अब सहकारीहरूले पनि एटीएम कार्ड दिने- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

अब सहकारीहरूले पनि एटीएम कार्ड दिने

एटीएम र पोस मेसिनमा सहकारीले दिने कोप कार्ड प्रयोग गर्न मिल्ने 
कान्तिपुर संवाददाता

काठमाडौँ — अबदेखि सहकारीहरुले पनि आफ्ना बचतकर्ता तथा सदस्यहरुलाई एटीएम कार्ड दिने भएका छन् । राष्ट्रिय सहकारी बैंकको २० औं स्थापना दिवसको अवसरमा आयोजित कार्यक्रममार्फत सहकारीहरुको कार्ड सेवा थालनी भएको छ । स्मार्टच्वाइस टेक्नोलोजिज (एससीटी), राष्ट्रिय सहकारी बैंक र ग्लोबल आईएमई बैंकको सहकार्यमा कार्ड सेवाको सुरुवात भएको हो ।

ग्लोबल आईएमई बैंकमार्फत 'युनियन पे'को कार्ड जारी भई राष्ट्रिय सहकारी बैंकमार्फत सहकारीहरुले प्रदान गर्नेछन् । यसमा पीएसओको रुपमा एससीटीले जिम्मेवारी लिएको छ । यसरी प्रदान हुने कार्ड अन्तर्राष्ट्रिय स्तरको चिपयुक्त हुने र कन्ट्याक्टलेस प्रविधिमा आधारित रहेको एससीटीले जनाएको छ । यो कार्ड नेपाल तथा भारतका एटीएम तथा पोस मेसिनमा प्रयोग गर्न सकिनेछ । राष्ट्रिय सहकारी बैंकका प्रमुख कार्यकारी अधिकृत बद्री कुमार गुरागाईंले यो सेवाले सहकारीहरुलाई विद्युतीय कारोबारका लागि थप सुविधा मिलेको र यसले सहकारीको सेवालाई डिजिटल बनाउने बताए ।

उनका अनुसार अब सहकारीहरुले सजिलै राष्ट्रिय सहकारी बैंकमा सम्पर्क गरी कोप कार्ड जारी गर्न सक्नेछन् । सहकारीहरुले आफ्ना सदस्य तथा बचतकर्तालाई कोप कार्ड वितरण गरेपछि सहकारीमा आबद्ध सदस्यहरुले जुनसुकै बेला जहाँबाट पनि एटीएममार्फत आफ्नो खाताको रकम निकाल्न पाउने छन् । साथै पोस मेसिनमा कार्डको प्रयोग गरी कुनै पनि सेवा वा वस्तु खरिदको भुक्तानी गर्न सक्ने छन् । यो सुविधापछि सहकारीमा खाता हुनेहरुलाई नगद अभाव झेल्नु नपर्ने सहकारी बैंकले जनाएको छ ।

कार्ड शुभारम्भ कार्यक्रमलाई सम्बोधन गर्दै भूमि, व्यवस्था, सहकारी तथा गरिबी निवारण मन्त्री शशी श्रेष्ठले सहकारी क्षेत्रको सहभागितामार्फत उपलब्ध साधन स्रोतको अधिकतम परिचालन गरी आर्थिक वृद्धि हासिल हुने बताइन् । दिगो आर्थिक विकास गर्दै शोषणरहित समाजको निर्माण गर्नु आजको आवश्यकता रहेको उनको भनाइ छ । त्यस्तै कार्यक्रममा ग्लोबल आइएमई बैंकका प्रमुख कार्यकारी अधिकृत रत्नराज बज्राचार्यले सहकारी क्षेत्रमा पनि बैंकले प्राविधिक रुपमा सहयोग गरिरहने प्रतिबद्धता जनाए । एससीटीका अध्यक्ष सुमन पोखरेलले विद्युतीय भुक्तानी प्रणालीमा जोडिँदा सहकारी संस्थाहरूको सेवा प्रभावकारी हुने बताए ।

प्रकाशित : श्रावण २२, २०७९ १६:२५
प्रतिक्रिया
पठाउनुहोस्

सांसद रिजालको प्रश्न- 'चोलेन्द्र त फर्केर नआउलान् तर लम्पट प्रवृत्तिबाट न्यायालय मुक्त हुन्छ कि हुँदैन ?

कान्तिपुर संवाददाता

काठमाडौँ — नेपाली कांग्रेसका सांसद एवं पूर्वमन्त्री मिनेन्द्र रिजालले न्यायालयमाथि प्रश्न उठाइरहँदा दलहरूले आफैंमाथि पनि समीक्षा गर्नुपर्ने बताएका छन् ।

रिजालले महाभियोगको प्रक्रियामाथि पनि असन्तुष्टि व्यक्त गरेका थिए । यस क्रममा संसदको विश्वसनीयतामाथि जनताले प्रश्न गर्दा आफूहरू जवाफदेही हुनुपर्ने उनको भनाइ थियो ।

चोलेन्द्र शमशेर जबरा एक प्रतिनिधि पात्र मात्रै भए पनि सिंगो न्यायालयको गलत प्रवृत्तिको अन्त्य गर्नुपर्ने आवश्यकता रहेको उनको भनाइ थियो । 'सक्दा धम्क्याउने, लेनदेन गर्ने र नसक्दा लम्पसार परेर टीका थाप्ने न्यायालयको नेतृत्वको प्रवृत्ति भएकै हो । यो प्रवृत्तिको अन्त्य हुनपर्छ,' सांसद रिजालले भने ।

तर न्यायालयमाथि प्रश्न गरिरहँदा दलहरूले आफैंमाथि पनि समीक्षा गर्नुपर्ने उनको भनाइ थियो । आइतबार प्रतिनिधिसभामा प्रधानन्यायाधीश चोलेन्द्र शमशेर जबरामाथिको महाभियोगबारे छलफलको क्रममा सांसद रिजालले यस्तो बताएका हुन् ।

संसदमा रिजालले सोधेका थिए, 'संसदमा बसेर न्यायालयमाथि औंला उठाइरहँदा संसदको प्रक्रियाबारे विश्वास जागृत गर्न सक्यौं कि सकेनौं ? संसदको विश्वसनीयतामाथि आस्था जागृत गर्न सक्यौं कि सकेनौं ? यदि दलहरूले जनतामा आस्था जागृत गर्न सकेनन् भने चोलेन्द्र शमशेर त फर्किएर नआउलान् तर यो लम्पट प्रवृत्तिबाट न्यायालय मुक्त हुन्छ कि हुँदैन ?'

आइतबारको प्रतिनिधिसभा बैठकले प्रधानन्यायाधीश चोलेन्द्रशम्शेर जबराविरुद्धको महाभियोग प्रस्ताव बहुमतले पारित गरी महाभियोग सिफारिस समितिमा पठाइसकेको छ ।

महाभियोग सिफारिस समितिमा विष्णु पौडेल, लालबाबु पण्डित, शिवमाया तुम्बाहाम्फे, कृष्णभक्त पोखरेल, मिनबहादुर विक, रामबहादुर विष्ट, यशोदा सुवेदी, रेखा शर्मा, कल्याणी खड्का, एकवाल मियाँ र प्रमोद साह सदस्य छन् ।

जबराविरुद्ध विभिन्न २१ आरोप लगाएर सत्तारुढ दलहरू कांग्रेस, माओवादी केन्द्र र एकीकृत समाजवादीका सांसदहरूले फागुन १ गते प्रतिनिधिसभामा महाभियोग दर्ता गराएका थिए । महाभियोग दर्ता भएपछि जबरा स्वतः निलम्बनमा परेका थिए ।

प्रकाशित : श्रावण २२, २०७९ १६:१५
पूरा पढ्नुहोस्
प्रतिक्रिया
पठाउनुहोस्
x
×