ग्यास विक्रेता महासंघको अध्यक्षमा थापा- अर्थ / वाणिज्य - कान्तिपुर समाचार

ग्यास विक्रेता महासंघको अध्यक्षमा थापा

कान्तिपुर संवाददाता

काठमाडौँ — ग्याँस बिक्रेता महासंघ नेपालको अध्यक्षमा चन्द्रबहादुर थापा चयन भएका छन् । शनिबार भएको ९ औं साधारण सभाबाट थापा अध्यक्ष पदमा निर्विरोध चयन भएका हुन् । यसअघि थापा दुई कार्याकाल वरिष्ठ उपाध्यक्ष थिए ।

महासंघको विधान अनुसार वरिष्ठ उपाध्यक्ष स्वत: अध्यक्ष हुने प्रावधान छ । सोही अनुसार उनी अध्यक्ष बनेका हुन् । त्यस्तै, महासंघको वरिष्ठ उपाध्यक्षमा विष्णुप्रसाद दुलाल, उपाध्यक्षमा नारायण पौडेल, रामप्रसाद ज्ञवाली, विमला श्रेष्ठ, देविलाल गैरे र गेहेन्द्रसाद रिजाल चयन भएका छन् । महासचिवमा लालबहादुर केसी, सचिवमा राजेश दाहाल, कोषाध्यक्षमा रविन कार्की र सहकोषाध्यक्षमा राधिका महर्जन चयन भएका छन् । अध्यक्ष थापाले ग्याँस क्षेत्रलाई व्यवस्थित बनाउन एलपी ग्याँस विक्रेता प्रमाणीकरणामा जोड दिने बताए । ‘ग्याँस विक्रेता प्रमाणीकरणबिना ग्याँस क्षेत्र व्यवस्थित हुन सक्दैन् । उद्योग वाणिज्य तथा आपूर्ति मन्त्रालय, नेपाल आयल निगम र एलपी ग्याँस उद्योग सघसँग सहकार्य गर्दै अभियानकै रूपमा अगाडी बढाउछौँ,’ थापाले भने ।

प्रकाशित : आश्विन ९, २०७९ २१:०२
प्रतिक्रिया
पठाउनुहोस्

पर्वतमा करातेका लागि पूर्वाधार तयारी

अगन्धर तिवारी

पर्वत — यही असोज २८ देखि कात्तिक २ सम्म आयोजना हुने नवौं राष्ट्रिय खेलकुद अन्तर्गत सञ्चालन हुने कराते प्रतियोगिताका खेलहरू पहिलोपटक पर्वतमा गरिने भएको छ । राष्ट्रिय खेलकुद परिषद्‍ (राखेप) ले यस्तो निर्णय गरेको छ ।

राखेपको निर्णयसँगै हौसिएका पर्वतका खेलप्रेमीहरू उक्त प्रतियोगिताको तयारीमा जुटिसकेका छन् । आइतबार पर्वतको कुश्मामा पत्रकार सम्मेलन गरेर आयोजकले उक्त प्रतियोगिताका लागि आवश्यक पूर्वाधार निर्माण तथा अन्य तयारी थालिएको जानकारी दिएको छ ।

गण्डकी प्रदेशमा आयोजना हुन लागेको नवौं राष्ट्रिय खेलकुद प्रतियोगिता अन्तर्गत कराते खेलको प्रतिस्पर्धा पर्वतमा गराइने भएको हो । जिल्ला खेलकुद विकास समिति पर्वतले पत्रकार सम्मेलन गर्दै पर्वतमा आयोजना हुने करातेको राष्ट्रिय प्रतिस्पर्धाको बारेमा जानकारी गराएको हो ।

‘एकताबद्ध देश, खेलकुदको सन्देश’ नारासहित उक्त प्रतियोगिता गर्न लागिएको हो । उक्त प्रतियोगितामा सात प्रदेशका सात वटा टोली, विभागीय टीम अन्तर्गत नेपाली सेना, सशस्त्र प्रहरी र नेपाल प्रहरीको टोली तथा एनआरएनको एक टोलीसमेत गरी ११ टोलीका खेलाडीहरू पर्वतमा भिड्ने छन् ।

आयोजकका अनुसार एउटा टोलीमा ३२ जना खेलाडीका दरले तीन सय ५२ जना खेलाडी करिब एक साता पर्वतमा रहनेछन् । त्यस्तै एक टोलीमा दुई जना कोच र दुई व्यवस्थापकसमेत गरी ४४ जना, देश तथा विदेशबाट आउने निर्णायकहरू ७५ जना, व्यवस्थापनको लागि स्थानीयबाट लिइने २५ जनासहित प्रविधिक र अन्य जनशक्ति गरी करिब ६ सय जनाको सहभागिता रहने आयोजकमध्येका नेपाल कराते महासंघका अध्यक्ष दावा गुरुङले बताए ।

प्रति खेलाडीले प्रति दिन दुई हजार रुपैयाँका दरले भत्ता पाउने र बाटो खर्चको व्यस्थापन गरिएको गुरुङले जानकारी दिए । ‘हामीले पाँच दिनमा करातेको संस्करण पूरा गर्ने गरी तयारी गरिरहेका छौं,’ उनले भने, ‘खेलहरू तीन दिनमा नै सकिनुपर्ने हो । सबै व्यवस्थापन मिलाउँदा दुई दिन ढिला हुनसक्छ ।’

खेलको अगाडि र पछाडिको दिन पनि खेल दिनमा समावेश हुने भएकोले पाँच दिन समय राखिएको अध्यक्ष गुरुङले बताए । विश्वका विभिन्न देशमा बेला बेलामा भइरहने प्रतियोगिताहरूमा कराते खेलले सबैभन्दा बढी पदक ल्याएको भन्दै उनले आगामी दिनमा पनि करातेले विभिन्न प्रतियोगिताहरूमा मुलुकलाई चिनाउन भूमिका खेल्ले बताए ।

पर्वत जिल्लाका कराँते संयोजक राम श्रेष्ठका अनुसार खेलको तयारी स्वरूप अहिले कुश्माको बडागाउँस्थित सेमी कभर्ड हलमा करातेको प्रतिस्पर्धा हुनेछ । अहिले खेल हुने स्थान आसपासको व्यवस्थापन गर्ने, सरसफाइ गर्ने लगायत कामहरू भइरहेको उनले बताए ।

‘पर्वतमा राष्ट्रिय प्रतियोगिता हुनु आफैंमा गौरवको कुरा हो,’ उनले भने, ‘त्यसका लागि हामीले स्थानीयस्तरबाट आफ्नो तयारी गरिरहेका छौं । स्पट व्यवस्थापनका लागि आवश्यकता अनुसार ईञ्जिनियरको टोली पनि आउनेछ ।’ प्रतियोगिता सफल पार्न, खेलाडीहरूलाई पर्वतको पर्यटन झल्किने मायाको चिनो दिने, स्थानीय पर्यटकीय स्थलहरूको अवलोकन गराउने लगायत विषयमा स्थानीय पालिकाहरूसँग पनि छलफल भइरहेको उनले बताए ।

प्रकाशित : आश्विन ९, २०७९ २१:०१
पूरा पढ्नुहोस्
प्रतिक्रिया
पठाउनुहोस्
×