बजेटको कर नीतिविरुद्ध रुपन्देहीका उद्योगी र मजदुर सडकमा- अर्थ / वाणिज्य - कान्तिपुर समाचार

बजेटको कर नीतिविरुद्ध रुपन्देहीका उद्योगी र मजदुर सडकमा

माधव ढुंगाना

भैरहवा — स्टिल तथा वायर उद्योगमा प्रयोग हुने विभिन्न कच्चा पदार्थको आयातमा विभेदकारी व्यवस्था गरिएको भन्दै बिहीबार रुपन्देहीका उद्योगी र मजदुरले विरोध प्रदर्शन गरेका छन् । स्टिल र वायर उत्पादनका लागि आयात हुने कच्चा पदार्थ फलामे बिलेट्स र स्पन्ज आइरनमा लाग्ने भन्सार तथा अन्तशुल्क दरको व्यवस्था विभेदकारी भएको जनाउँदै उद्योगी/मजदुरले उक्त असमान विभेदकारी व्यवस्था हटाउन माग गरेका हुन् । 

आर्थिक विधेयकले फलामे डन्डीको कच्चा पदार्थ स्पन्ज आइरनको आयातमा भन्सार महसुल १ प्रतिशतमात्र कायम गरी अन्तशुल्क पूर्ण रुपमा छुट गरेको छ भने फलामे बिलेट्सको आयातमा ४ दशमलव ७५ प्रतिशत भन्सार दर कायम गरी अन्तशुल्क दर प्रति मेट्रिक टन ३ हजार ५ सय रुपैयाँ कायम गरेको छ । त्यस्तै वायर उद्योगको कच्चापदार्थ एमएस वायरमा साविक ५ प्रतिशत लाग्ने भन्सार महसुललाई बजेटमार्फत वृद्धि गरी १० प्रतिशत पुऱ्याइएको छ भने भन्सार बिन्दुमै लगाइँदै आएको प्रति मेट्रिक टन २ हजार ५ सय रुपैयाँ अन्तशुल्क बढाएर ४ हजार ५ सय रुपैयाँ पुऱ्याइएको छ ।

यस खालको असमान र विभेदकारी व्यवस्थाले बिलेट्सबाट फलामे छड उत्पादन गर्ने स्टिल उद्योग र एमएस वायरबाट वायर उत्पादन गर्ने उद्योगहरुको उत्पादन लागत महँगो पर्न गई समान प्रकृतिका उत्पादनसँग प्रतिस्पर्धा गर्न नसकी उद्योग धरासयी हुने पञ्चकन्या स्टिलका उपमहाप्रबन्धक देवेन्द्र साहुले बताए । उनले भने, ‘यो नीतिले नेपालका करिब ८० प्रतिशत डन्डी तथा वायर उद्योगलाई मर्कामा पारेको छ ।’

बिलेट्स आयात गरी डन्डी बनाउने उद्योगहरुको संख्या अत्याधिक हुँदाहुँदै पनि स्पन्ज आइरनबाट डन्डी तथा वायर उत्पादन गर्ने सीमित उद्योगको योजनालाई सहयोग पुग्ने गरी सरोकारवाला र उद्योगीहरुसँग छलफल बिना नै यस खालको विभेदकारी व्यवस्था लागू गरिएको व्यवसायीले बताएका छन् ।


बिहान साढे ९ बजे भैरहवाको बुद्ध चोकमा जम्मा भएका उद्योगी, कर्मचारी, मजदुर र उद्योग वाणिज्य महासंघ प्रदेश र सिद्धार्थ उद्योग वाणिज्य संघका पदाधिकारी समेतको जुलुसले विभिन्न नारा लगाउँदै बर्मेली टोल हुँदै जिल्ला प्रशासन कार्यालय पुगेर प्रमुख जिल्ला अधिकारी मार्फत् संघीय अर्थमन्त्रीलाई ज्ञापनपत्र बुझाएका थिए । यस व्यवस्थाले नेपालमा संचालनमा रहेका ३० वटा स्टिल्स उद्योगमध्ये स्पन्ज आइरनको आयात तथा पत्रु पगालेर डन्डी बनाउने ८ वटा मात्र उद्योगलाई एकपक्षीय रुपमा अत्याधिक लाभ गरेको एसआर स्टिल्स तथा एसआर आद्योगिक समूहका प्रबन्ध निर्देशक सुरज उप्रेतीले बताए ।

स्पन्ज आइरनको आयातमा भन्सार महसुल ३ प्रतिशत कायम गरिनुपर्ने, अन्तशुल्क कच्चा पदार्थको आयात गर्दा भन्सार बिन्दुमा नभई तयारी वस्तुमा लगाइनु पर्ने, वायर उद्योगको कच्चा पदार्थ एमएस वायरमा बृद्धि गरी १० प्रतिशत पुऱ्याइएको भन्सार महसुल घटाई साविक ५ प्रतिशत लाग्ने व्यवस्था कायम गरिनुपर्ने व्यवसायीको माग छ ।

प्रकाशित : असार २, २०७९ १४:०३
प्रतिक्रिया
पठाउनुहोस्

भैरहवामा खुल्यो वैदेशिक रोजगार व्यवस्थापन शाखा 

माधव ढुंगाना

भैरहवा — वैदेशिक रोजगारीमा जाने नेपाली श्रमिकको सुविधाका लागि भैरहवामा ‘वैदेशिक रोजगार व्यवस्थापन शाखा’ को स्थापना गरिएको छ । यो शाखा संचालनमा आएपछि वैदेशिक रोजगारीमा जाने नेपाली श्रमिकलाई श्रम सम्बन्धी आवश्यक प्रकृया पुरा गराउन काठमाडौंमा पुग्नु पर्ने बाध्यता अन्त्य भएको छ । 

स्थापित उक्त शाखाको बुधबार श्रम रोजगार तथा सामाजिक विकास मन्त्री किसान श्रेष्ठले उद्घाटन गरे । भैरहवाबाट अन्तर्राष्ट्रिय उडान संचालन भएसँगै पायक पर्ने श्रमिकलाई सहज बनाउनका लागि वैदेशिक रोजगार व्यवस्थापन शाखाको स्थापना गरिएको उनले बताए । भैरहवास्थित गौतम बुद्ध अन्तर्राष्ट्रिय विमानस्थलबाट उडान संचालन गरिएपछि लुम्बिनी प्रदेशमात्र नभएर सुदूरपश्चिम, कर्णाली, वाग्मती र गण्डकी प्रदेशका श्रमिकलाई वैदेशिक रोजगारीमा जान सहज र पायक पर्ने उनले बताए ।

भैरहवाबाट वैदेशिक रोजगारीमा जाने नेपाली श्रमिकलाई छुट दिएर सुलभ सेवा दिनका लागि उनले होटल, ट्राभल एजेन्सी लगायतका सम्बद्ध व्यवसायीलाई आग्रह गरे । ‘स्वदेशका युवाशक्तिलाई विदेश पठाएर विकास गर्न नसकिने भएपनि बाध्यकारी अवस्था भएको छ’ मन्त्री श्रेष्ठले भने, ‘उनीहरुले विदेशमा सिकेका सीपलाई भित्र्याएर सदुपयोग गरिने छ ।’ यसका लागि सातै प्रदेशमा सीपमुलक तालिम प्रतिष्ठान स्थापना गर्न अहिलेको बजेटमा व्यवस्था गरिएको उनले बताए ।

सबै अनलाइन प्रकृयाबाट सेवा गरिने यस शाखा कार्यालयमा तत्कालका लागि शाखा अधिकृतस्तरको कर्मचारी सहितको टिमबाट सेवा सुरु गरिने र लगत्तै उपसचिव दरबन्दी सहितको टिमको व्यवस्थापन गरिने मन्त्री श्रेष्ठले बताए । मन्त्रालयका सचिव एकनारायण अर्यालले वैदेशिक रोजगारी सम्बन्धी सरकारले प्रदान गर्ने सेवालाई अब काठमाडौंमा मात्र सीमित नराखी भैरहवा र त्यसपछि पोखराबाट सुरु गरिने बताए । ‘राजधानीमा मात्र केन्द्रित रहेको सेवालाई अन्यत्रबाट पनि प्रदान गर्न समेनपावर व्यवसायी पनि सरकारको पछि पछि लाग्नुस्’ अर्यालले भने, ‘यसका लागि मेनपावर व्यवसायीलाई के सहयोग गर्नु पर्छ ? मन्त्रालय र सरकार तयार छ ।’


प्रकाशित : असार १, २०७९ १४:४२
पूरा पढ्नुहोस्
प्रतिक्रिया
पठाउनुहोस्
×