बैंकका सहायक कम्पनीले ब्रोकर लाइसेन्स पाउने- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

बैंकका सहायक कम्पनीले ब्रोकर लाइसेन्स पाउने

कान्तिपुर संवाददाता

काठमाडौँ — नेपाल धितोपत्र बोर्डले वाणिज्य बैंकका सहायक कम्पनीले पनि सेयर ब्रोकर लाइसेन्स पाउने गरी नीतिगत परिवर्तन गरेको छ । बोर्डले धितोपत्र व्यवसायी, धितोपत्र दलाल, (धितोपत्र व्यापारी तथा बजार निर्माता) नियमावली २०६४ संशोधन गरी उक्त व्यवस्था गरेको हो ।

संशोधित नियमावली अर्थ मन्त्रालय र मन्त्रिपरिषद्बाट जस्ताको त्यस्तै लागू भए अब हरेक वर्ष ब्रोकर लाइसेन्सका लागि नेप्सेले आवेदन खुला गर्नेछ भने निजी कम्पनी र संस्थागत कम्पनी दुवैले सेयर ब्रोकरका लागि आवेदन दिन सक्नेछन् । अब बैंकको सहायक कम्पनीसँगै अरु प्राइभेट कम्पनी, पब्लिक कम्पनी सबैलाई ब्रोकर लाइसेन्स लिन बाटो खुला भएको धितोपत्र बोर्डका अध्यक्ष रमेशकुमार हमालले बताए ।

‘हामीले मापदण्ड पुगेका सबै आवेदनलाई ब्रोकर लाइसेन्स पाउने गरी नीतिगत व्यवस्था गर्दै छौं,’ उनले भने, ‘यो व्यवस्था पूर्ण रूपमा पारदर्शी हुन्छ । पहुँच र शक्तिको आधारमा लाइसेन्स पाउने व्यवस्थाका अन्त्य भएको छ ।’

नेपालको कानुनले बैंकको सहायक कम्पनीले सेयर कारोबारका लागि ब्रोकर लाइसेन्स लिन पाउने व्यवस्था गरेको छ । सोही व्यवस्थाबमोजिम करिब तीन वर्षअघि नेपाल स्टक एक्सचेञ्ज (नेप्से)ले ब्रोकर लाइसेन्स वितरणका लागि आवेदन मागेको थियो । सोहीअनुसार १२ वटा बैंकको सहायक कम्पनीले ब्रोकर लाइसेन्सका लागि आवेदन पनि दिएका छन् । आवेदन दिने मिति नसकिँदै संसदको अर्थ समितिले प्रक्रिया रोक्न निर्देशन दिएपछि प्रक्रिया रोकिएको थियो । त्यो प्रक्रिया अझै सुरु भएको छैन ।

प्रकाशित : असार २२, २०७९ १३:१५
प्रतिक्रिया
पठाउनुहोस्

माओवादीको केन्द्रीय समिति बैठक बिहीबारसम्मका लागि स्थगित

कान्तिपुर संवाददाता

काठमाडौँ — माओवादी केन्द्रको केन्द्रीय समिति बैठक बिहीबारसम्मका लागि स्थगित भएको छ । सोमबार बसेर स्थगित गरिएको बैठक बुधबार दिउँसो १ बजेका लागि तय गरिएको थियो । 

काठमाडौंमा आइतबार सुरु भएको माओवादी केन्द्रको केन्द्रीय समिति बैठकमा अध्यक्ष पुष्पकमल दाहाललगायत नेता ।

माओवादी अध्यक्ष पुष्पकमल दाहालका स्वकीय सचिव रमेश मल्लले केन्द्रीय समिति बैठक स्थगित गरिएको जानकारी दिए । 'नेतृत्वको टिम संसद् बैठकमा सहभागी बन्नुपर्ने भएकोले आज १ बजे निर्धारण गरिएको केन्द्रीय समितिको बैठक भोलि २०७९ असार २३ गते बिहीबार बिहान ११ बजे बस्ने भएको छ,' मल्लले जानकारी दिए ।

केन्द्रीय समिति जारी बैठकमा पदाधिकारीसहित विभिन्न विभागमा पूर्णता दिनका लागि नेतृत्वसँग माग गरिएको छ । केही दिनमै माओवादीले महासचिवसहित विभिन्न पदाधिकारी टुंगो लगाउने पनि बताएको छ ।

प्रकाशित : असार २२, २०७९ १३:१५
पूरा पढ्नुहोस्
प्रतिक्रिया
पठाउनुहोस्
×