‘डब्लूटीओबाट फाइदा उठाउन सकेनौं’- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

‘डब्लूटीओबाट फाइदा उठाउन सकेनौं’

कान्तिपुर संवाददाता

काठमाडौँ — नेपालबाट निर्यात गर्ने सामानमा भ्यालु एड गर्न नसक्दा ब्रान्ड भ्यालु गुमाउँदै गएकाले निर्यात कम हुँदै गएको नेपाल उद्योग वाणिज्य महासंघका अध्यक्ष शेखर गोल्छाको भनाइ छ । सरकारले ल्याएको निर्यातमा ८ प्रतिशत नगद अनुदान सकारात्मक भए पनि विगतका वर्षमा नगद नदिएका उदाहरणहरू पनि प्रशस्त रहेको उनले दाबी गरे ।

महासंघका अध्यक्ष गोल्छाले नेपालको निर्यात निरन्तर घट्दै गएको बताएका छन् । नेपालको निर्यातको अवस्था र चुनौतीबारे छलफल गर्न आयोजना गरिएको कार्यक्रममा उनले नेपाल विश्व व्यापार संगठन (डब्लूटीओ) को सदस्य भए पनि त्यसको फाइदा उठाउन भने नसकेको बताए ।

‘नेपालले १८ वर्षअघि डब्लूटीओसँग निर्यातका लागि सदस्यता लिएको थियो । त्यतिबेला नेपालको निर्यात अवस्था राम्रो थियो । कार्पेट, पस्मिनालगायत वस्तुको माग विश्व बजारमै आफ्नो बनाउन सकेका थियौं,’ उनले भने, ‘तर अहिले निर्यात आधाले घटेको छ । हामीले डब्लूटीओ बुझ्नै सकेनौं ।’ अल्पविकसित राष्ट्रका लागि डब्लूटीओले दिएको लाभ लिन नसक्दा नेपालले आफ्नो रेडिमेड गार्मेन्टको व्यापारसमेत गुमाएको उनले बताए ।

कार्यक्रममा निर्यात प्रवद्धन समितिका अध्यक्ष मनीष प्रधान र विश्व बैंकका वरिष्ठ अर्थशास्त्री गोन्जालो भरेलाले निर्यातको अवस्था, चुनौती र अवसरहरूबारे कार्यपत्र प्रस्तुत गरेका थिए । महासंघले २०३० सम्म व्यापार घाटा ५० प्रतिशत घटाउन सकिने सम्भावना देखाएको महासंघअन्तर्गत समितिका अध्यक्ष प्रधानले बताए । उनले नेपाल व्यापार एकीकरण रणनीति तीनपटक संशोधन गरे पनि त्यसको नतिजा शून्य रहेको बताए । ‘सन् २०२६ मा अल्पविकसित देशबाट स्थानान्तरण हुँदै छ, यस्तो अवस्थाले गर्दा निर्यातमा पाउने ड्युटी फ्रि नपाउन सक्छ,’ उनले भने, ‘निर्यातको क्षमता वृद्धि गर्न सरकारले थुप्रै काम गर्न जरुरी छ ।’

विश्व बैंकका वरिष्ठ अर्थशास्त्री भरेलाले नेपालको निर्यात ८/९ गुणा बढाउन सकिने अवसरहरूको बारेमा बताए । विश्व बैंकले गत वर्ष सार्वजनिक गरेको नेपाल डेभलपमेन्ट अपडेट २०२१ ले नेपालको निर्यात १२ गुणासम्म बढ्न सक्ने सम्भावना देखाएको थियो । एलडीसी ग्राज्युसनबाट फर्कने अवस्था नरहेको भन्दै उद्योग मन्त्रालयअन्तर्गत बहुपक्षीय व्यापार तथा व्यापार सहायता महाशाखाका प्रमुख सहसचिव गोविन्द कार्कीले यसलाई स्वीकार गरेर अघि बढ्नुपर्ने बताए ।

प्रकाशित : आश्विन १३, २०७९ १४:४८
प्रतिक्रिया
पठाउनुहोस्

सत्यमोहन जोशीको स्वास्थ्यमा सुधार

ललितपुरका मेयर चिरीबाबु संस्कृतिविद् जोशीलाई भेट्न पुगे अस्पताल
कान्तिपुर संवाददाता

ललितपुर — ललितपुर महानगरपालिका प्रमुख चिरीबाबु महर्जन शताब्दी पुरुष संस्कृतिविद् सत्यमोहन जोशीको स्वास्थ्य अवस्था बुझ्न अस्पताल पुगेका छन् ।

गत वैशाखमा १ सय ३ वर्षमा प्रवेश गरेका जोशीको स्वास्थ्यमा समस्या देखा परेपछि ६ दिन ग्वार्खोस्थित किस्ट अस्पतालमा भर्ना गरिएको थियो । ‘अहिले उहाँको स्वास्थ्यमा सुधार भएको छ , आज टेस्ट गर्न पठाएको रगतको रिपोर्ट ठीक आए दुई दिनपछि घर पठाउँछौं,’ अस्पतालकी नर्स सनम चौधरीले जानकारी दिइन् । डेंगीबाट संक्रमित जोशीको पिसाबमा संक्रमण र दम बढेपछि अस्पताल ल्याइएको थियो ।

ललिपतुर महानगर प्रमुख चिरीबाबु महर्जन जोशीलाई राखिएको कोठाभित्र प्रवेश गर्ने बित्तिकै जोशीले नमस्कार गर्दै केही बेर कुरा गरेका थिए । वाङमय शताब्दी पुरुष जोशीले नगरप्रमुख महर्जनसँग भने, ‘कला, संस्कृतिको क्षेत्रमा राष्ट्रका लागि मैले गरेको काममा तपाईंले सहयोग गरेपछि थप उचाई पायो, अब राष्ट्रको यी सम्पत्तिको संरक्षण गर्ने जिम्मेवारी तपाईँको ।’ महर्जनले शताब्दी पुरुष जोशीलाई मलेसियामा भएको सिटीनेटको अधिवेशनमा आफू कार्यसमितिमा निर्वाचित भएको कुरा सुनाउँदा सत्यमोहन उत्साहित देखिन्थे ।

ललितपुर महानगरले जोशीको दैनिक सहज बनाउन सवारीसाधन, ड्राइभर, सुरक्षाकर्मीको व्यवस्था पाँच वर्षअघि गरेको थियो । महानगरले राष्ट्रका लागि योगदान पुर्‍याउने व्यक्तिलाई जीवन छँदा नै सम्मान गर्ने उद्देश्यसहित तीन वर्षअघि जोशी १ सय वर्षमा प्रवेश गरेको अवसरमा अभिनन्दन गरेको थियो । यसैगरी, जोशीको मुहार छापिएको हुलाक टिकट प्रकाशन र सिक्का निस्काशन गरिएको छ ।

प्रकाशित : आश्विन १३, २०७९ १४:२०
पूरा पढ्नुहोस्
प्रतिक्रिया
पठाउनुहोस्
×