एक सातामा बैंकहरूबाट बाहिरियो ४ अर्ब निक्षेप
काठमाडौँ — एक सातामा वाणिज्य बैंकहरूबाट ४ अर्ब रुपैयाँ निक्षेप घटेको छ । नेपाल बैंकर्स एसोसिएसनले सार्वजनिक गरेको तथ्यांकअनुसार साउन १३ देखि २० गतेसम्मको अवधिमा ४ अर्ब निक्षेप घटेको हो । साउन १३ गते कुल ४४ खर्ब ५० अर्ब रुपैयाँ निक्षेप संकलन भएकोमा २० गते ४४ खर्ब ४६ अर्बमा झरेको छ ।
साउनको २० दिनमा भने बैंकहरुको निक्षेप झण्डै १ खर्ब घटेको छ । असार मसान्तसम्म कुल ४५ खर्ब ४१ अर्ब रुपैयाँ निक्षेप संकलन भएको थियो । पछिल्लो एक सातामा कर्जा प्रवाह २ अर्ब बढेको छ । साउन १३ गतेसम्म कुल ४१ खर्ब ६४ अर्ब कर्जा प्रवाह भएकोमा २० गतेसम्म ४१ खर्ब ६६ अर्ब पुगेको छ । यद्यपि साउनको २० दिनमा भने कर्जा प्रवाह ९ अर्ब घटेको छ । असार मसान्तसम्म कुल कर्जा प्रवाह ४१ खर्ब ७५ अर्ब थियो ।