राष्ट्रिय योजनामा सुनचाँदीका विषय समावेश गर्न व्यवसायीको आग्रह- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

राष्ट्रिय योजनामा सुनचाँदीका विषय समावेश गर्न व्यवसायीको आग्रह

कान्तिपुर संवाददाता

काठमाडौँ — नेपाल सुनचाँदी व्यवसायी महासंघले राष्ट्रिय योजनामा सुनचाँदीका विषय समावेश गर्न आग्रह गरेको छ । नेपाल सुनचाँदी व्यवसायी महासंघका अध्यक्ष माणिकरत्न शाक्यको नेतृत्वमा बुधबार महासंघको प्रतिनिधीमण्डलले राष्ट्रिय योजना आयोगका उपाध्यक्ष डा. मीन बहादुर श्रेष्ठसँग भेट गरी सुनचाँदीका विषयलाई देशको पञ्चवर्षीय योजनामा समावेश गर्न आग्रह गरेको हो ।

महासंघले अघि सारेका सुनको उत्खनन, निकासी–पैठारी, ओसारपसार, कालिगढको व्यवस्थापन र तालिम लगायतका विषयलाई सम्बोधन गर्न आयोगले आफ्नो तर्फबाट सक्दो सहयोग गर्ने आयोगका उपाध्यक्ष श्रेष्ठले प्रतिवद्धता जनाएका थिए । भेटका क्रममा महासंघका अध्यक्ष शाक्यले सुनचाँदी व्यवसायमा परेको समस्या र तिनको समाधानका विषयमा आफ्नो धारणा राखेका थिए । उनले सुनको कारोबारका क्रममा नीतिको अभाव भएको उल्लेख गर्दै यसतर्फ आवश्यक पहल गर्न समेत उपाध्यक्ष श्रेष्ठलाई आग्रह गरेका थिए ।

सुुनचाँदीको विषयलाई देशको योजनामा समावेश गर्नसके यसबाट सबैलाई फाइदा हुने श्रेष्ठको भनाइ थियो । भेटका क्रममा महासंघका तर्फबाट उपाध्यक्ष दियसरत्न शाक्य, महासचिव धर्मशुन्दर वज्राचार्य, सहकोषाध्यक्ष पद्मशुन्दर शाक्य लगायको उपस्थिति थियो ।

प्रकाशित : माघ ११, २०७९ १८:०४
प्रतिक्रिया
पठाउनुहोस्

सीमा रक्षक गुरुङको शवलाई सुस्ताबासीको सम्मान

नारायण शर्मा

पूर्वी नवलपरासी — सुस्ता बचाउ आन्दोलनका मुख्य अभियन्ता गोपाल गुरुङको शवमा सुस्ताबासीले राष्ट्रिय झन्डा ओढाएर सम्मान गरेका छन् । एक महिनाअघि मस्तिष्कघातले थलिएका गुरुङको उपचारका क्रममा भैरहवा मेडिकल कलेजमा मंगलबार निधन भएको हो । 

उनको शवलाई बुधबार स्थानीयले सुस्तामा ल्याएर सम्मान स्वरुप राष्ट्रिय झन्डा ओढाएका थिए । उनको पार्थिव शरीरमा फूल चढाउन र सम्मान व्यक्त गर्न सुस्ता र आसपासका स्थानीयको भिड थियो । त्यहाँका प्रदेशसभा सदस्य देवकरणप्रसाद जयसवालले उनको शवमा राष्ट्रिय झन्डा ओढाएका थिए । उनको चाहनाअनुसार जन्मथलो तनहुँमा अन्त्येष्टि गरिने स्थानीय रवीन्द्र जयसवालले जानकारी दिए । उनको शवलाई आजै तनहुँ लगिँदै छ । तनहुँको शुक्लागण्डकीमा पुग्दा धेरै अबेर हुने भएकाले बिहीबार उनको अन्त्येष्टि गरिने पारिवारले जनाएको छ ।

तनहुँमा जन्मेका गोपाल गुरुङ नेपाल प्रहरीमा जागिरे थिए । सुस्ता प्रहरी चौकिबाट सेवा निवृत्त भएपछि उनी सुस्ताकै ऐलानी जग्गामा घरजम गरेर जीवन बिताएका थिए । उनले सुस्ता जोगाउन नागरिक तहबाट समिति बनाएर सीमा सुरक्षामा लागेका थिए । उनले स्थानीय परिचालन गरेर सीमा सुरक्षाको पहरेदारी गर्दै आएका थिए । उनी राष्ट्रप्रेमी थिए ।

भारतले सुस्तामा ४ दशकदेखि गर्दै आएको थिचोमिचोको सशक्त प्रतिरोध गर्ने नागरिक आन्दोलनका अगुवा थिए गुरुङ ।

भारतीय सीमामा रहेको सुस्ताको भूभाग जोगाउन उनी २४ वर्षभन्दा बढी भारतीय सुरक्षाकर्मीको आखाँमा तारो बनेर सुस्ता जोगाउने अभियानमा लागेका थिए । उनको उपचारमा आर्थिक अभाव भएपछि सुस्ताबासीले गोपाल गुरुङ बचाउ अभियान सुरु गरेर घरघरै नगद सहयोग मागेका थिए । ।

नेपाल भारतको सीमानामा रहेको नारायणी नदी पारी सुस्ता रहेको छ । सिंगो सुस्ता गाउँपालिका नै २०३४ सालको बाढीले बगाएपछि त्यहाँ २ वटा वडा मात्र बाँकी रहेको थियो । सुस्तामा करिब ५ सय घर परिवार नेपाली बसोबास गर्छन् । त्यहाँ नेपाल-भारतको बीचमा सीमा स्तम्भ र दशगजा छैन । २०३० साल अघि ६४ हजार हेक्टर क्षेत्रफल रहेको सुस्तामा हाल ४ हजार हेक्टर जमिन छ । त्यसबाहेक सबै भूभाग भारतले आफ्नोतर्फ गाभिसकेको छ ।

प्रकाशित : माघ ११, २०७९ १८:०३
पूरा पढ्नुहोस्
प्रतिक्रिया
पठाउनुहोस्
×