उत्पादन कटौती हुँदा पनि कच्चा तेलको भाउ घट्यो 

एक महिनामा समग्रमा कच्चा तेलको मूल्य प्रतिब्यारेल १७ डलर हाराहारीमा घटेको छ । तेल उत्पादक मुलुकहरुको संगठन ओपेक प्लसले नोभेम्बर महिनामा कटौती गरेको परिमाणलाई निरन्तरता दिने निर्णय गरेको छ । नोभेम्बर महिनादेखि ओपेक प्लसले कच्चा तेलको उत्पादन दैनिक २० लाख ब्यारेल कटौती गर्दै आएको छ । यसैलाई केही दिनअघि बसेको ओपेक प्लस बैठकले निरन्तरता दिने निर्णय गरेको हो । अर्कोतर्फ युरोपियन मुलुकले रसियन कच्चा तेलको मूल्यमा प्रतिब्यारेल ६० डलरको ‘क्याप’ लगाइदिएका छन् । जसले गर्दा चीन र भारतले रसियन तेलको आपूर्ति बढाएका छन् । रसियाले युक्रेनमा आक्रमण गरेपछि युरोपियन मुलुकहरुले रुसको राजस्व आम्दानी घटाउन विभिन्न प्रयास गरिरहेका छन् । विश्वमा धेरै तेल उत्पादन गर्ने मुलुकमा रुस दोस्रो ठूलो मुलुक हो । अन्तर्राष्ट्रिय बजारबाट खरिद गरेको मूल्यअनुसार भारतीय आयल कर्पोरेसनले नेपाल आयल निगमलाई प्रशोधित पेट्रोलियम पदार्थको मूल्यसूची पठाउँछ । तसर्थ अन्तर्राष्ट्रिय बजारमा हुने मूल्य उतारचढावले नेपालको अर्थतन्त्रमा नै प्रभाव पर्दछ ।