२ अर्बको सेयर कारोबार, नेप्से घट्यो- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

२ अर्बको सेयर कारोबार, नेप्से घट्यो

कान्तिपुर संवाददाता

काठमाडौँ — आइतबार ९५ अंक बढेको सेयर बजारको वृद्धि दुई दिन पनि टिक्न सकेन । सोमबार सेयर बजार खुल्दा परिसूचक नेप्से केही बढे पनि बन्द हुँदा भने २३.८५ अंकले घटेको छ । सो अंकको गिरावटपछि नेप्से १९३३ अंकमा कायम भएको छ । यस दिन २ अर्ब ४ करोड रुपैयाँकाे काराेबार भयाे । आइतबार २ अर्ब १९ करोडको काराेबार भएको थियो । 

कुल १६८ कम्पनीको मूल्य घट्यो भने २४ को बढ्यो । बैंकिङ १२, विकास बैंक ११७, फाइनान्स ३०, होटल तथा पर्यटन ७०, जलविद्युत् ६०, उत्पादन ४१, माइक्रोफाइनान्स ६७, निर्जीवन बीमा ९७, अन्य ३७ र ब्यापार उपसमूह ३४ अंकले घटे । जीवन बीमा उपसमूह भने ११३ अंक बढ्यो ।

सीवाईसी लघुवित्त र न्यादी हाइड्रोको मूल्य करिब १० प्रतिशत बढ्यो । लाइफ इन्स्योरेन्स कर्पोरेसनको मूल्य ९ प्रतिशत बढ्यो । उन्नति सहकार्य लघुवित्तको मूल्य १० प्रतिशत घट्यो । कारोबार रकमका आधारमा नागरिक लगानी कोष, हिमालयन डिस्टिलरी, लाइफ इन्स्योरेन्स कर्पोरेसन, नबिल बैंक र एसियन लाइफ इन्स्योरेन्स कम्पनी क्रमश: अगाडि रहे ।

प्रकाशित : असार १३, २०७९ १५:२४
प्रतिक्रिया
पठाउनुहोस्

नेताहरू घमण्डी हुँदा देश बनेन : नवनियुक्त मन्त्री चौधरी

कान्तिपुर संवाददाता

काठमाडौँ — नवनियुक्त सहरी विकास मन्त्री मेटमणि चौधरीले नेताहरु घमण्डी भएकाले देश अघि बढ्न नसकेको बताएका छन् । सोमबार पद तथा गोपनीयताको शपथपछि मन्त्रालयमा पदभार ग्रहण गर्दै मन्त्री चौधरीले यस्तो बताएका हुन् ।

उनले मुलुक चलाउने मान्छे घमण्डी हुन्जेल देश अघि बढ्न नसक्ने जिकिर गरे । मन्त्री चौधरीले सबैले आफ्नो ठाउँबाट सकेजति देश विकास गर्न सहयोग गर्नुपर्ने बताए । नेताहरुले नीति बनाउँदा आफू सुरक्षित हुने किसिमबाट नीति निर्माण गरेको भन्दै इमान्दारिताको खाडल भर्न अब लाग्ने बेला भएको उनले बताए ।

‘मुलुक अघि जान नसक्नुको एउटा मात्रै कारण के हो भने हामी सबै धेरै घमण्डी भयौँ । मुलुक चलाउने मान्छे पनि घमण्डी भयौँ । कर्मचारीको बारेमा त के भनौँ र ? तर हामीले आफ्नोतर्फबाट पनि जे गर्नुपर्ने हो त्यो गरिरहेका छैनौँ । आफ्नो बचावटको लागि हामी नेताहरु नै आफू बच्नको लागि सुरक्षित नीति नियम बनाउने । आफूलाई संरक्षण गर्ने किसिमका कानून बनाउन खोज्ने, मुलुकलाई इमान्दारीपूर्वक योगदान गरौँ । कुनै पनि व्यक्तिले स्ट्रङ कमिटमेन्ट नगर्दासम्म मुलुक बन्दैन । हामीलाई अफ्ठ्यारो त छ नि, घुस खान पाउँदा पैसा हुन्छ, अरु बद्मासी गर्दा अरु होला । यो तरिकाले त मुलुक बन्दैन रहेछ नि । देश बनाउनको लागि सबैले सामूहिक रुपमा प्रतिबद्धता जनाऔं,’ उनले भने ।

मन्त्री चौधरीले देश बनाउनका लागि सुदृढ र सशक्त प्रतिबद्धता जनाउन आवश्यक रहेको भन्दै घुस खाने नभइ सामूहिक प्रतिबद्धता जनाएर काम गर्नुपर्ने बताए ।

प्रकाशित : असार १३, २०७९ १५:१५
पूरा पढ्नुहोस्
प्रतिक्रिया
पठाउनुहोस्
×