काठमाडौँ — उद्योगी अरुण राठीले विराटनगरमा ट्रान्जिट प्वाइन्ट नहुँदा बन्दरगाहाबाट आउने सामान सिधै आउन नसकेको बताएका छन् ।
कान्तिपुर मिडिया ग्रुपद्वारा आयोजित उज्यालो पूर्व कार्यक्रम अन्तर्गत 'पूर्वको पौरख' सत्रमा बोल्दै राठी ग्रुपका निर्देशक अरुण राठीले विराटनगरमा पहिलो उद्योग स्थापना भए पनि ट्रान्जिट प्वाइन्टको हिसाबले वीरगन्जमा रेल गुडेपछि सामानहरू सस्तो भएको बताए ।
उनले विराटनगरमा बन्दरगाहाबाट सिधै सामान नआउने र वीरगन्जमा आउने भएकाले आन्तरिक कारणले वीराटनगर पछि परेको उनको भनाइ थियो ।
यस्तै, नेपालका उद्योगहरूमा बाहिरबाट कच्चा पदार्थ ल्याउने र त्यसलाई भ्यालु एडिसन गरेर सामान उत्पादन गर्ने किसिमको काम मात्रै भएको उनले बताए । अन्तर्राष्ट्रिय बजारमा कस्तो उत्पादन बढाएर प्रतिस्पर्धा गर्ने भन्ने सम्बन्धमा उत्पादनहरू कम भएको पनि उनको भनाइ छ ।
'विरानटगरका व्यापारीलाई कसरी स्याउ र अलैंची उत्पादन गर्ने ठाउँमा लैजाने भन्ने क्षेत्रमा लगेर हामीले प्रोत्साहन गर्न सकेको छैनौं,' उनले भने, 'हाम्रोमा खाली कपी पेस्ट उद्योग हुन्छ । एक जमनामा एउटाले बनाएको हुन्छ ऊ सफल हुन्छ । उसैको सिको गरेर त्यही क्षेत्रमा हात हल्दा सफलता हासिल नभएकाहरू छन् । '
यस्तै विराटनगरमा जग्गा महँगो भएका कारण वीरगन्जमा उद्योगहरु सिफ्ट भएको पनि उनले बताए । 'एक वर्षमा उत्पादन गर्ने सामानहरु भारत र चीनका उद्योगहरुले २ घन्टामा उत्पादन गर्छन् । ती मुलुकमा हुने उत्पादन क्वालिटी र ब्रान्डिङ धेरै नै हुन्छ,' उनले भने, 'हामी भारत र चीनका उद्योगहरुसँग प्रतिस्पर्धा गरेर काम गरिरहेका छौं । यो धेरै राम्रो हो,' उनले भने ।
साथै सानो मार्केटका बाबजुद ब्रान्डिङ र गुणस्तर कायम गरेर नेपाली उद्योगहरु टिकिरहेको उनको भनाइ थियो ।
प्रकाशित : आश्विन ८, २०७९ १६:१९
