सुपारी निर्यातकर्ताले लिए रिट फिर्ता- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

सुपारी निर्यातकर्ताले लिए रिट फिर्ता

विपक्षीमाथिको दाबी प्रमाणित गर्न नसक्ने उल्लेख
बरामद ८ ट्रक सुपारीको अनुसन्धानमा अझै अलमल
देवनारायण साह

मोरङ — राजस्व अनुसन्धान कार्यालयले विराटनगरबाट बरामद आठ ट्रक सुपारीको अनुसन्धान सुरु गरेपछि सुपारी निर्यातकर्ताले उच्च अदालत विराटनगरमा दायर गरेको रिट निवेदन फिर्ता लिएका छन् ।

सुपारी निर्यातकर्ता मनकामना ट्रेडर्स विराटनगर–९ का सञ्चालक नवीन घिमिरेले उच्च अदालतमा साउन २६ मा सुपारी तत्काल छाड्न र भारतको जोगबनी भन्सार कार्यालयले लगाएको सिल यथास्थितिमा राख्न उत्प्रेषण, परमादेश र प्रतिषेधको मागसहित रिट दायर गरेका थिए । रिटमा राजस्व अनुसन्धान कार्यालय इटहरी, विराटनगर भन्सार कार्यालय, भन्सार विभाग र जिल्ला प्रहरी मोरङलाई विपक्षी बनाइएको थियो । तर, विपक्षीमाथिको दाबी प्रमाणित गर्न नसक्ने उल्लेख गर्दै घिमिरेले रिट फिर्ताको निवेदन दिएका हुन् ।

उच्च अदालत विराटनगरका न्यायाधीशद्वय राजनप्रसाद भट्टाई र मुरारीबाबु श्रेष्ठको संयुक्त इजलासले मंगलबार रिट निवेदन फिर्ताको आदेश दिएको हो । विपक्षीहरूले रिट खारेजीको माग गर्दै जवाफ पेस गरेको आदेशमा भनिएको छ । यसअघि उच्च अदालत विराटनगरका कायममुकायम मुख्य न्यायाधीश सत्यमोहन जोशी थारू र न्यायाधीश किरणकुमारी गुप्ताको संयुक्त इजलासले भदौ २ मा उक्त सुपारी छाड्न अन्तरिम आदेश दिन नमिल्ने आदेश दिएका थिए । उच्च अदालतले साउन २९ मा ट्रकको सिलबन्दी यथास्थितिमा राख्न दिएको आदेशलाई निरन्तरता दिइरहनु नपर्नेसमेत आदेश गरेको थियो । ‘उक्त ८ ट्रक सुपारी निर्यातका लागि नेपाल उद्योग वाणिज्य संघ झापाले उत्पत्तिको प्रमाण पत्र दिएको भनिएकोमा नेपालको उत्पादित हो कि होइन, उक्त परीक्षण गर्ने विज्ञ र परीक्षण गर्ने आधिकारिक निकायबाट खरिद बिक्री ताका प्राविधिक रूपमा परीक्षण गरे भएको मिसिल कागजातबाट देखिएन,’ आदेशमा भनिएको थियो । सरकारको आधिकारिक निकायको परीक्षण प्रतिवेदन संलग्न नरहेको अवस्थामा विराटनगर भन्सारले पनि आधिकारीक परीक्षण गराएको नदेखिएको आदेशमा उल्लेख थियो ।

राजस्व अनुसन्धान कार्यालय इटहरीले उक्त सुपारीको जाँचबुझ अनुसन्धान कारबाही भइरहेको कागजातबाट देखिएकाले ट्रकमा गरिएको सिलबन्दी नतोडिएमा र यथास्थितिमै उक्त ट्रकको मालबस्तु छाडी निर्यात गर्न दिएमा अनुसन्धान कारबाही प्रभावित हुने र कारबाही अपूर्ण हुन जाने आदेशमा जनाइएको छ । उच्च अदालतले सुपारीको डीएनए परीक्षण गराएर नेपालको उत्पादित हो होइन जाँच गराउने अवस्था आएपछि अन्तिम सुनुवाइ हुनुअगाडि नै घिमिरेले रिट फिर्ता लिएका हुन् ।

घिमिरे सञ्चालक रहेको मनकामना ट्रेडर्सले भारतको आइसा एक्सपोर्ट कोलकातालाई बिक्री गरेको ८ करोड ६३ लाख रुपैयाँ मूल्य बराबरको २ लाख १९ हजार ५ सय ९६ किलो सुपारी लोड भएको ८ वटा ट्रक प्रहरीे नियन्त्रणमा लिएको थियो । ट्रकका चालक र सहचालक गरी ८ जनालाई प्रहरीले रानीबाट साउन ५ मा नियन्त्रणमा लिएर कारबाहीका लागि साउन ७ मा राजस्व अनुसन्धान कार्यालयमा बुझाएको थियो । उक्त सुपारी एकीकृत भन्सार जाँच चौकी विराटनगरबाट जाँच पास भएर भारतको जोगबनी एकीकृत भन्सारले समेत पास गरी री–रुट गरेर भारत लग्ने क्रममा प्रहरीले नियन्त्रणमा लिएर राजस्व अनुसन्धान कार्यालयलाई बुझाएको थियो । इन्डोनेसियाबाट आयात भएको उक्त सुपारी कागजी प्रक्रिया मिलाएर भारत निर्यात गर्न लागेको भनेर स्थानीय व्यापारी तथा राष्ट्रिय सभाको दिगो विकास तथा सुशासन समितिका सदस्य रमेशजंग रायमाझीले स्थानीय प्रहरीलाई दबाब दिएपछि नियन्त्रणमा लिएर राजस्व अनुसन्धान कार्यालयमा पुर्‍याइएको थियो ।

विराटनगर भन्सार कार्यालयको तथ्यांकअनुसार इन्डोनेसियाको सुपारी थाइल्यान्ड र सिंगापुरको पोर्टबाट विराटनगरको ६ वटा व्यापारिक फर्मले गत आर्थिक वर्षमा ७५ करोड ४९ लाख ३२ हजार मूल्य बराबरको ५ हजार ७८४ दशमलव २६ मेट्रिकटन सुपारी आयात गरेको थियो । प्रहरीले पक्राउ गरेको ८ ट्रक सुपारीसहित ९० करोड ६७ लाख १८ हजार मूल्य बराबरको २२ लाख ४८ हजार ८ सय ५ किलो सुपारी भारत निर्यात भएको विराटनगर भन्सारको तथ्यांक छ । सुपारी आयात गर्नेमा सौर्य एयरलाइन्सका सञ्चालक झापाका दीपक पोखरेलको अम्बे ट्रेडिङ, विराटनगरका दिनेश राठीको राठी ट्रेडिङ, ग्लोबल विराट इन्टरनेसनल, विराटनगरका प्रदिप मुरारकाको पिके ट्रेडर्स, विराटनगरका मूलचन्द राठीको तिरुपति ट्रेड लिंक्स र विराटनगरकै सञ्जय अग्रवालको नेसनल मोटर्स छन् । सुपारी निर्यात गर्नेमा मनकामना ट्रेडर्स मात्रै छ ।

राष्ट्रिय सभाको दिगो विकास तथा सुशासन समितिले उक्त सुपारीको डीएनए परीक्षण गराउनुपर्ने निर्णय गरेको छ । तर समितिको निर्णय र उच्च अदालत विराटनगरले अनुसन्धानका लागि बाटो खुलाइदिँदासमेत उक्त सुपारीको हालसम्म प्रभावकारी रूपमा अनुसन्धान सुरु हुन नसकेको राजस्व अनुसन्धान कार्यालयका एक अधिकृतले बताए । अनुसन्धानको नाममा हालसम्म केही ठाउँ सामान्य पत्राचारसमेत गरिएको उनको भनाइ छ । राजस्व अनुसन्धान कार्यालय इटहरीका प्रमुख अनुसन्धान अधिकृत तीर्थराज खनालले अनुसन्धानका लागि केही पत्राचार गरिएको स्विकारे । उनले उच्च अदालतको आदेश कार्यालयमा आइनसकेकाले यसबारेमा तत्काल केही भन्न नसक्ने बताए । राजस्व अनुसन्धान विभागका महानिर्देशक झलकराम अधिकारीले सुरुदेखि नै बरामद सुपारी भारत निर्यात भइसकेकाले यसलाई छुनसमेत नमिल्ने बताउँदै आएका छन् ।

प्रकाशित : आश्विन ६, २०७९ ०७:०५
प्रतिक्रिया
पठाउनुहोस्

लगनखेलमा च्याम्पियन बनेको त्यही टिम

नेपाली टिमलाई फाइनलमा हराएर लगनखेलमा ७ वर्षअघि एएफसी यू–१४ गर्ल्स रिजनल च्याम्पियन भएको बंगलादेशी टिम उमेर समूहमा निरन्तर सहभागिता र सफलतापछि साफ च्याम्पियन बनको हो
राजु घिसिङ

काठमाडौँ — महिला फुटबललाई दक्षिण एसियाली खेलकुद (साग) मा पहिलोपल्ट सन् २०१० मा समावेश गरिएको थियो, जुन क्षेत्रीयस्तरमा महिला फुटबलको प्रवेश थियो । ढाकामा भएको ११ औं सागपछि त्यही वर्ष बंगलादेशकै कक्स–बजारमा साफ (दक्षिण एसियाली फुटबल महासंघ) महिला च्याम्पियनसिपको पहिलो संस्करण आयोजना गरियो । त्यसैले दक्षिण एसियाली स्तरमा महिला फुटबलको प्रतियोगिता सुरु भएको १२ वर्षमात्रै हुँदै छ ।‍

सिनियर टिमको प्रतियोगितामा १२ वर्षमा भारतको एकछत्र राज रह्यो । नेपालको छवि उपविजेताको बन्यो । भारतले पाँचपल्ट साफ च्याम्पियनसिप जित्दा नेपाल चारपल्ट फाइनलमा रोकियो । भारतले तीनपल्ट सागको स्वर्ण पदक जित्दा नेपाल तीनैपल्ट रजतमा सीमित भयो । त्यसैले इतिहासले देखाउँछ कि १२ वर्ष दक्षिण एसियाली महिला फुटबल भारत–नेपालको प्रतिस्पर्धामै सीमित रह्यो । भलै, बंगलादेशले साफ २०१६ को फाइनल खेलेको थियो, जुन बेला नेपाल सेमिफाइनलमा भारतसँग हारेको थियो ।

नेपाली उखानै छ नि १२ वर्षमा खोलो पनि फर्किन्छ । यसपालिको साफ महिला च्याम्पियनसिपमा त्यस्तै भयो । बंगलादेशले समूह चरणको अन्तिम खेलमा ३–० को एकतर्फी जित निकाल्दै च्याम्पियनसिपमा भारतको अपराजित यात्रालाई २५ खेलमा टुंग्याएन मात्रै सोमबार फाइनलमा नेपाललाई ३–१ ले हराएर ऐतिहासिक उपाधि पनि जित्यो । बंगलादेशले भारत र नेपाली टिमलाई पहिलोपल्ट पराजित भएको हो । नेपाली टिम दक्षिण एसियाली प्रतियोगितामा भारतबाहेक अरु टिमसँग हारेको पनि यो नै पहिलोपल्ट हो । बंगलादेश सिलिगुढी (सन् २०१६) को साफमा आयोजक भारतलाई गोलरहित रोक्दै समूह विजेता भएको थियो, जसको फाइनलमा भने भारतसँग हारेको थियो । तीन वर्षअघिसम्म पनि उसलाई भारत र नेपालले चुनौती दिनसक्ने प्रतिस्पर्धी मानेको थिएन । दोस्रो फाइनलमै ट्रफी कब्जा गर्दै बंगलादेशले दक्षिण एसियाली महिला फुटबलमा १२ वर्षपछि खोलो फर्काइदियो ।

कुनै बेला छोरीले फुटबल खेल्यो भनेर आलोचित समाजमा पहिलो उपाधि जितेपछि बंगलादेशी खेलाडीहरूलाई बुधबार ढाका फर्केपछि भव्य स्वागत गर्दै सजिसजाउ बस चढाएर सहरमा र्‍याली नै गर्‍यो । इस्लाम धर्मालम्बीको बाहुल्य रहेको १८ करोड जनसंख्याको देशले अहिले महिला टिम साफ च्याम्पियन भएकोमा खुसी मनाइरहेको छ, गर्व गरिरहेको छ, एउटा प्रतियोगिताको उपाधि जितेभन्दा धेरै नै ठूलो उपलब्धि महसुस गरिरहेको छ । बंगलादेश फुटबल महासंघ (बीएफएफ) र बंगलादेश क्रिकेट बोर्ड (बीसीबी) ले ५०–५० लाख टाका (रु.१ करोड २३ लाख १४ हजार) पुरस्कार दिने घोषणा गरेका छन् । साफकै उत्कृष्ट गोलकिपर रुपना चकमाका लागि घर बनाइदिन प्रधानमन्त्री शेख हसिनाले निर्देशन दिएकी छन् । प्रधानमन्त्री हसिना अमेरिकाबाट फर्केपछि टिमका लागि नगद पुरस्कार घोषणा गर्ने अपेक्षा गरिएको छ ।

महाभूकम्पले बदलेको भाग्य

दशरथ रंगशालाको मैदान झरीमा हिलाम्मे हुदाँ पनि सुन्दर खेल पस्किएको बंगलादेशको यो सफलताको खाका ७ वर्षअघि लगनखेलमा कोरिएको थियो । नेपाली सेनाको शारीरिक तालिम तथा खेलकुद प्रशिक्षण केन्द्रस्थित मैदानमा २० डिसेम्बर २०१५ मा भएको फाइनलमा नेपाललाई १–० ले हराएर बंगलादेश एएफसी यू–१४ गर्ल्स रिजनल (दक्षिण तथा मध्य एसिया) च्याम्पियनसिपको उपाधि जितेको थियो । खासमा उक्त फाइनल अप्रिल २५ मा दशरथ रंगशालामा तोकिएको थियो । तर, फाइनलको दुई घन्टाअघि ९ हजार बढीको ज्यान लिएको महाभूकम्प आएपछि उपाधि होड आठ महिनापछि भएको थियो ।

लगनखेलमा मर्जियाले १६ औं मिनेटमा गोल गरेपछि बंगलादेशले महिला फुटबलकै पहिलो उपाधि उचालेको थियो । त्यो टिमकी कप्तान थिइन्, कृष्णरानी सरकार । उनकै दुई गोलको सहयोगमा नेपाललाई हराएर बंगलादेश सिनियर टिमको साफमा नयाँ च्याम्पियन भएको हो । मार्जिया र कृष्णरानीसहित यू–१४ च्याम्पियन टिमका आठ खेलाडी छैटौं साफको पनि विजेता बनेका छन् । त्यसपछि बंगलादेशले लगातार उमेर समूहको प्रतियोगिता खेल्यो, सिनियर टिमलाई पनि नियमित प्रशिक्षण गराएर प्रतिस्पर्धामा उतारिरह्यो ।

उमेर समूहमा शृंखलाबद्ध सफलता

बंगलादेशले २०१६ मा डुसान्बे (ताजकिस्तान) को फाइनलमा भारतलाई ४–० ले हराएर यू–१४ च्याम्पियनसिपको उपाधि रक्षा गरेको थियो । ढाकामा भएको छनोटमा शक्तिशाली चाइनिज ताइपेईलाई पनि पराजित गरेर बंगलादेश पहिलोपल्ट एएफसी यू–१६ वुमेन्स च्याम्पियनसिप (२०१७) को फाइनल चरणमा पुगेको थियो । ढाकामा २०१७ मा भएको साफ यू–१५ च्याम्पियनसिपमा भारतलाई १–० ले हराएर अपराजित रहँदै च्याम्पियन भएको थियो । त्यसक्रममा उसले नेपाललाई ६–० ले हराएको थियो । यो उमेर समूहको प्रतियोगितामा बंगलादेशले नेपाललाई २०१८ मा ३–० र २०१९ मा २–१ ले परािजत गर्‍यो ।

बंगलादेश हङकङमा जकी क्लब अन्तर्राष्ट्रिय युवा प्रतियोगिता (२०१८) मा अपराजित रहँदै उपाधि जित्यो । थिम्पुमा नेपाललाई १–० ले हराएर साफ यू–१८ च्याम्पियन (२०१८) बन्यो । फाइनलमा गोल गरेकी मसुरा परविन अहिलेको साफ च्याम्पियन टिमकी भरपर्दा डिफेन्डर हुन् । त्यति बेला समूह चरणको भेटमा बंगलादेश २–१ ले विजयी भएको थियो । आफ्नै देशमा भएको बंगमाता यू–१९ प्रतियोगिता (२०१९) मा संयुक्त विजेता भएको बगलादेशले साफ यू–१९ च्याम्पियन (२०२१) पनि बन्यो ।

महिला फुटबलमा अस्ट्रेलिया विश्वकै राम्रो टिममा पर्दछ । त्यही अस्ट्रेलियाली युवा टिमलाई बराबरीमा रोक्दै बंगलादेशले एएफसी यू–१६ वुमेन्स च्याम्पियनसिप २०१९ मा तहल्का मच्चाएको थियो । तोहुरा खातुनको दुई गोलमा दुईपल्ट अग्रता लिएको खेल २–२ भएको थियो । तोहुरा साफको फाइनलमा ‘बेन्च’ मा थिइन् । यसरी निखारिँदै बनेको बंगलादेशको सिनियर टिमले तीन महिनाअघि ढाकामा भएको अन्तर्राष्ट्रिय मैत्रीपूर्ण खेलमा मलेसियालाई ६–० ले हराएको थियो । त्यसैले बंगलादेशले समूह चरणमा माल्दिभ्सलाई ३–०, पाकिस्तानलाई ६–०, भारतलाई ३–०, सेमिफाइनलमा भुटानमाथि ८–० र फाइनलमा नेपालविरुद्ध ३–१ को जित अस्वभाविक होइन । बरू बंगलादेशले ७ वर्षअघि बनाएको योजना र त्यसपछि गरेको मिहिनेतको प्रतिफल हो यो सफलता ।

युवा टिम, अनुभवी प्रशिक्षक

बंगलादेशी महिला टिमले पहिलो अन्तर्राष्ट्रिय खेलमा नेपालको सामना गरेको थियो । त्यो ११ औं सागमा नेपालले १–० को जित हात पारेको थियो । बंगलादेशविरुद्धको अपराजित यात्रालाई नवौं खेलसम्म डोर्‍याउन नसक्दा नेपाली टिम घरेलु मैदानमा १५ हजार बढी दर्शकसामु पहिलो उपाधि जित्न असफल भएको हो । यो साफमा सर्वाधिक गोलकर्ता र सर्वोत्कृष्ट खेलाडीको अवार्ड जितेकी कप्तान सविना खातुन बंगलादेशी टिमकी अनुभवी खेलाडी हुन् । २८ वर्षीया उनले सबै साफ (६ वटा) खेलेकी छन् । २३ सदस्यीय टिमका अरू खेलाडी १७ देखि २१ वर्षसम्मका छन् ।

बंगलादेशमा महिला फुटबलको प्रतियोगिता सन् २००४ मा मात्रै सुरु भएको थियो । उमेर समूहको टिमले अर्को वर्षदेखि र सिनियर टिमले २०१० देखि प्रतिस्पर्धा गर्न थालेको थियो । अहिलेको युवा टिमलाई ९० मिनेट नै राम्रो टिम–वर्कसहित तीव्र गतिमा सुन्दर खेल्ने कौशल भर्ने काम गरेका हुन् प्रशिक्षक गोलाम रब्बानी छोटनले । सन् २००९ देखि नै महिला टिमसँग कार्यरत उनले पहिलो साफ २०१० देखि राष्ट्रिय टिमको मुख्य प्रशिक्षकको जिम्मेवारी सम्हालेका हुन् । उमेर समूहका टिम पनि उनैले सम्हाल्दै आएका छन् । लगनखेलमा यू–१४ च्याम्पियन टिम पनि सम्हालेका उनलाई १३ वर्षयता बीएफएफले गरेको विश्वास, महिला फुटबलमा गरेको लगानी र समाज बदल्ने खेलाडीको मिहिनेतमा बंगलादेश साफ च्याम्पियन भएको हो । यसलाई सफलताको सुरुआत मानिएको छ ।

प्रकाशित : आश्विन ६, २०७९ ०७:०१
पूरा पढ्नुहोस्
प्रतिक्रिया
पठाउनुहोस्
×