मूल्यवृद्धि साढे ८ प्रतिशत नाघ्यो, घिउ-तेलको वृद्धिदर उच्च

चालु आर्थिक वर्षको ११ महिनामा खाद्य तथा पेय पदार्थ समूहको मूल्यवृद्धि ७.४३ प्रतिशत र गैर–खाद्य तथा सेवा समूहको ९.४४ प्रतिशत रहेको राष्ट्र बैंकको मासिक प्रतिवेदनले देखाएको छ । जेठमा खाद्य तथा पेय पदार्थ समूहअन्तर्गत घिउ तथा तेलको मूल्यवृद्धि सबैभन्दा उच्च २२.६० प्रतिशत छ । यस्तै दुग्ध पदार्थ तथा अण्डाको ११.२२, सुर्तीजन्य पदार्थको ९.७०, मदिराजन्य पेय पदार्थको ९. ६८ र दाल तथा गेडागुडी उपसमूहको मूल्य वृद्धि ९.१३ प्रतिशत रहेको राष्ट्र बैंकले जनाएको छ । गैर–खाद्य तथा सेवा समूह अन्तर्गत यातायातको मूल्यवृद्धि २५.७९ प्रतिशत छ । शिक्षाको ११.६४, फर्निसिङ्ग तथा घरायसी उपकरणहरुको ८.३०, मनोरञ्जन तथा संस्कृतिको ८.२१ र घरायसी सामाग्रीको मूल्यवृद्धि ७.८४ प्रतिशत रहेको छ ।