जनवरी १ देखि एसियाली राजमार्ग पूर्ण सञ्चालनमा- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

जनवरी १ देखि एसियाली राजमार्ग पूर्ण सञ्चालनमा

भारतले अघोषित रूपमा ‘सुरक्षा संवेदनशीलता’ को कारण देखाएर राजमार्ग सञ्चालनमा ढिलाइ गर्दै आएको थियो
पर्वत पोर्तेल

झापा — एसियाली राजमार्ग जनवरी १ देखि पूर्ण रूपमा सञ्चालनमा आउने भएको छ । निर्माण सकिएको लामो समयसम्म उक्त राजमार्ग पूर्ण रूपमा सञ्चालन हुन सकेको थिएन । ६ लेनको ‘एसियन हाइवे’ र मितेरी पुल नयाँ वर्षको सुरुवातसँगै गुल्जार हुनेछ ।

उक्त राजमार्ग सञ्चालनमा भारतीय पक्षले गरेको ढिलासुस्तीबारे कान्तिपुरले पटकपटक समाचार र सम्पादकीयमार्फत दबाबसमेत दिएको थियो । गत पुस ६ मा सम्पन्न नेपाल र भारतका भन्सार तथा सुरक्षा अधिकारीहरूको द्विपक्षीय बैठकले ‘मितेरी पुल’ सहितको उक्त राजमार्ग सञ्चालन गर्ने सहमति भएको हो ।

भारतको पानीट्यांकीमा सम्पन्न बैठकपछि जारी द्विपक्षीय सहमतिमा भारतको नक्सलबारी भन्सार डिभिजनकी उपआयुक्त ल्हा छिरिङ शेर्पा र मेची भन्सार कार्यालयका प्रमुख रामप्रसाद पाठकले हस्ताक्षर गरेका थिए । भारतीय सुरक्षा र भन्सार अधिकारीले भारत सरकारकै लगानीमा निर्मित पुल आफ्नै पक्षबाट समयमा सञ्चालन गर्न नसकेकामा आत्मालोचना पनि गरेका थिए । ‘सहमतिपछि अब पूर्ण रूपमा सञ्चालन हुने टुंगो लाग्यो,’ पाठकले भने, ‘निकै लामो प्रयत्नपछि सफल भयौं ।’

उक्त राजमार्ग सञ्चालनका लागि निरन्तर द्विपक्षीय बैठक भएका थिए । भारतले अघोषित रूपमा ‘सुरक्षा संवेदनशीलता’ को कारण देखाएर राजमार्ग सञ्चालनमा ढिलाइ गर्दै आएको थियो । यसले दुवै देशका नागरिकले सास्ती बेहोर्नुपरेको थियो । भारतीय पक्षले मालवाहक ट्रकबाहेक अन्य सवारीलाई उक्त राजमार्ग प्रयोग गर्न निषेध गर्दै आएको थियो ।

पुरानो पुलबाटै सवारी आउजाउ गर्दा यो नाकामा दैनिकजसो ट्राफिक जाम हुँदै आएको थियो । ‘नयाँ वर्षदेखि नाकाको जाम सबै हट्ने विश्वास छ,’ भन्सार प्रमुख पाठकले भने, ‘अब सवारी आवागमन सहज बन्ने पक्का छ ।’ भन्सार स्रोतका अनुसार चारपांग्रे सवारीलाई उक्त राजमार्गबाट तथा दुई र तीनपांग्रे सवारीलाई पुरानो पुलबाट आउजाउको व्यवस्था मिलाइनेछ । अहिले पुरानो मेची पुल सवारी र पैदलयात्रीको भीडले थेगिनसक्नुहुन्छ । सिटी रिक्सादेखि यात्रुवाहक सवारीका कारण दुई लेनको थोत्रो पुल सधैंको ट्राफिक जामले अस्तव्यस्त हुँदै आएको छ ।

अन्तर्राष्ट्रिय मापदण्डको भव्य सडक र पुललाई भारतले पूर्ण रूपमा सञ्चालन नगरिदिँदा अन्तर्राष्ट्रिय सीमानाका वारपार गर्न यात्रीका लागि ‘युद्ध जित्नु’ जस्तो हुँदै आएको छ । पुल र राजमार्ग पूर्ण रूपमा सञ्चालनमा आएपछि दुवै मुलुकका यात्रीलाई सहज हुने मेचीनगर नगरपालिकाका प्रमुख गोपालचन्द्र बुढाथोकीले बताए । ‘नाका वारपार गर्दा अहिले ठूलो सास्ती छ,’ बुढाथोकीले भने, ‘अब चाँडै यो समस्याबाट मुक्ति मिल्ने विश्वास छ ।’

एसिया उपक्षेत्रीय आर्थिक सहयोग–सडक सञ्जाल परियोजना (एसएएसईसी) अन्तर्गत एसियाली विकास बैंक (एडीबी) को करिब डेढ अर्ब भारु ऋण सहयोगमा भारतले ६ लेनको पुल निर्माणसँगै ५ सय मिटर एप्रोच सडक निर्माण गरेको थियो । ०७३ मा तत्कालीन प्रधानमन्त्री शेरबहादुर देउवा र भारतीय समकक्षी नरेन्द्र मोदीले मेची नदीमा ५ सय ७५ मिटर लामो ‘मितेरी पुल’ निर्माणमा सम्झौता गरेका थिए ।

प्रकाशित : पुस १२, २०७९ २२:२९
प्रतिक्रिया
पठाउनुहोस्

दुई दशकपछि त्रिभुवन गोल्डकप हुँदै

पर्वत पोर्तेल

झापा — ३० को दशकमा राजधानी बाहिरकै प्रतिष्ठित प्रतियोगिताको पहिचान बनाएको ‘त्रिभुवन मेमोरियल गोल्डकप’ को पुनर्आयोजना गर्ने चाँजो मिलेको छ । जिल्लाकै इज्जतिलो प्रतियोगिता गर्न करिब दुई दशकपछि स्थानीय जुर्मुराएका हुन् ।

मोफसलकै ठूलो र प्रतिष्ठित यो प्रतियोगिता देशको राजनीतिक परिवर्तनसँगै ओझेल परेको थियो । १८ वर्षपछि प्रतियोगिता आयोजना गर्न स्थानीय व्यवसायी र सामाजिक अगुवाहरु अघि सरेका हुन् ।

पछिल्लो पटक २०६१ मा प्रतियोगिता आयोजना भएपछि ठप्प थियो । ०६२/०६२ को राजनीतिक परिवर्तनका कारण प्रतियोगिता हुन नपाएको स्थानीय व्यवसायी दिपेश ढकालले जनाए । युवा उद्यमी ढकालकै अगुवाइमा गोल्डकप आयोजक समिति निर्माण गरिएको छ । ‘गोल्डकपको नाम परिवर्तन गरेर भद्रपुर, झापा गोल्डकप जुराइएको छ,’ ढकालले भने, ‘यो वर्षदेखि प्रतियोगितालाई निरन्तरता दिने योजनामा हामी जुटेका हौं ।’

ढकालका अनुसार प्रतियोगिता झापाको प्रतिष्ठित ‘झापा गोल्डकप’कै निरन्तरताको कडीको रुपमा रहने छ । ‘बिर्तामोडको डोमालाल राजवंशी रंगशालामा आयोजना हुँदै आएको झापा गोल्डकपलाई यस वर्ष रोकेर मेची रंगशालामा भद्रपुर–झापा गोल्डकप आयोजना गर्न लागिएको हो,’ ढकालले जनाए ।

प्रतियोगिताको मिति भने अखिल नेपाल फुटबल संघ (एन्फा) सँगको छलफलपछि मात्रै तय गरिने जनाइएको छ । ‘यही माघ भित्रमा प्रतियोगिता आयोजना हुने छ,’ ढकालले थपे, ‘एन्फासँगको सहकार्यमा प्रतियोगिता हुने छ ।’ प्रतियोगिताका विजेताले नगद १३ लाख पाउने छन् । उपविजेता टिमले नगद ७ लाख पाउने छन् ।

गोल्डकप आयोजक समितिका महासचिव तथा भद्रपुरका पूर्वप्रमुख जीवन श्रेष्ठले प्रतियोगिता आयोजनाका लागि मेची रंगशालाको स्तरोन्नति सुरु गरिएको जनाए । श्रेष्ठले भने, ‘अत्यन्त जीर्ण अवस्थामा रहेको झापाकै पुरानो र स्थायी रंगशालाको मैदानमा झार रोप्ने र माटोको लेभल मिलाउने काम भइरहेको छ । प्याराफिटहरु पनि व्यवस्थित गरिने छ ।’

पटकपटक पहल

०६२/०६३ को जनआन्दोलनको चेपुवामा पर्यो गोल्डकप । गणतन्त्र आयो । राजा महाराजाको नाममा स्थापित प्रतियोगिता आयोजना गर्ने जाँगर स्थानीयले खासै चलाएनन् । त्यसपछि यो प्रतिष्ठित प्रतियोगिता ओझेल पर्‍यो।

भद्रपुर नगरपालिकाका पूर्व प्रमुख श्रेष्ठका अनुसार जनआन्दोलन लगत्तै प्रतियोगिताको नाम फेरेर पुनर्आयोजना गर्ने कुरा चलेपनि नाम फेर्ने विषयमा कुरा नमिल्दा प्रतियोगिता अलपत्र परेको थियो । प्रतियोगितालाई निरन्तरता दिन भद्रपुरका स्थानीय व्यवसायी तथा राजनीतिकर्मीहरुले पटक–पटक पहलकदमी गरे । तर टुंगोमा पुगेन । ‘अन्तिममा आर्थिक कारण नै बाधक बन्यो,’ त्यो बेला प्रतियोगितालाई निरन्तरता दिन बनेको ‘त्रिभुवन गोल्डकप ट्रष्ट’ का संयोजक टिकाराज ढकालले सुनाए ।

गोल्डकपको इतिहास

त्रिभुवन गोल्डकपको सुरुआत पञ्चायतकालमै भएको थियो । जतिबेला मुलुक राजा महेन्द्रको एकतन्त्रीय शासनमा थियो, त्यही बेला अर्थात् २०२४ सालताका प्रतियोगिताको थालनी भयो । उबेला स्थानीय स्तरमा मात्रै सीमित रहेको प्रतियोगिता २०३१ पछि भने अन्तर्राष्ट्रियव्यापी बन्यो ।

प्रतियोगितामा तत्कालीन महेन्द्र पुलिस क्लब, त्रिभुवन आर्मी क्लब, जनकपुर चुरोट कारखाना लगायतका चर्चित क्लबका साथै भारतको मोहन बगान, बंगलादेश र भुटानको टिम सहभागी हुन्थे । २०३६ को जनमत संग्रहका बेला प्रतियोगिता स्थगित भयो । त्यसपछि पुनः प्रतियोगिताले निरन्तरता पाएको खेलकुद क्षेत्रका अग्रज लेखनाथ पराजुली सम्झन्छन् । ०४७ सालसम्म चल्यो । फेरि रोकियो । ‘समय–समयमा भएका राजनीतिक उतारचढावले प्रतियोगिता प्रत्यक्ष रुपमा प्रभावित भयो,’ पराजुलीले भने, ‘०४७ सालपछि एकैचोटी १२ वर्षपछि मात्रै प्रतियोगिता भयो, ०५९ मा ।’ ०६० मा पुनः एक वर्ष रोकिएर ०६१ मा मात्रै आयोजना भएको प्रतियोगिता त्यसयता पूर्णरुपमै ठप्प थियो । ०५९ र ०६१ का दुवै प्रतियोगिता तत्कालीन युवराज पारस शाहले उद्घाटन गरेका थिए ।

प्रकाशित : पुस १०, २०७९ ०८:०४
पूरा पढ्नुहोस्
प्रतिक्रिया
पठाउनुहोस्
×