पश्चिम सेतीको सर्वेक्षण लाइसेन्स लिन एनएचपीसीले बुझायो निवेदन- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

पश्चिम सेतीको सर्वेक्षण लाइसेन्स लिन एनएचपीसीले बुझायो निवेदन

कान्तिपुर संवाददाता

काठमाडौँ — ७५० मेगावाट उत्पादन क्षमताको पश्चिम सेती जलविद्युत् आयोजनाको सर्वेक्षण लाइसेन्स लिनका लागि भारतीय कम्पनी एनएचपीसीले निवेदन दर्ता गरेको छ । एनएचपीसीले मंगलबार लगानी बोर्डको कार्यालयमा निवेदन दिएको हो । 

गत जेठ २३ मा बसेको लगानी बोर्डको ५१औं बैठकले ७५० मेगावाट क्षमताको पश्चिम सेती र ४५० मेगावाट उत्पादन क्षमताको सेती नदी–६ (एसआर–६) आयोजनाको विकास तथा लगानीको खाका तयार पार्ने जिम्मा एनएचपीसी लिमिटेडलाई दिने निर्णय गरेको थियो । साउन २३ मा बसेको लगानी बोर्डको ५२ औं बैठकले सर्वेक्षण लाइसेन्स जारी गर्ने समझदारीपत्र अनुमोदन गरेको थियो भने गत भदौ २ गते एनएचपीसी र लगानी बोर्डबीच सर्वेक्षण अनुमतिपत्र जारी गर्नेसम्बन्धी सम्झौतापत्रमा हस्ताक्षर भएको थियो ।

लगानी बोर्डको कार्यालयसँग यसअघि भएको सम्झौताअनुसार एनएचपीसीले सर्वेक्षण अनुमतिपत्र पाएको २ वर्ष भित्रमा सर्वेक्षण सक्ने र अध्ययन प्रतिवेदन तयार पारिसक्नेछ । एसआर–६ आयाेजनाकाे सर्वेक्षण अनुमतिपत्रका लागि भने एनएचपीसीले ६ महिना भित्रमा निवेदन दिइसक्नेगरी सम्झाैता भएकाे थियाे । पश्चिम सेती र एसआर–६ आयोजना एउटै नदी बेसिनमा ५० किमिको दूरीमा छन् । माथिल्लो तटीय आयोजनाका रूपमा पश्चिम सेती र तल्लो तटीय आयोजनाका रूपमा एसआर–६ सँगसँगै निर्माण भए कुल १२ मेगावाट क्षमता बराबरको विद्युत् उत्पादन हुनेछ ।

सेती नदी करिडोरमा उत्पादित विद्युत् राष्ट्रिय तथा अन्तरदेशीय प्रसारणलाइनमार्फत व्यापार सहजीकरण गर्न चैनपुर–बनलेक–न्यु अत्तरिया १५० किमि लामो ४ सय केभी प्रसारणलाइन निर्माण गर्न भारत सरकारको सहुलियतपूर्ण ऋण (लाइन अफ क्रेडिट) परिचालन गर्ने तयारी छ । प्रस्तावित पश्चिम सेती जलविद्युत् आयोजनाबाट बझाङका बागथला, देउरा, रायललगायत घना आवादी भएका स्थान प्रभावित हुने देखिएको छ । यो आयोजना बनाउँदा देउरा बजार र माथिल्लो तटीय क्षेत्र पूर्ण रूपमा डुबानमा पर्नेछ । पश्चिम सेती आयोजनाको लागत १,३२० मिलियन अमेरिकी डलर र एसआर–६ आयोजनाको लागत ८०० मिलियन अमेरिकी डलर बराबर रहने प्रारम्भिक अनुमान छ ।

प्रकाशित : आश्विन ११, २०७९ १७:२३
प्रतिक्रिया
पठाउनुहोस्

दसैंका लागि दार्चुलाका च्यांङ्ग्रा, मकवानपुरका खसीबोका

बुधबारदेखि काठमाडौंमा बिक्री गरिने खसीबोका,च्याङग्रा व्यापारीका भन्दा सस्ता हुने
कान्तिपुर संवाददाता

काठमाडौँ — दसैंलाई लक्ष्य गरेर खाद्य व्यवस्था तथा व्यापार कम्पनीले खसीबोका र च्याङग्रा भित्राउन सुरु गरेको छ । बजार मूल्य हस्तक्षेप गर्ने उदेश्यले कम्पनीले यसपाली २३ सय खसीबोका, च्याङग्रा खरिद गर्ने लक्ष्य राखेको छ । सोहीअनुसार खाद्यले मंगलबार २ सय ४३ वटा खसीबोका र च्याङग्रा भित्र्याएको हो ।

‘दार्चुलाबाट २ सय ६ वटा च्याङग्रा र मकवानपुरबाट ३७ खसीबोका आइपुगेका छन्,’ कम्पनीका प्रादेशिक कार्यालय, काठमाडौंकी प्रमुख ज्ञानु थापाले भनिन्, ‘दाङ, हेटौंडा, धादिङ लगायत क्षेत्रबाट आउने क्रम जारी छ ।’ कम्पनीका अनुसार दाङबाट २ सय ८३ र हेटौंडाबाट २ सय खसीबोका आउने क्रममा छन् ।

मंगलबार बिक्री मूल्य तय गरेर बुधबारदेखि बिक्री गरिने थापाले बताइन् । ‘बजारभाउ बुझ्ने क्रममा छौं,’ उनले भनिन्, ‘खरिद, ढुवानी भाडालगायत जोडेर बिक्री मूल्य निर्धारण हुन्छ । खाद्यले बिक्री गर्ने खसीबोका व्यापारीको भन्दा सस्तो नै हुन्छ ।’ यसअघि सरकारले जिउँदो खसीबोका र च्याङग्रामा प्रतिकिलो १० रुपैयाँ छुट दिने घोषणा गरिसकेको छ । खाद्यले निर्धारण गरेको बिक्री मूल्यमा थप १० रुपैयाँ छुट हुनेछ । खाद्य कम्पनीसँगै दसैंलाई लक्षित व्यावसायिक संघ/संस्थाले पनि खसीबोका खरिद प्रक्रिया सुरु गरेका छन् ।

चौपाया खरिद बिक्री सेवा संघका अध्यक्ष दीपक थापाका अनुसार व्यावसायिहरूले सल्यान, सुर्खेत, बैतडी, डडेलधुरा, मकवानपुर, रामेछापलगायत जिल्लाबाट खसीबोका ल्याउने तयारी गरेका छन् । अपुग खसीबोका भारतको लखनउ, उत्तरप्रदेशबाट पनि आयात गरिने उनले बताए । त्यस्तै, च्याङग्रा भने मुस्ताङबाट खरिद गरिने बताए ।

प्रकाशित : आश्विन ११, २०७९ १७:१६
पूरा पढ्नुहोस्
प्रतिक्रिया
पठाउनुहोस्
×