६४ कम्पनीको सेयर मूल्य बढ्दा १२४ को घट्यो - अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

६४ कम्पनीको सेयर मूल्य बढ्दा १२४ को घट्यो 

कान्तिपुर संवाददाता

काठमाडौँ — बुधबार सेयर बजारमा मूल्य बढ्ने कम्पनीभन्दा घट्ने कम्पनीको संख्या करिब दोब्बर रहेको छ । कुल ६४ कम्पनीको मूल्य बढ्दा १२४ को घट्यो भने ६ को स्थिर रह्यो । मूल्य बढ्ने कम्पनीमध्ये पनि ग्रिनलाइफ हाइड्रोपावर र खप्तड लघुवित्त सबैभन्दा अगाडि रहे । ती कम्पनीको ४ प्रतिशतले सेयर मूल्य बढेको छ । विन नेपाल लघुवित्तको मूल्य सबैभन्दा धेरै ४.४ प्रतिशतले घट्यो । 

समग्र सेयर बजारको परिसूचक नेप्से भने झिनो अंकमा रातो रह्यो । नेप्से ३.५ अंकले घटेर १९४९ अंकमा कायम भएको छ । कारोबार रकम जम्मा ८४ करोड २६ लाखमा खुम्चिएको छ ।

व्यापार उपसमूह १६ अंक बढ्यो । बैंकिङ ०.३, विकास बैंक १८, फाइनान्स १७, होटल तथा पर्यटन १, जलविद्युत् २, जीवन बीमा १७, उत्पादन १८, निर्जीवन बीमा ७ र अन्य उपसमूह ९ अंक घटे । कारोबार रकमका आधारमा हिमालयन डिस्टिलरी, नबिल बैंक, नेस्डो लघुवित्त, शिवम् सिमेन्ट र इन्भेष्टमेन्ट बैंक (संस्थापक) कम्पनी क्रमश: अगाडि रहे । बजारको पुँजीकरण २८ खर्ब ४ अर्ब कायम भएको छ ।


प्रकाशित : मंसिर १४, २०७९ १५:५२
प्रतिक्रिया
पठाउनुहोस्

रुपन्देहीमा १ लाख २ हजार ९ सय ३७ मत  बदर

माधव ढुंगाना

भैरहवा — गत मंसिर ४ गते सम्पन्न प्रतिनिधि र प्रदेशसभाको प्रत्यक्ष र समानुपातिक निर्वाचनतर्फ रुपन्देहीमा १ लाख २ हजार ९ सय ३७ मत बदर भएको छ ।

बदर मत अत्यधिक हुनुले निर्वाचनका लागि सिकाइने मतदाता शिक्षा कार्यक्रमको प्रभावकारीतामाथि प्रश्न उठेको छ । जिल्लामा ६ लाख ३८ हजार ९ सय ९२ मतदाता रहेकामा प्रतिनिधिसभा प्रत्यक्षतर्फ पाँचवटै क्षेत्रमा खसेको ४ लाख ३१ हजार ९ सय ७४ मतमध्ये २४ हजार ५ सय २१ मत बदर भएको छ । यो कुल खसेको मतको ५.६८ प्रतिशत हो ।

समानुपातिकमा प्रतिनिधिसभातर्फ खसेको ४ लाख ३४ हजार ५ सय ६४ मतमा २३ हजार ७ सय ४३ मत बदर पाइएको छ । यो कुल खसेको मतको ५.४६ प्रतिशत हो । प्रदेशसभा प्रत्यक्षतर्फ खसेको ४ लाख ३१ हजार १७ मतमा २१ हजार ५ सय २४ मत बदर पाइएको छ । जुन ४.९९ प्रतिशत हो । प्रदेशसभा समानुपातिकतर्फ ४ लाख ३० हजार ८ सय ५७ मत खसेकामा ३३ हजार १ सय ४९ मत बदर पाइएको छ । यो ७.६९ प्रतिशत हो ।

प्रतिनिधिसभाको प्रत्यक्षतर्फ सबैभन्दा बढी क्षेत्र नम्बर ४ र सबैभन्दा कम क्षेत्र नम्बर २ मा मत बदर भएको छ । यस्तै, प्रदेशसभा प्रत्यक्षतर्फ क्षेत्र नम्बर ४ (२) मा सबैभन्दा बढी र २ (१) मा कम मत बदर भएको छ । प्रतिनिधिसभा समानुपातिकतर्फ सबैभन्दा धेरै क्षेत्र नम्बर १ र थोरै क्षेत्र नम्बर २ मा मत बदर छ । प्रदेशसभा समानुपातिकतर्फ क्षेत्र नम्बर १ मा धेरै र क्षेत्र नं. ४ मा कम मत बदर भएको निर्वाचन कार्यालयको तथ्यांक छ ।

जिल्ला निर्वाचन कार्यालयका प्रमुख अयोध्या प्रसाद भण्डारीले यति धेरै मत बदर हुनुले मतदाता शिक्षा कार्यक्रम प्रभावकारी हुन नसकेको स्वीकार गर्नुपर्ने बताए । रुपन्देहीको १६ वटा स्थानीय पालिकाबाट एक/एक जना मतदाता अनुगमन अधिकृतलाई मात्र निर्वाचन आयोगको तर्फबाट तालिम दिएको र ती अधिकृतहरू मार्फत् सम्बन्धित पालिकाबाटै प्रत्येक वडा/वडामा मतदाता शिक्षा कार्यक्रम संचालन गरिएकाले निर्वाचन कार्यालयको भूमिका खासै नभएको उनले बताए । ‘मतदाता शिक्षा कार्यक्रम कमजोर देखियो,’ उनले भने, ‘कामको चापाचापले मतदाता शिक्षा कार्यक्रमको अनुगमन पनि निर्वाचन आयोग र कार्यालयबाट प्रभावकारी रुपमा गर्न सकिएन ।’

प्रकाशित : मंसिर १४, २०७९ १४:५५
पूरा पढ्नुहोस्
प्रतिक्रिया
पठाउनुहोस्
×