रुपन्देही व्यापार संगठनले भन्यो : किनमेल गर्नेहरू सीमापारि गए, भन्सारमा कडाइ गरियोस्

संगठनले मंगलबार भैरहवा भन्सार कार्यालयका प्रमुख मनिराम पौडेललाई ज्ञापनपत्र बुझाउँदै भन्सारमा कडाइ नगरेमा स्वदेशी व्यापारी नै पलायन हुने अवस्था आउने गुनासो गरेको छ । विवाह, ब्रतबन्ध, चाडपर्वका बेला सीमापारि गएर सामान ल्याउनेको लर्को नै लाग्ने गरेको तर सीमावारि भने व्यापार सुकेको उद्योग व्यापार संगठन रुपन्देहीका अध्यक्ष अनिल कुमार ज्ञवालीले बताए । उनले भने, ‘यहाँका व्यवसायी दिनभर पसल कुर्छन्, सीमापारि सुनौली बजारमा सामान किन्नेको जात्रा जस्तै छ, त्यसैले यहाँको व्यापार पनि सञ्चालन गर्ने वातावरण बनाउनु आवश्यक छ, नत्र उद्योगी व्यवसायीले सम्पूर्ण कारोबार बन्द गर्ने अवस्था सिर्जना हुन्छ ।’

संगठनले भन्सार प्रमुख पौडेललाई बुझाएको सुझावमा न्यूनतम १ हजार रुपैयाँभन्दा माथिको सामान ल्याउँदा अनिवार्य भन्सार रेकर्ड गराउनुपर्ने उल्लेख छ । खुला सीमा लगायत भन्सार नाकामा सीसीटीभी क्यामेरा चौबीसै घण्टा चालु अवस्थामा राख्नुपर्ने तथा सीमा नाकामा एकतर्फबाट जाने र अर्कोतर्फबाट आउने व्यवस्था गर्नुपर्ने सुझाव संगठनले दिएको छ । घरायसी सामानको एकद्वार प्रणालीमार्फत् छिटो र सहज तरिकाले भन्सार प्रज्ञापनपत्र भरी ल्याउने व्यवस्था गर्नुपर्ने र भारतबाट ल्याइएका सबै सामानको अभिलेख राख्नुपर्ने संगठनले सुझाव दिएको छ ।

ज्ञापनपत्र बुझ्दै भैरहवाका प्रमुख भन्सार अधिकृत पौडेलले तस्करी नियन्त्रणका लागि व्यवसायीको साथ आवश्यक रहेको बताए । उनले भने, ‘भन्सार कार्यालयसँग जोडिएको विषयवस्तु कार्यान्वयन हुन्छन् ।’ तस्करीको सामान व्यवसायीले पनि खरिद गर्न नहुनेमा उनले जोड दिए ।