गण्डकी प्रदेशमा घरजग्गा रजिस्ट्रेसन तथा अंशबण्डा करमा हेरफेर- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

गण्डकी प्रदेशमा घरजग्गा रजिस्ट्रेसन तथा अंशबण्डा करमा हेरफेर

प्रतीक्षा काफ्ले

कास्की — घरजग्गा रजिस्ट्रेसन तथा अंशबण्डा करमा गण्डकी प्रदेश सरकारले सामान्य हेरफेर गरेको छ । प्रगतिशील करको सिद्धान्त अनुसार करमा सामान्य हेरफेर गरिएको अर्थ मन्त्रालयले जनाएको छ । प्रगतिशील करको सिद्धान्त बमोजिम ५ करोडभन्दा माथिको थैली अंकको हकमा साविकमा लाग्दै आएको १ प्रतिशत शुल्कमा ०.५ वृद्धि गरी १.५ प्रतिशत कायम गरिएको मन्त्रालयका प्रवक्ता वसन्तराज तिवारीले बताए ।


आर्थिक ऐन, २०७९ मा तीन पुस्ताभित्रको हकवालाबाहेक अन्यन्त्र हक हस्तान्तरण भई अप्रत्यासित रुपमा प्राप्त हुने यस्तो सम्पत्तिमा पनि तीन पुस्ताभित्रको हकवालामा हुने हक हस्तान्तरणसरह नै शुल्क राख्दा न्यायोचित नहुने भएकाले केही बढी शुल्क कायम गरिएको तिवारीले बताए । तीन पुस्ताभन्दा बाहिरबाट सम्पत्ति हक हस्तान्तरण विरलै हुने गरेकाले उक्त व्यवस्थाले तात्विक असर नपर्ने मन्त्रालयको भनाइ छ ।

आर्थिक ऐन २०७९ तथा अन्तरसरकारी वित्त व्यवस्थापन ऐन २०७४ बमोजिम प्रदेशमा ४० प्रतिशत र स्थानीय तहमा ६० प्रतिशत हिस्सा बाँडफाँट हुने घरजग्गा रजिस्ट्रेसन शुल्कको दर र दायरा निर्धारणको लागि कानुन बमोजिम निजी क्षेत्र समेतको प्रतिनिधित्व हुने गरी गठित प्रदेशस्तरीय राजस्व परामर्श समितिको सिफारिसका आधारमा प्रदेश सरकारले करका दर र दायरा निर्धारण गरेको मन्त्रालयद्वारा जारी विज्ञप्तिमा उल्लेख छ । गण्डकी प्रदेशसभाबाट पारित भई कार्यान्वयनमा आएको आर्थिक ऐन २०७९ मा उल्लेख घरजग्गा रजिस्ट्रेसन लगायतका सेवा शुल्कका सम्बन्धमा विभिन्न सञ्चार माध्यमबाट भइरहेको सूचना प्रवाहप्रति गम्भीर ध्यानाकर्षण भएको मन्त्रालयले जनाएको छ । यस्तै, अंशबण्डाका सम्बन्धमा सर्वसाधारणको अधिक कारोबार हुने १० लाखसम्मको थैली अंकमा साविकको व्यवस्था बमोजिम नै थैली अंकको ०.२ प्रतिशत शुल्क लाग्ने व्यवस्था कायमै राखिएको छ । घरजग्गाको राजीनामा, सट्टापट्टा, सगोलनामा, छोडपत्र, दर्ताफारी, दाखिला खारेज लगायतका अधिक कारोबार हुने विषयमा साविकको व्यवस्था नै कायम रहेको मन्त्रालयका प्रवक्ता तिवारीले बताए ।

गण्डकी प्रदेशमा आयात प्रतिस्थापना गर्नको लागि कृषि उत्पादन तथा उत्पादकत्व बढाउने कृषिजन्य उद्योग र रोजगारी सृजना गर्ने उत्पादनमूलक उद्योगलाई प्रवर्द्धन गर्न रजिस्ट्रेसन शुल्कमा छुट प्रदान गरिएको मन्त्रालयले जनाएको छ । त्यसैगरी उद्देश्यविपरित जग्गा प्रयोग भएको पाइएमा जरिवानाको समेत व्यवस्था गरिएको छ । यस व्यवस्थाबाट प्रदेशमा उत्पादनमूलक क्षेत्रमा लगानी अभिवृद्धि हुने अपेक्षासमेत गरिएको उपसचिव समेत रहेका तिवारी बताउँछन् । ‘करका दरलाई समयसापेक्ष बनाउनका लागि केही शीर्षकमा गरिएको सामान्य समायोजनले समग्रमा करको थपभार नपर्ने हुँदा यस विषयमा प्रदेश सरकार र अर्थ मन्त्रालय सचेत र जिम्मेवार छाैं’ जारी विज्ञप्तिमा भनिएको छ ।


प्रकाशित : श्रावण २२, २०७९ १७:५६
प्रतिक्रिया
पठाउनुहोस्

पूर्वी नवलपरासीबाट फेरि चुनाव लड्छु : नेता कोइराला

नारायण शर्मा

पूर्वी नवलपरासी — नेपाली कांग्रेसका नेता शशांक कोइरालाले आगामी मंसिरमा हुने निर्वाचनमा पूर्वी नवलपरासी १ मा उम्मेदवार बन्ने घोषणा गरेका छन् । यस क्षेत्रबाट लगातार ३ पटक निर्वाचन जितिसकेका कोइरालाले चौंथोपटक उम्मेदवार बन्ने आइतबार घोषणा गरेका हुन् । 

प्रेस यूनियनको केन्द्रीय महाधिवेशनबाट निर्वाचित पदाधिकारीलाई आइतबार कावासोतीमा आयोजित सम्मान कार्यक्रममा कोइरालाले जिल्लाको विकासका लागि चार योजना अघि सार्दै फेरि उम्मेदवारी दिने निर्णयमा पुगेको सुनाएका हुन् । उनले आफ्नो निर्वाचन क्षेत्रमा अन्तर्राष्ट्रियस्तरको खेलमैदान, ट्रमा सेन्टर, त्रिवेणीदेखि देवघाटसम्म नारायणीको किनारैकिनार पक्की सडक संजाल र विपन्नको जीवनस्तर उकास्न कृषि कार्याक्रम लागू गर्ने प्रतिबद्धता दोहोर्‍याएका छन् ।

'पूर्वी नवलपरासीलाई उत्कृष्ट जिल्ला बनाउन मैले अघि सारेका यी ४ वटा कुरा पुरा गर्न फेरि चौंथो पटक उम्मेदवारी दिने निर्णय गरेको छु,' कोइरालाले भने, 'नवलपरासीमा लागू गरिने यी योजनाबाट जिल्लाको कायापलट हुन्छ ।'

उनले बीपी अन्तर्राष्ट्रिय खेल मैदानका स्वदेशको बजेटले मात्रै अपुग हुने भएकोले छिमेकी देशका साथीहरुसँग यसबारे छलफल भइरहेको पनि दाबी गरे । 'यो परियोजना नेपाल सरकारको बजेटबाट मात्र सम्भव हुँदैन,' उनले भने, 'त्यसका लागि मेरा भारतीय मित्रहरुसँग कुरा गरेको छु ।' उक्त खेल मैदान निर्माणका लागि अर्थ मन्त्रालयले गैंडाकोट नगरपालिकामा प्रस्ताव गरेर बजेटसमेत विनियोजन गरेको छ ।

लगातार तीन पटकसम्म संघीय सांसदमा निर्वाचित सांसद कोइरालाले देखिने काम नगरेको भन्दै मतदाताले आलोचना भइरहँदा चौंथो पटक चुनाव लड्ने घोषणा गरेका हुन् । सरकारले आगामी मंसिर ४ गते एकै चरणमा प्रतिनिधिसभा र प्रदेशसभा निर्वाचन गर्न मिति तोकेको छ ।

प्रकाशित : श्रावण २२, २०७९ १७:४५
पूरा पढ्नुहोस्
प्रतिक्रिया
पठाउनुहोस्
x
×