार वर्षदेखि आफूले जलयात्रा व्यवसाय सुरु गरेको र सिजनमा भ्याइनभ्याई नै हुने गरेको मूलकोटको ताज रिसोर्टका प्रबन्धक मनोज श्रेष्ठ बताउँछन् ।

‘सिजनमा भ्याइनभ्याई नै हुन्छ । गुड फ्राइडे मनाउन काठमाडौं र तराईबाट प्याकेजमा ग्राहक आउँछन्,’ उनले भने, ‘शुक्रबार र शनिबार दुई दिनमा एक हजारदेखि एक हजार पाँच सय जनासम्मले सुनकोसीमा जलयात्रा गर्दै आएका छन् ।’

फागुनदेखि असारसम्म जलयात्राको सिजन हो । तर यतिबेला अफ सिजनमा पनि व्यवसाय सन्तोषजनक रहेको श्रेष्ठको भनाइ छ । जलयात्रा गर्न प्याकेजमा प्रतिव्यक्ति तीन हजार पाँच सय रुपैयाँ पर्ने उनी बताउँछन् । त्यसमा दुई छाक खाना, एक पटक ब्रेकफास्ट र बस्ने कोठाको थप सुविधा होटलले उपलब्ध गराउने व्यवसायीले जनाए ।

सुनकोसी गाउँपालिका–१ को कुशेश्वर महादेव मन्दिरदेखि मूलकोटसम्म सुनकोसीमा जलयात्राको नियमित रुट हो । यसका लागि १० वटा बोट (डुंगा) को व्यवस्था गरिएको छ । यसअघि यस क्षेत्रमा प्रधानमन्त्री पुष्पकमल दाहाल र पूर्वप्रधानमन्त्री माधवकुमार नेपालले सुरक्षित जलयात्रा गरेका थिए ।

सुनकोसी जलयात्राका लागि उपयुक्त देखिएको र गाउँपालिकाले पनि अनुमति दिएर सहयोग गरेको सुनकोसी गाउँपालिका अध्यक्ष दीपा बोहोरा दाहालले बताइन् । ‘र्‍याफ्टिङ भन्नेबित्तिकै विदेशीहरूले मात्र गर्ने भन्ने बुझाइ थियो । तर अहिले आन्तरिक पर्यटक उत्तिकै आकर्षित छन् ।’

पर्यटनका लागि वैकल्पिक आकर्षक गन्तव्यका रूपमा आफूहरूले सुनकोसीमा र्‍याफ्टिङलाई विस्तार गरिरहेको मूलकोटकै होटल व्यवसायी मीन श्रेष्ठको भनाइ छ ।

जलयात्राका लागि आउने पर्यटकको स्वागत सत्कार र आतिथ्यका लागि होटल, होमस्टे निर्माण तथा र्‍याफ्टिङ गाइडरलाई तालिम दिने जस्ता काम जारी रहेको उनले बताए । यसमा आवश्यक सहयोग गर्ने गाउँपालिकाले जनाएको छ । जलयात्रामा आउनेहरूका लागि सुनकोसी गाउँपालिकाको मूलकोट, खाल्टे, रामटार, झागाझोली रातमाटा, बोहोरेटारमा सुविधासम्पन्न होटल तथा रिसोर्ट खुल्दै गएका छन् ।

प्रकाशित : माघ १४, २०७९ ०७:४२

प्रतिक्रिया

अर्को समाचार

संग्रह सेयर

अर्थ / वाणिज्य

कोदो उत्पादन बढाउन राइनसले दिन थाल्यो अनुदान

माघ १४, २०७९आश गुरुङ

लमजुङ — राइनास नगरपालिका–२ पन्थेडाँडा गुरुङ गाउँका ढकबहादुर गुरुङले यस वर्ष ९ सय २ किलो कोदो फलाए । नगरपालिकाबाट उनले ८ हजार ६ सय रुपैयाँ अनुदान पाए । उक्त कोदोमध्ये ७ सय ८२ किलोको अनुदान उनले पाएका हुन् । १ सय २० किलोको पाएनन् ।

प्रतिकिलो ११ रुपैयाँका दरले अनुदान पाएको उनको भनाइ छ । ‘मैले ७/८ हलमा कोदो फलाएको हुँ । घरघरै आएर कोदो नाप्दै पैसा दिए,’ उनले भने । नगरपालिकाले कोदो बढी फलाउन भनेको छ । जग्गाजमिन बाँझो नराख्न भनेको छ ।

नगरपालिकाले कोदोलाई उत्पादनका आधारमा अनुदान दिने कार्यक्रम ल्याएको कृषि शाखा प्रमुख पवन ढकाल बताउँछन् । नगरपालिकाको आर्थिक विकास समितिले प्रतिकिलो कोदोको मूल्य ५५ रुपैयाँ तोकेको छ ।

किसानलाई उत्पादन गरेबापत प्रतिकिलो २५ प्रतिशत अनुदान दिन्छ । २५ प्रतिशतले ५५ रुपैयाँको अनुदान १३ रुपैयाँ ७५ पैसा हुन आउँछ । यसमा प्रतिकिलो अनुदानको २ रुपैयाँ ७५ पैसाबापत भने बोरा दिएको ढकालले बताए । ११ रुपैयाँ भने हातहातै नगद दिएको उनको भनाइ छ ।

समितिले १ मुरीमा ८० किलो कोदो रहने निर्णय गरेको छ । नगरपालिकाले दुई मुरीको अनुदान नदिने र त्यसपछि उत्पादनअनुसारको हिसाब गरेर अनुदान दिने गरेको छ । बोराका लागि भने ५० किलोको एउटा बोरा दिने गरिएको छ । राइनासको २, ३, ४, ९ र १० वडामा अनुदान दिने काम सकिएको छ ।

१० वटा वडा रहेको राइनासमा ५ वडामा अनुदान दिने काम भइरहेको छ । यसका लागि प्राविधिक, कर्मचारी र जनप्रतिधि कोदो जोख्ने मेसिन र बोरासहित घरघरै पुग्ने गरेका छन् । हालसम्म ३ सय ५६ जनाले अनुदान पाइसकेको कृषि प्रमुख ढकालले जनाए । ती प्रत्येक किसानले दुई मुरीभन्दा बढी कोदो फलाएका छन् ।

अनुदान पाएका किसानले १ लाख ६ सय ४८ किलो (१ हजार ६ क्विन्टलभन्दा बढी) कोदो फलाएका छन् । प्रत्येक घरको १ सय २० किलोबाहेक ५७ हजार ९ सय २८ किलोको अनुदान दिइएको छ । हालसम्म ६ लाख २७ हजार २ सय ८ रुपैयाँ अनुदान दिइएको कृषि प्रमुख ढकालले बताए । उनका अनुसार ९ सय ७६ बोरा वितरण गरिएको छ ।

राइनास नगरपालिकाले कोदो खेतीलाई प्राथमिकता दिएको छ । कोदो खेती बढाउन उत्पादनमा आधारित अनुदान दिन थालिएको प्रमुख प्रशासकीय अधिकृत गोकर्णराज सुयलले बताए । तल्लो क्षेत्र राइनासटारमा धान फल्छ । माथिल्लो क्षेत्रमा भने कोदो फलाउने नगरपालिकाको योजना छ । यसको उद्देश्य राइनासको ब्रान्ड कोदो बनाउने तयारी हो ।

प्रकाशित : माघ १४, २०७९ ०७:३८

पूरा पढ्नुहोस्

प्रतिक्रिया

थप केही अर्थ / वाणिज्यबाट