साउन २१ भित्रै चौथो त्रैमासको वित्तीय प्रतिवेदन सार्वजनिक गर्न बैंकहरूलाई निर्देशन
काठमाडौँ — अब बैंक तथा वित्तीय संस्थाले आर्थिक वर्ष सकिएको तीन साता (२१ दिन) भित्रै चौथो त्रैमासको वित्तीय विवरण सार्वजनिक गर्नुपर्ने भएको छ । राष्ट्र बैंकले एकीकृत निर्देशन संशोधन गरी उक्त व्यवस्था गरेको हो ।
‘चौथो त्रैमासको अन्तरिम वित्तीय प्रतिवेदन (संक्षिप्त प्रतिवेदन) आर्थिक वर्ष समाप्त भएको २१ दिनभित्र प्रकाशन गर्नु पर्नेछ,’ राष्ट्र बैंकको निर्देशनमा भनिएको छ । यसअघि यस्तो प्रतिवेदन आर्थिक वर्ष समाप्त भएको मितिले एक महिना (३० दिन) भित्र सार्वजनिक गर्नु पर्ने व्यवस्था थियो । उक्त अवधि घटाएर राष्ट्र बैंकले २१ दिनभित्र सार्वजनिक गर्न बैंक तथा वित्तीय संस्थालाई निर्देशन दिएको हो । यस्तै, चौथो त्रैमासको वित्तीय प्रतिवेदन प्रकाशित गर्ने समय (म्याद) घटाए पनि अरु त्रैमास (पहिलो, दोस्रो र तेस्रो) को प्रतिवेदन ७ दिनभित्र प्रकाशित गर्नुपर्ने पुरानो व्यवस्था भने यथावत नै छ ।
