सुधिर बस्नेतको कोहिनुर हिल हाउजिङ लिलाम बिक्रीमा- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

सुधिर बस्नेतको कोहिनुर हिल हाउजिङ लिलाम बिक्रीमा

कान्तिपुर संवाददाता

काठमाडौँ — व्यवसायी सुधिर बस्नेतको ललितपुरस्थित कोहिनुर हिल हाउजिङ लिलाम बिक्री गर्न कर्मचारी संचय कोषले पुन: बोलकबोलका लागि सूचना जारी गरेको छ । पटक पटक म्याद दिँदा पनि भुक्तानी गर्न नआएपछि लिलाम बिक्रीका लागि सूचना निकालिएको कोषले जनाएको छ ।

बोलकबोलका लागि कोषले २१ दिनको म्याद दिएको छ । कोहिनुर हिल हाउजिङ प्रालिको नाममा रहेको ललितपुर साविकको इमाडोल गाविस वडा नम्बर ४ रहेको कुल क्षेत्रफल १०–९–२–० जग्गा र सोमा निर्माणाधिन आवासीय भवनहरु खरिदका लागि कोषले शिलबन्दी आह्वान गरेको छ । कोहिनुर हिल हाउजिङ कर्मचारी संचय कोषले बन्धक राखेको छ ।

कोषका अनुसार बस्नेतले परियोजनाका लागि २३ करोड ७० लाख रुपैयाँ कर्जा लिएका थिए । करिब डेढ अर्ब रुपैयाँका लागि कर्जा प्रस्ताव गरे पनि बस्नेतले सबै कर्जा लिन पाएका थिएनन् । उनले लिएको २३ करोड ७० लाख रुपैयाँको साँवा, ब्याज लगायत गरेर अहिले करिब ९० करोड रुपैयाँभन्दा बढी पुगेको छ । सोही रकम असुलउपर गर्नका लागि कोषले लिलामी सूचना जारी गरेको हो । उक्त हाउजिङ कम्पनी लिलाम बिक्रीका लागि कोषले यसअघि सूचना जारी गरेपनि बिक्री हुन सकेको थिएन ।

उक्त हाउजिङ लिलामी गर्न बोलकबोल आह्वान गरिए पनि ऋणीले भुक्तानी गर्न बाँकी रकम भुक्तानी गरेमा लिलामी प्रक्रिया खारेज गरिने सूचनामा उल्लेख छ । ‘ऋणीले कोषलाई बुझाउनु पर्ने रकम लिलाम बिक्रीको यस सूचना बमोजिमको म्यादभित्र बुझाएमा लिलाम बिक्रीको प्रक्रिया अन्त्य गर्न सकिनेछ,’ सूचनामा भनिएको छ ।


प्रकाशित : असार १४, २०७९ १४:४९
प्रतिक्रिया
पठाउनुहोस्

नेपालमा समेत अध्ययन गरिएको अनुसन्धानमा देखियो औषधि प्रतिरोधी टाइफाइड गराउने ब्याक्टेरिया

अनुसन्धनात्मक अध्ययनका लागि काठमाडौं मेडिकल कलेज र धुलिखेल अस्पतालको पनि सहयोग
कान्तिपुर संवाददाता

काठमाडौँ — नेपाल लगायत दक्षिण पूर्वी एसिया तथा विश्वभर नै टाइफाइड ज्वरोको मुख्य कारक रहेको ब्याक्टेरिया औषधि प्रतिरोधी बन्दै गएको पाइएको छ ।

विश्व प्रसिद्ध जर्नल द लानसेट माइक्रोबमा प्रकाशित एक अध्ययन रिपोर्ट अनुसार टाइफाइड संक्रमणको कारक मानिएको सालमोनेला इन्ट्रिका सेरोभार टाइफिमुरियम (एस टाइफी) मा औषधि प्रतिरोधात्मक स्ट्रेन देखापरेको र त्यो दक्षिण एसियाका देशबाट अन्य देशहरुमा पनि विस्तार भएको छ ।

अनुसन्धानकर्ताहरुका अनुसार टाइफाइड ज्वरो विश्व जनस्वास्थकै लागि उच्च सरोकार भएको विषय हो । यसका कारण विश्वभर हरेक वर्ष १ करोड १० लाख बढी संक्रमित हुन्छन् र १ लाख बढीको मृत्यु समेत हुन्छ । यसको प्रकोप मुख्य गरेर दक्षिण एसियाका देशमा बढी छ । यस्तै अफ्रिका, दक्षिण पूर्वी एसिया र ओसेनियामा पर्ने देशहरुमा भने यसको प्रभाव निकै भयावह नै रहेको अध्ययनले देखाएको छ ।

अनुसन्धानकर्ताहरुले नेपाल, बंगलादेश, पाकिस्तान र घानाबाट २०१६ देखि २०२१ सम्म तथ्यांक संकलन गरी अध्ययन गरेका थिए । नेपालमा उनीहरुले काठमाडौं मेडिकल कलेज तथा धुलिखेल अस्पतालसँगको सहकार्यमा अध्ययन गरेका थिए । एस टाइफीले गरेको संक्रमणलाई नियन्त्रण गर्न एन्टिभाइरल औषधिहरु उपलब्ध भएपनि ब्याक्टेरियामा प्रतिरोधी क्षमता विकास भएका कारण भने त्यस्ता औषधिको प्रभाव तुलनात्मक रुपले कम हुँदै जाने डर हुन्छ । हाल प्रतिरोधी एस टाइफीको विस्तार धेरै ठूलो नदेखिएपनि अध्ययनको दायरा फराकिलो हुँदा जाँदा यसको दरमा पनि वृद्धि हुने देखिन्छ ।

'जुन रफ्तारमा औषधि प्रतिरोधी एस टाइफी स्ट्रेन उत्पत्ति भएर विस्तार भइरहेको छ त्यसले आउने दिनमा ठूलै जनस्वास्थ्य समस्या निम्त्याउने जोखिम उच्च छ । त्यसैले यसप्रति अहिले नै सजग भएर यसको रोकथाम र नियन्त्रणका लागि सबै मिलेर लाग्नुपर्छ,' यस अध्ययनकी मुख्य लेखक स्ट्यान्डफोर्ड विश्वविद्यालयका जेसन एण्ड्रियुजले भनेका छन् ।

औषधि प्रतिरोधी एस टाइफी सन् १९९० देखि विश्वका विभिन्न देशमा विस्तार हुन थालेपनि सन् २००० यता भने बंगलादेश र भारतमा यसको विस्तार निकै घटेको छ भने नेपालमा पनि कम भएको छ । तर पाकिस्तानमा भने केही मात्रामा यसको विस्तारमा वृद्धि भएको देखिन्छ । यस्तै नेपाल लगायत भारत र पाकिस्तानमा क्विनोलोन प्रतिरोधी एस टाइफीको वृद्धि २०१० देखि देखिन थालेको अध्ययनले बताएको छ भने बंगलादेशमा यो २००० को सुरुमै देखिएको थियो ।


प्रकाशित : असार १४, २०७९ १४:३६
पूरा पढ्नुहोस्
प्रतिक्रिया
पठाउनुहोस्
×