लेखापरीक्षण प्रतिवेदन नबुझाउने २२ बिमा कम्पनी कारबाहीमा- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

लेखापरीक्षण प्रतिवेदन नबुझाउने २२ बिमा कम्पनी कारबाहीमा

कान्तिपुर संवाददाता

काठमाडौँ — तोकिएको समयमा वार्षिक लेखापरीक्षण प्रतिवेदन नबुझाउने २२ कम्पनीलाई बिमा समितिले कारबाही गरेको छ । निर्धारित समयमा लेखापरीक्षण प्रतिवेदन नबुझाएको भन्दै समितिले ती कम्पनीहरुलाई १० हजार देखि १० हजार ५ सय रुपैयाँसम्मका दरले जरिवाना गरेको हो ।

आर्थिक वर्ष २०७७/७८ को लेखापरीक्षण प्रतिवेदन नबुझाएको कारणले कारबाहीमा परेका कम्पनीहरुमा नेपाल पुनर्बीमा कम्पनी, लाइफ इन्स्योरेन्स कर्पोरेसन (नेपाल), एसियन लाइफ इन्स्योरेन्स, सूर्या लाइफ इन्स्योरेन्स, प्राइम लाइफ इन्स्योरेन्स, ज्योति लाइफ इन्स्योरेन्स, रिलायन्स लाइफ इन्स्योरेन्स, सिटिजन लाइफ इन्स्योरेन्स, प्रभु लाइफ इन्स्योरेन्स र महालक्ष्मी लाइफ इन्स्योरेन्स छन् ।

यसैगरी आर्थिक वर्ष २०७६/०७७ को लेखापरीक्षण प्रतिवेदन नबुझाएका कारण जरिवाना गरिएका कम्पनीहरुमा राष्ट्रिय बीमा संस्थान, नेसनल लाइफ इन्स्योरेन्स, नेपाल लाइफ इन्स्योरेन्स, गुराँस लाइफ इन्स्योरेन्स, आईएमई लाइफ इन्स्योरेन्स, युनियन लाइफ इन्स्योरेन्स, सन नेपाल लाइफ इन्स्योरेन्स, रिलायबल नेपाल लाइफ इन्स्योरेन्स, सानिमा लाइफ इन्स्योरेन्स, दि ओरिएण्टल इन्स्योरेन्स, नेसनल इन्स्योरेन्स र राष्ट्रिय बीमा कम्पनी लिमिटेड छन् ।

बिमा ऐन २०४९ र बिमा नियमावली, २०४९ बमोजिम कम्पनीहरूले प्रत्येक आर्थिक वर्ष समाप्त भएको मितिले १० महिनाभित्र आफूले गरेको व्यवसायको हिसाव कितावको लेखापरीक्षण प्रतिवेदन समितिमा बुझाउनुपर्ने कानुनी व्यवस्था छ । सो व्यवस्था बमोजिम आर्थिक वर्ष २०७७/७८ को लेखापरीक्षण प्रतिवेदन नबुझाउने बीमा कम्पनी प्रत्येकलाई १० हजारका दरले र आर्थिक वर्ष २०७७/७८ को लेखापरीक्षण प्रतिवेदन नबुझाई दोस्रो पटक कानुनी व्यवस्थाको उल्लङ्घन गर्ने बिमा कम्पनी प्रत्येकलाई ५ सय थप गरी १० हजार ५०० सय रुपैयाँका दरले जरिवाना गर्ने निर्णय समितिले गरेको हो ।

बिमा ऐन, २०४९ को दफा २५ बमोजिम कम्पनीहरूले आफूले गरेको व्यवसायको हिसाव कितावको लेखापरीक्षण मान्यताप्राप्त लेखापरीक्षकबाट गराई सोको प्रतिवेदन प्रत्येक आर्थिक वर्ष समाप्त भएको मितिले १० महिनाभित्र समिति समक्ष पेश गर्नुपर्ने अनिवार्य व्यवस्था छ । (कारबाहीमा परेका कम्पनीको संख्या २२ हुनुपर्नेमा अन्यथा भएकाले सच्याइएको छ)


प्रकाशित : असार ९, २०७९ १६:४२
प्रतिक्रिया
पठाउनुहोस्

सेतो हेरोइनसहित ३ विदेशी र १ नेपाली पक्राउ 

कान्तिपुर संवाददाता

काठमाडौँ — नेपाल प्रहरीको लागूऔषध नियन्त्रण ब्युरोले ४ किलो ९ सय ग्राम सेतो हेरोइनसहित चार जनालाई पक्राउ गरेको छ । प्रहरीका अनुसार पक्राउ पर्नेमा तीन विदेशी र एक जना नेपाली नागरिकसहित चार जना छन् । 

फ्लाई दुबईको उडानबाट दक्षिण अफ्रिकास्थित जोहानसबर्गबाट जेठ २ गते बिहान तान्जानियन नागरिक पासपोर्ट नम्बर टीएई ११५९४३ बाहक ३० अब्दल्लाह अबुलिकी त्रिभूवन अन्तर्राष्ट्रिय विमानस्थल काठमाडौं आइपुगेका थिए । उनको गतिविधि शंकास्पद लागेपछि ब्यूरोबाट खटिएका प्रहरीले निगरानी राख्यो । त्यसैक्रममा प्रहरीले सोही दिन काठमाडौं महानगरपालिका–६ स्थित बौद्धको एक होटलबाट सुटकेसभित्र फल्सबटम बनाएर ल्याएको ४ किलो ९ सय ग्राम हेरोइनसहित अबुलिकीलाई पक्राउ परेको ब्युरो प्रमुख एसपी जीवनकुमार श्रेष्ठले बताए ।

प्रहरीले बौद्धकै होटलबाट भारतको हरियाणा राज्यबाट उक्त सेतो हेरोइन लिन आएका ४६ वर्षीय मुनिम सिंह, ४३ वर्षीय विक्रमजित सिंह र पर्सा वीरगन्ज महानगरपालिका–१३ का ३० वर्षीय बिक्की रौनियारलाई पक्राउ गरेको छ । पछिल्ला केही घटनालाई केलाएर हेर्दा विदेशबाट ल्याएको लागूऔषध भारत लौजाने तयारी रहेको एसपी श्रेष्ठले बताए । उनीहरूमाथि लागूऔषध (नियन्त्रण) ऐन २०३३ बमोजिम लागूऔषध हेरोइन मुद्दामा म्याद थप गरी अनुसन्धान गरिरहेको ब्युरोले जनाएको छ ।

दुई साताअघि ब्युरोले ५१ किलो हेरोइनसहित सात जना दक्षिण अफ्रिकी नागरिकलाई पक्राउ गरेको थियो । ब्युरोले विगतको अनुभवका आधारमा ‘क्रिमिनल प्रोफाइल’ गरी त्रिभूवन अन्तर्राष्ट्रिय विमानस्थलमा निरन्तर निगरानी बढाएको एसपी श्रेष्ठले बताए ।

प्रकाशित : असार ९, २०७९ १६:१२
पूरा पढ्नुहोस्
प्रतिक्रिया
पठाउनुहोस्
×