सरकारका कारण पेट्रोलियम पदार्थको मूल्य बढेको होइन : अर्थमन्त्री शर्मा- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

सरकारका कारण पेट्रोलियम पदार्थको मूल्य बढेको होइन : अर्थमन्त्री शर्मा

कान्तिपुर संवाददाता

काठमाडौँ — अर्थमन्त्री जनार्दन शर्माले पेट्रोलियम पदार्थको मूल्यवृद्धि सरकारका कारण नभई अन्तर्राष्ट्रिय मूल्य श्रृंखलामा आएको समस्याले सिर्जित भएकाे बताएका छन् । अन्तर्राष्ट्रियस्तरमा भएका युद्धको प्रभावका कारण मूल्य बढेको उनले बताए । खाने तेलको मूल्य पनि अन्तर्राष्ट्रिय घटनाहरुको प्रभावकै कारणले बढेको उनले बताए ।

फाइल

प्रतिनिधिसभाअन्तर्गतको उद्योग, वाणिज्य, श्रम तथा उपभोक्ता हित समितिको बैठकमा बोल्दै अर्थमन्त्री शर्माले रसियाबाट कच्चा पदार्थ आयात बन्द भएकाले खाने तेलको मूल्य बढेको उल्लेख गरे । उनले भने, 'तेलको मूल्य बढ्यो भन्नेछ । यो हामीले बढाएको हो र ? हामी त चिन्तित छौँ, यसले डलर (सञ्चिति) घटिरहेको छ । हाम्रो पैसा बाहिर गइरहेको छ, अन्तर्राष्ट्रिय स्तरमा आएका युद्धहरुको प्रभावका कारण मूल्य बढिरहेको छ । खाने तेलको मूल्यको कुरा पनि त्यही नै हो ।'

सरकारले आगामी वर्ष धानमा आत्मनिर्भर हुनको लागि बिउ, प्रविधि र रकम छुट्याएको उनको भनाइ छ । सरकारले फलफूलजन्य वस्तु केरा र स्याउको आयातलाई तीन वर्षभित्रमा घटाउँदै जाने नीति लिएको बताए । उनले भने 'तोरी आउने युक्रेन, रसियाबाट रहेछ । आउन बन्द भएपछि तेलको मूल्य बढ्यो । त्यसैले युक्रेनको तोरी होइन हाम्रो तोरी हिमालदेखि तराइसम्म जताततै फल्छ । अहिले कृषिलाई प्राथमिकता किन दिएको त भन्दा हामीले आत्मनिर्भर हुनका लागि हो ।'

स्पञ्ज आइरनमा दिएको भन्सार छुटले प्लेट बनाउने १५ देखि २० वटा उद्योगले करोडाैं लगानी थपेको उनकाे दावी छ । यसले नेपाल फलामजन्य सामग्रीमा आत्मनिर्भर मात्रै नभएर निकासी गरी व्यापार घाटा कम गर्ने अवस्थामा पुग्ने शर्माले बताए । आगामी आर्थिक वर्षदेखि निकासी गर्ने उद्योगका लागि ८ प्रतिशत अनुदान दिने व्यवस्था भएकाले सरकारले उद्योगमैत्री नीति अगाडि ल्याएको उनको दाबी छ । उनले भने '२ सय बराबर ठूला उद्योगहरु जसले वार्षिक १० करोडसम्मको विद्युत् खपत गर्छन्, त्यसको उत्पादन निर्यात हेरेर हामीले २ देखि १५ प्रतिशतसम्म विद्युत् छुट दिने नीति ल्याएका छौँ । त्यसले नेपालमा ठूला उद्योगहरु अरु आउनेवाला छन् ।' अर्थमन्त्री शर्माले सरकारले दिनुपर्ने मल किसानले ल्याउँदा सहज रुपमा ल्याउन पाउनुपर्ने बताए । उनले कुनै पनि किसानले जोहो गरेर मल ल्याएको भएमा र भन्सारमा रोकिएको भए तत्काल सहजीकरण गर्न भन्सार विभागका महानिर्देशकलाई निर्देशन दिए । उनले भने ‘किसानले आफ्नो जोहो गरेर ल्याएको मल ल्याउन पाउनुपर्छ । किसानले ल्याएको मल भन्सारमा रोकिएको छ भने भन्सारका महानिर्देशकले सुन्नुहोला । किसानले ल्याएको मल कसैले लिलाम गर्न पाइँदैन ।'


प्रकाशित : असार ६, २०७९ १५:५८
प्रतिक्रिया
पठाउनुहोस्

लुम्बिनी जिसस निर्वाचन : कांग्रेस पहिलो, एमाले दोस्रो

घनश्याम गौतम

रूपन्देही — लुम्बिनी प्रदेशका १२ वटै जिल्लामा भएको जिल्ला समन्वय समितिको निर्वाचनमा गठबन्धनबाट नेपाली कांग्रेसले अधिकांश जिल्लामा जित हात पारेको छ । गठबन्धनबाट नेपाली कांग्रेस पहिलो, नेकपा एमाले दोस्रो हुँदा नेकपा माओवादी केन्द्र भने तेस्रो स्थानमा छ । लुम्बिनी प्रदेशमा गठबन्धन गरे पनि जनता समाजवादी र नेकपा एकीकृत समाजवादीले भने जित हासिल गर्न सकेनन् ।

समन्वय समितिमा कांग्रेसले ६ जिल्लामा प्रमुख र ३ जिल्लाको उपप्रमुख पाएको छ भने एमालेले ४ जिल्लामा प्रमुख र २ जिल्लामा उपप्रमुख जितेको छ । त्यस्तै माओवादीले २ जिल्ला प्रमुख र ५ जिल्लामा उपप्रमुख जितेको छ । लोकतान्त्रिक समाजवादीले २ उपप्रमुख जितेको छ । कांग्रेसले रूपन्देही, प्यूठान, दाङ, गुल्मी, बाँके र बर्दियामा जित हासिल गरेको छ । त्यस्तै एमालले पाल्पा, पश्चिम नवलपरासी, कपिलवस्तु र अर्घाखाँचीमा जितेको छ भने माओवादी केन्द्रले रोल्पा र रुकुम पूर्वमा जित हासिल गरेको छ ।

रूपन्देहीमा प्रमुखमा कांग्रेसका उमाकान्त चापागाईं र उपप्रमुखमा लोसपाका रामकृपाल धोवी निर्वाचित भए । बाँकेमा प्रमुख/उपप्रमुख दुवैमा कांग्रेसका ज्ञानेन्द्रकुमार चौधरी र सीता कार्की, गुल्मी प्रमुखमा कांग्रेसका द्रोणबहादुर खत्री र उपप्रमुखमा माओवादीका तेजेन्द्र सलामी निर्वाचित भएका छन् । त्यस्तै प्यूठान प्रमुखमा कांग्रेसका धर्मबहादुर जिसी र उपप्रप्रमुखमा माओवादीका दुर्गा रेश्गी, बर्दियाको प्रमुख/उपप्रमुखमा कांग्रेसका सूर्यबहादुर विष्ट र अमीताकुमारी यादव निर्वाचित भएका छन् । दाङ प्रमुखमा कांग्रेसका नित्यानन्द शर्मा र उपप्रमुखमा चेतना चौधरी निर्वाचित भएका हुन् । गठबन्धन बलियो भएका कारण प्यूठान र बर्दियामा एमालेले उम्मेदवारी नै दिएको थिएन ।

त्यस्तै पाल्पा प्रमुख/उपप्रमुखमा एमालेका टंकनाथ खनाल र काशीका गैरे ज्ञवाली निर्वाचित भए । कपिलवस्तु प्रमुखमा बाबुराम आचार्य र उपप्रमुखमा लोसपाका रमेश कुर्मी, अर्घाखाँची प्रमुख/उपप्रमुखमा जीवनारायण कोइराला र लक्ष्मी शर्मा ज्ञवाली विजयी भए । पश्चिम नवलपरासी प्रमुखमा एमालेका रुद्धल यादव विजयी भएका छन् । उनले गठबन्धनलाई पराजित गरेका थिए । त्यस्तै उपप्रमुखमा माओवादीका रामदयाल चौधरी निर्वाचित भएका छन् । एमालेले पाल्पा, अर्घाखाँची र नवलपरासीमा एकल विजय हात पारेको छ । कपिलवस्तुमा लोसपासँग तालमेल गरेको थियो ।

रोल्पा र रुकुम पूर्वमा माओवादी केन्द्रको प्यानल नै विजयी भएको छ । रोल्पा प्रमुखमा सीता आचार्य र उपप्रमुखमा कर्मलाल परियार निर्वाचित भएका छन् भने रुकुम पूर्वको प्रमुखमा मेघबहादुर श्रेष्ठ र उपप्रमुखमा मोहनबहादुर केसी निर्वाचित भएका छन् ।

प्रकाशित : असार ६, २०७९ १५:५७
पूरा पढ्नुहोस्
प्रतिक्रिया
पठाउनुहोस्
×