ढलान गर्न नपाउँदै भाँचियो पुल- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

ढलान गर्न नपाउँदै भाँचियो पुल

केदार शिवाकोटी

दोलखा — दोलखाको बिगु गाउँपालिका– ४ झोरुङ खोलामा बन्दै गरेको मोटरेबल पुल भाँचिएको छ । जेठ मसान्तमा निर्माण सकिएपछि हस्तान्तरण गर्नुपर्ने पुलको हाल ढलान गर्ने तयारी थियो । पुलको एक भाग दबिएको आशंकामा बिगु गाउँपालिकाले २ साताअघि नै निर्माण रोक्न सम्बन्धित कम्पनीलाई भनेको थियो ।

पुलको एक भाग १०/१२ सेन्टिमिटर दबिएको आशंकामा निर्माणको काम रोक्न भनिएको पालिकाका प्राविधिक शाखा प्रमुख सब इन्जिनियर सरोज खड्काले बताए । ‘हामीले अनुगमनको बेलामा पुलको एक भाग दबिएको आशंका गरेका थियौं,’ उनले भने, ‘विज्ञलाई ल्याउने तयारी हुँदा आशंका गरिएकै भागमा बाढी पसेर पुल भाँचियो ।’

पुल बनाउनका लागि २०७७ सालमा बोलपत्र आह्वान गरिएको थियो । त्रिवेणी–बाँनिया–लाफा जेभीले २ करोड १६ लाखमा निर्माण गर्नेगरी ठेक्काको कबोल गरेर जिम्मा लिएको उनले बताए । असार मसान्तमा हस्तान्तरण गर्नेगरी हतारमा उक्त निर्माण कम्पनीले पुल ढलानको तयारी थालेको हो । जेठ मसान्तमै प्राविधिक त्रुटिको आशंकामा काम रोक्न दिएको आदेश पुल ढलानका लागि फर्मा कसेर टेको लगाइएको थियो ।

ढलानका लागि छड बाँध्ने काम भइरहेको थियो । स्थानीयका अनुसार निर्माण कम्पनीले पालिकाको आदेश नमानेर काम गरिरहेको थियो । शनिबार झोरुङ खोलामा आएको बाढीले पुल भाँचिएको पालिकाले जनाएको छ । बिगु गाउँपालिकाको ५,६,७ र ८ का झण्डै ३० हजार स्थानीयको यातायात सहज बनाउन यहाँको पुल अति महत्वपूर्ण छ । सिंगटी खोला जलविद्युत् आयोजनाको ८० प्रतिशत र पालिकाको २० प्रतिशत लागतमा झोरुङ खोलामा पुल निर्माण हुन लागेको थियो ।


प्रकाशित : असार १२, २०७९ १३:३१
प्रतिक्रिया
पठाउनुहोस्

जाजरकोटको जंगलमा भेटियो महिलाको शव

श्रीमान् प्रहरी नियन्त्रणमा
हरिहरसिंह राठौर

जाजरकोट — नलगाड नगरपालिकामा एक महिलाको शव जंगलमा फेला परेको छ । नलगाड नगरपालिका १ की ४२ वर्षीया भगवती शाही घर नजिकैको जंगलमा मृत अवस्थामा फेला परेकी हुन् ।

शव सडेको र गन्हाउन थालेपछि गाउँलेले प्रहरीलाई खबर गरेका थिए । मृतकको घर र शव फेला परेको स्थान एक सय मिटरको दुरीमा रहेको छ । शवको प्रकृति हेर्दा ती महिलाको मृत्यु/हत्या एक हप्ताअघि नै भएको प्रहरीको अनुमान छ ।

'हामीले अनुसन्धान गरिरहेका छौं, 'जिल्ला प्रहरी प्रमुख जिल्ला प्रहरी प्रमुख सन्तोष निरौलाले भने, ‘अनुसन्धानकै सिलसिलामा मृतकका पति लेकबहादुर नेपालीलाई नियन्त्रणमा लिएर सोधपुछ गर्ने काम गरिरहेका छौं । शव जिल्ला अस्पताल ल्याएर पोस्टमार्टम गर्दैछौं । हामीलाई ती महिलाको हत्या नै भएको आशंका छ । अनुसन्धान गरिरहेका छौं । सत्यतथ्य केही दिनमै हामी सार्वजनिक गर्छौं ।’

शव गन्हाउने अवस्थासम्म पुग्दा पनि कुनै खोजतलास नगर्नु र प्रहरीलाई पनि खबर नगर्नुले हत्यामा पतिकै संलग्नताको आशंका गरिएको छ । माइती पक्षले पनि पतिले नै हत्या गरेको हुन सक्ने आशंका गरेका छन् । अहिलेसम्म जाहेरी भने नपरेको प्रहरी नायब उपरीक्षक निरौलाले बताए । अन्तरजातिय विवाह गरेकी मृतकका एक छोरा र एक छोरी छन् ।

प्रकाशित : असार १२, २०७९ १३:२६
पूरा पढ्नुहोस्
प्रतिक्रिया
पठाउनुहोस्
×