साल्ट ट्रेडिङको युरिया मल वीरगन्ज आइपुग्यो - अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

साल्ट ट्रेडिङको युरिया मल वीरगन्ज आइपुग्यो 

शंकर आचार्य

पर्सा — युरिया मलको हाहाकार रहेको बेला साल्ट ट्रेडिङ कर्पोरेसन लिमिटेडको मल वीरगन्ज आइपुगेको छ । वीरगन्ज प्रादेशिक कार्यालयको गोदाममा शुक्रबारदेखि भारतको रक्सौलस्थित रेल्वे स्टेसनबाट ढुवानी गरी युरिया मल भित्रिन थालेको हो । 

कार्यालय प्रमुख अमोज लामिछानेका अनुसार शुक्रबारदेखि गोदाममा मल भित्रिन थालेको र हालसम्म १२ हजार ५ सय बोरा मल भित्रिइसकेको छ । ‘रक्सौलमा आइपुगेको १ रेल्वे र्‍याक युरिया मल ट्रकबाट ढुवानी गरी कर्पोरेसनको वीरगन्जथित गोदामसम्म ल्याइँदै छ,’ उनले भने, ‘एक रेल्वे र्‍याकमा २ हजार ५ सय मेट्रिक टन अर्थात ५० हजार बोरा मल हुन्छ, अर्को एक र्‍याक युरिया मल पनि रक्सौल रेल्वे स्टेसन हुँदै वीरगन्जसम्म आउने छ ।’

साल्टले ग्लोबल टेन्डरबाट खरिद गरेको २२ हजार मेटन युरिया मलमध्ये वीरगन्ज प्रादेशिक कार्यालयले पाउने ५ हजार मेट्रिक टन मल रक्सौल हुँदै आइरहेको उनले बताए । आपूर्तिकर्ता स्विस सिंगापुर कम्पनीले युरिया मल कोलकाता बन्दरगाहसम्म ल्याएर त्यहा प्याकिङ गरी नेपालतर्फ मल पठाउँदै छ ।

बाँकी युरिया मल भैरहवा र विराटनगर प्रादेशिक कार्यालयहरुमा तीनै कार्यालयको नजिकको भारतीय सहरहरुमा रहेको रेल्वे स्टेसन हुँदै पुगिरहेको उनले बताए । वीरगन्जमा प्राप्त युरिया मलमध्ये माग भएका मातहतका कार्यालयहरु हेटौंडा, जनकपुर, गौर, मलंगवा, बनेपा, काठमाडौं, त्रिशूली, नारायणघाट, पोखरा, बाग्लुङलगायतका ठाउँमा पठाइने उनले जानकारी दिए ।

प्रकाशित : असार १३, २०७९ १६:२६
प्रतिक्रिया
पठाउनुहोस्

गण्डक नहरमा यस वर्ष ढिला पानी आउने 

शंकर आचार्य

पर्सा — नेपालतर्फ गण्डक नहरमा २ स्थानमा पुल निर्माणको काम जारी रहेकाले यस वर्ष नहरमा धानबालीका लागि नियमित तालिकाभन्दा ढिलो गरी पानी आउने भएको छ ।

निर्धारित समयमा नहरमा पानी नआउने भएपछि नहरमा आश्रित पर्सा र बाराका किसानले समयमै रोपाइँ गर्न नपाउने भएका छन् । भारतसँगको सम्झौता अनुसार बर्सेनि धान सिजनका लागि असार १५ र गहुँ सिजनका लागि पुस १० देखि नहरमा पानी आइसक्नु पर्छ ।

नारायणी सिंचाइ व्यवस्थापन कार्यालयका सूचना अधिकृत इन्जिनियर सुवोध कुशवाहाका अनुसार, नहरअन्तर्गत वीरगन्ज महानगरपालिका वडा नम्बर २७ मा २ वटा ‘फुट ब्रिज’ निर्माणाधीन रहेको र तीन वटाको काम सम्पन्न भएकाले यस वर्ष नहरमा नेपालतर्फ पानी आउन ढिला हुने भएको हो ।

‘सर्वसाधारणको आवागमनमा सहजताका लागि नहरमा हाल २ वटा फुट ब्रिज निर्माणाधीन छन्, तिनको काम सक्न अझै करिब एक साता लाग्ने अनुमान छ,’ उनले भने, ‘असार २० देखि मात्र नहरमा पानी आउने सम्भावना छ ।’

भारतीय पक्षले नहरको ‘जिरो आरडी’ सम्म पानी दिइसके पनि नेपाली भूिममै नहरमा निर्माण कार्य भई रहेकाले नहरमा पानी प्रवाह गर्न समस्या भएको उनले बताए । ‘जिरो आरडीमा हाल भारतले करिब ४ सय क्युसेक पानी दिइसकेको छ,’ उनले भने, ‘हाम्रो निर्माण कार्य सम्पन्न भइनसकेकाले नहरमा नेपालतर्फ पानी ल्याउन नसकिएको हो ।’

प्रकाशित : असार १३, २०७९ १६:१६
पूरा पढ्नुहोस्
प्रतिक्रिया
पठाउनुहोस्
×