एक दिन बढ्दा ४ दिन घट्यो सेयर बजार - अर्थ / वाणिज्य - कान्तिपुर समाचार

एक दिन बढ्दा ४ दिन घट्यो सेयर बजार 

कान्तिपुर संवाददाता

काठमाडौँ — यो साता सेयर बजारको परिसूचक नेप्से समग्रमा ७६ अंक घटेको छ । गत साता २११३ अंकमा रहेको नेप्से यो साता २०३७ अंकमा रहेर बन्द भयो । नेप्से एक दिन बढ्दा ४ दिन घटेको छ ।

साताको पहिलो दिन आइतबार परिसूचक नेप्से १०.२७ अंक बढ्यो । सो अंकको वृद्धिपछि नेप्से २१२३ अंकमा पुगेको थियो । दोस्रो दिन सोमबार फेरि नेप्से १७. ६७ अंक घटेर २१०६ अंकमा झऱ्यो । मंगलबार ४३.३५ अंक घट्यो भने बुधबार थप ५.११ अंक घटेपछि नेप्से २०५७ अंकमा ओर्लियो । बिहीबार १९ अंक घटेसँगै यो साता २०३७ अंकमा नेप्से अडियो । शुक्रबार भने सार्वजनिक विदाका कारण काराेबार भएन ।

नेप्सेसँगै कारोबार रकम साताको पछिल्ला दिनमा उच्च दरले घट्यो । आइतबार २ अर्ब ६७ करोड रुपैयाँको सेयर कारोबार भएकोमा सोमबार २ अर्ब ८५ करोड र मंगलबार २ अर्ब ८१ करोड रुपैयाँको कारोबार भयो । बुधबार १ अर्ब ९३ करोडमा झरेको कारोबार बिहीबार १ अर्ब ७६ करोडमा खुम्चियो । कारोबार रकम घट्नुले सेयर खरिदमा लगानीकर्ताको उत्साह नरहेको र बेच्नेहरु पनि धेरै नआत्तिएको संकेत गर्छ । यो साता कारोबार रकमका आधारमा शिवम् सिमेन्ट, हिमालयन डिस्टिलरी, नबिल बैंक, हिमालयन एभरेष्ट इन्स्योरेन्स तथा नागरिक लगानी कोष अगाडि रहे ।


प्रकाशित : श्रावण २७, २०७९ १७:१५
प्रतिक्रिया
पठाउनुहोस्

उपभोक्तालाई ठगी गरेको भन्दै विराटनगरमा फार्मेसीविरुद्ध उजुरी

कान्तिपुर संवाददाता

विराटनगर — यहाँको जलजला मोडमा रहेको अटल फार्मेसीले उपभोक्तालाई ठगी गरेको भन्दै कारबाहीका लागि वाणिज्य आपूर्ति तथा उपभोक्ता संरक्षण कार्यालयमा उजुरी परेको छ ।

फार्मेसीले मधुमेहका बिरामीले प्रयोग गर्ने ह्युमन इन्सुलिन ३०/७० नामको खोप बिक्री गर्दा ३ सय ७४ रुपैयाँ बढी लिएको पाइएपछि पब्लिक फोरमले कारबाहीको माग गर्दै बिहीबार उजुरी दिएको हो ।

उक्त खोपको बजार मूल्य प्रतिखोप ६ सय २२ रुपैयाँ छ । तर अटलले ९ सय ९६ रुपैयाँमा बिक्री गरेको पुष्टि भएपछि कारबाहीका लागि वाणिज्य कार्यालयमा उजुरी गरिएको पब्लिक फोरमका अध्यक्ष उत्तम ढुंगेलले बताए ।

फार्मेसीले नेपाली एमआरपी लेखिएको औषधिलाई भारतीय एमआरपीमा जोडेर सर्वसाधारणलाई बिक्री गर्दै आएको पाइएको छ । ढुंगेलले भने, 'उपभोक्ता संरक्षण ऐन २०७५ र नियमावली २०७६ अनुसार कारबाहीको माग गर्दै उजुरी दिएका हौं ।'

प्रकाशित : श्रावण २७, २०७९ १६:४१
पूरा पढ्नुहोस्
प्रतिक्रिया
पठाउनुहोस्
x
×