१८.१२°C काठमाडौं
काठमाडौंमा वायुको गुणस्तर: १२४

खुल्यो दसैंलाई बसको टिकट

ठाउँ–ठाउँका सडक बिग्रिए पनि मर्मतमा ढिलासुस्ती
विमल खतिवडा

काठमाडौँ — दसैंका लागि गाडीको अग्रिम टिकट बुकिङ खुलाइएको छ । टिकट बुकिङका लागि शनिबार बिहानैबाट नयाँ बसपार्क, कलंकी, कोटेश्वर, गौशाला, चाबहिललगायत स्थानका काउन्टरमा यात्रुको भीड लागेको यातायात व्यवसायीको भनाइ छ ।

खुल्यो दसैंलाई बसको टिकट

नयाँ बसपार्कमा अन्यत्रभन्दा यात्रुको चाप बढी रहेको नेपाल यातायात व्यवसायी राष्ट्रिय महासंघका अध्यक्ष विजय स्वाँरले जनाए । ‘अन्य ठाउँका काउन्टरमा भने भीड कम थियो,’ उनले भने । सडक मर्मत नभएकाले यात्रुलाई गन्तव्यसम्म पुर्‍याउन भने समस्या हुने उनको भनाइ छ । ‘यस सम्बन्धमा आइतबार भौतिक पूर्वाधार तथा यातायातमन्त्री, सडक विभागलगायतका सरोकारवाला निकायसँग छलफल गरेर सडक मर्मतलाई तीव्रता दिन आग्रह गर्छौं,’ उनले भने । अहिले पानी परिरहेकाले सडक बिग्रिएर पूर्व–पश्चिमका विभिन्न स्थानबाट काठमाडौं आउन समस्या भइरहेको उनको भनाइ छ ।

पहिलो दिन शनिबार ७ हजार यात्रुले टिकट काटेको नयाँ बसपार्क सञ्चालन गर्दै आएको ल्होत्से बहुउद्देश्यीय प्रालिका महाप्रबन्धक सुनील कुँवरले जनाए । ‘विगतका वर्षको तुलनामा यो संख्या कम हो,’ उनले भने, ‘अहिले निजी सवारी र रिजर्भमा दसैंमा घर जाने धेरै हुन्छन् ।’ दसैंमा गाडी अभाव हुन नदिन पूर्व र पश्चिम रुटका लागि नयाँ गाडी थप्ने तयारी भइरहेको उनको भनाइ छ । ‘घटस्थापनाबाट घर जाने यात्रुको चाप बढी हुन्छ,’ उनले भने, ‘त्यसैले पहिल्यै तयारीस्वरूप गाडी थप गर्न लागिएको हो ।’

यातायात व्यवस्था विभागले यात्रुवाहक सवारीलाई घटस्थापनादेखि पूर्णिमासम्म नेपालभर लागू हुने गरी रुट परमिट खुलाउने निर्णय गत भदौ २२ मा गरिसकेको छ । अनधिकृत काउन्टर र परिचयपत्र नभएका व्यक्तिहरूबाट टिकट नलिनसमेत विभागको आग्रह छ । दसैंका बेलामा यात्रु ठगिने भएकाले त्यसलाई दृष्टिगत गरी केही दिनभित्र यात्रुको चाप हुने स्थानमा सहायता कक्ष राखिने विभागले जनाएको छ । दसै नजिकिँदै गर्दा केही राजमार्ग भने पहिरोले गर्दा लामो समयदेखि अवरुद्ध छन् । बालाजु–त्रिशूली–धुन्चे स्याफ्रुबेंसी र डुम्रे–बेंसीसहर–चामे सडक अवरुद्ध छन् । बाजुराको साँफेबगर–मार्तडी–कोल्टी सडकअन्तर्गत अम्कोट–बल्दे खण्ड साउन १८ देखि अवरुद्ध छ । सिद्धार्थ राजमार्गअन्तर्गत हिउँदे खोलानजिकै सडक भासिएपछि यातायात अझै ठप्प छ । दसैंअघि राष्ट्रिय राजमार्गका सबै सडक मर्मत गरिसक्ने सडक विभागको दाबी छ । बाढीपहिरोले अवरुद्ध राजमार्गसमेत दसैंअघि सञ्चालनमा ल्याउने गरी मर्मत थालिएको सडक विभागका महानिर्देशक अर्जुनजंग थापाले जनाए ।

तस्बिरहरू : केशव थापा

‘आयोजना कार्यालयहरूलाई सडक मर्मत गरेर दसैंमा सहज रूपमा सवारी सञ्चालन गर्ने वातावरण बनाउन निर्देशन दिइसकेका छौं,’ उनले भने । अवरुद्ध सडक खुलाउने काम पनि तीव्र पारिएको उनको दाबी छ ।

प्रकाशित : आश्विन २, २०७९ ०६:४५
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?