मौद्रिक समीक्षाप्रति चेम्बर असन्तुष्ट, भन्यो- वित्तीय स्थायित्व कायम हुँदैन- अर्थ / वाणिज्य - कान्तिपुर समाचार

मौद्रिक समीक्षाप्रति चेम्बर असन्तुष्ट, भन्यो- वित्तीय स्थायित्व कायम हुँदैन

कान्तिपुर संवाददाता

काठमाडौँ — राष्ट्र बैंकले आइतबार मात्रै मौद्रिक नीतिको पहिलो त्रैमासिक समीक्षा सार्वजनिक गरेको छ । समीक्षामा गरिएको व्यवस्थाले वित्तीय स्थायित्व कायम गर्न नसक्ने भन्दै चेम्बर अफ कमर्सले असन्तुष्ट जनाएको छ ।

चेम्बरले जारी गरेको विज्ञप्तिमा भनिएको छ ‘मुलुकको बाह्य क्षेत्रमा केही सुधार देखिएपनि आन्तरिकतर्फ अर्थतन्त्र जोखिमकै अवस्थामा रहँदा मौद्रिक नीतिको समीक्षामार्फत सम्बोधन हुने अपेक्षा थियो । राष्ट्र बैंकको पछिल्लो व्यवस्थाले आर्थिक गतिविधिलाई चलायमान बनाउन सहयोग गर्दैन ।’

शून्य दशमल ४ प्रतिशत घटाइएको स्प्रेड दरले आगामी दिनमा ब्याजदर बढ्न नदिए पनि हाल कायम उच्च ब्याजदरलाई घटाउने सम्भावना न्यून रहेको चेम्बरको ठहर छ । बैंक तथा वित्तीय संस्थाले कर्जा प्रवाह गर्दा आधार दरमा लिने प्रिमियमलाई अधिकतम २ प्रतिशतसम्म मात्रै कायम गर्न पनि चेम्बरले राष्ट्र बैंक समक्ष आग्रह गरेको छ । मौद्रिक नीति सम्बन्धमा राष्ट्र बैंकको समीक्षाले औद्योगिक क्षेत्र थप प्रवाहित हुने चेम्बरले जनाएको छ ।

चेम्बरले हाल कायम ८.५ प्रतिशतको बैंक दरलाई ५ प्रतिशतमा झार्न सुझाव दिएको छ । विदेशी विनिमय सञ्चितिमा सुधार आएको भन्दै चेम्बरले केही वस्तुहरुको आयातमा एलसी खोल्दा लाग्दै आएको शतप्रतिशत मार्जिनको व्यवस्थालाई समेत हटाई सहजीकरण गर्न आग्रह गरेको छ । चेम्बरले सीडी रेसियोलाई ९० प्रतिशतको स्थानमा विगतका वर्षहरुमाझैं सीसीडी रेसियो ८५ प्रतिशत कायम गर्न वा सीडी रेसियोलाई ९५ प्रतिशत गर्न आग्रह गरेको छ ।


प्रकाशित : मंसिर १२, २०७९ १८:०९
प्रतिक्रिया
पठाउनुहोस्

‘चुनावी रिसिइबी’ साध्न युवकको हत्या

हत्या आरोपमा २ पक्राउ
भरत जर्घा मगर

सिरहा — सिरहा बरियारपट्टी गाउँपालिका–१ नरगीका ३२ वर्षीय एक युवकको हत्या भएको छ । नरगी टोलका  ३२ वर्षीय रामशंकर यादवलाई बुधबार राति हत्या गरी नरगी–बडहरी सडक खण्डमा फालिएको अवस्थामा स्थानीयले फेला पारेका थिए । 

जिल्ला प्रहरी कार्यालय सिरहाका प्रवक्ता डीएसपी सुवास बुढाथोकीका अनुसार नरगी–बडहरी सडक खण्डमा सडक दुर्घटनामा युवकको मृत्यु भएको खबर आएपछि प्रहरीले अनुसन्धान सुरु गरेको थियो । हत्यामा संलग्न आरोपमा बरियारपट्टी गाउँपालिका–१ बडहरीका ४८ वर्षीय दिपु भन्ने दिपेन्द्र कुमार यादव र ४२ वर्षीय अजयकुमार साहलाई प्रहरीले पक्राउ गरेको छ ।

मृतकका आफन्तले कर्तव्य ज्यानसम्बन्धी किटानी जाहेरी दिएपछि पक्राउ गरी अनुसन्धान पढाएको डीएसपी बुढाथोकीले जानकारी दिए । मृतकको शव धरानस्थित बीपी कोइराला स्वास्थ्य विज्ञान प्रतिष्ठानबाट पोस्टमार्टम गरी आफन्तलाई जिम्मा लगाइएको छ ।

यस्तो थियो घटना

मृतक रामशंकर, दिपेन्द्र र अजय गाउँटोल सँगै घुमफिर गर्ने, खानपिन गर्थे । स्थानीयका अनुसार रामशंकर कांग्रेसका कार्यकर्ता थिए भने अजय साह र दिपेन्द्र माओवादीमा संलग्न थिए । फरक दलमा भए पनि आइतबार सम्पन्न चुनावमा भोट माग्न उनीहरू सक्रिय थिए । सम्बन्ध रामै्र थियो । सिरहा क्षेत्र नम्बर २ मा सत्ता गठबन्धनकी उम्मेदवार चित्रलेखा यादव पराजित भइन् । सोही क्षेत्रमा पर्ने बडहरी र नरगी गाउँबाट अपेक्षा गरेअनुरुप उम्मेदवारलाई भोट परेन ।

मृतकका भाइ सुरेश यादवका अनुसार शुक्रबार राति दिपेन्द्रले रामशंकरलाई फोन गरेर बोलाएपछि उनी नरगी चोकतिर गएका थिए । ‘दिपेन्द्र, अजय र डम्बरसहितले दाजु रामशंकरलाई नरगीको सीमामा रहेको मदिरा पसलमा लगे,’ सुरेशले भने, ‘त्यहीँ उनीहरूले दाजु रामशंकरको हत्या गरेर सडकमा फाले ।’

रामशंकर शुक्रबार राति मृत फेला परेपछि भोलिपल्ट स्थानीयले दिपेन्द्रलाई खोज्दै घर गए । दिपेन्द्रको निर्माणाधीन घरमा रामशंकरको मफलर रगतले लतपतिएको भेटिएपछि दुर्घटना नभइ हत्या भएको भन्दै प्रहरीलाई अनुसन्धानका लागि दबाब दिए । घरको कोठादेखि आँगनसम्म रगतको छिटा गोबर र माटोले लिपेर मेट्न खोजिएको जस्तो देखिएपछि हत्या भएको हुनसक्ने प्रारम्भिक अनुसन्धानमा प्रहरी पुग्यो । सुरुमा सडक दुर्घटनाजस्तो देखिए पनि स्थानीयको सहयोगमा घटना अनुसन्धान गर्दै जाँदा प्रारम्भिक अनुसन्धानमै हत्याको रहस्य खुलेको हो ।

पक्राउ परेका दिपेन्द्र र अजयलाई जिल्ला अदालत सिरहाबाट सोमबार म्याद थप गरी अनुसन्धान अगाडि बढाएको प्रहरीले जनाएको छ ।चुनावी परिणाम पछि उनीहरुबीच खटपट परेको र सोही निहुँमा दाजुको हत्या गरेको सुरेश र आफन्तको आरोप छ ।

प्रकाशित : मंसिर १२, २०७९ १८:०८
पूरा पढ्नुहोस्
प्रतिक्रिया
पठाउनुहोस्
×