भैरहवामा खुल्यो वैदेशिक रोजगार व्यवस्थापन शाखा - अर्थ / वाणिज्य - कान्तिपुर समाचार

भैरहवामा खुल्यो वैदेशिक रोजगार व्यवस्थापन शाखा 

माधव ढुंगाना

भैरहवा — वैदेशिक रोजगारीमा जाने नेपाली श्रमिकको सुविधाका लागि भैरहवामा ‘वैदेशिक रोजगार व्यवस्थापन शाखा’ को स्थापना गरिएको छ । यो शाखा संचालनमा आएपछि वैदेशिक रोजगारीमा जाने नेपाली श्रमिकलाई श्रम सम्बन्धी आवश्यक प्रकृया पुरा गराउन काठमाडौंमा पुग्नु पर्ने बाध्यता अन्त्य भएको छ । 

स्थापित उक्त शाखाको बुधबार श्रम रोजगार तथा सामाजिक विकास मन्त्री किसान श्रेष्ठले उद्घाटन गरे । भैरहवाबाट अन्तर्राष्ट्रिय उडान संचालन भएसँगै पायक पर्ने श्रमिकलाई सहज बनाउनका लागि वैदेशिक रोजगार व्यवस्थापन शाखाको स्थापना गरिएको उनले बताए । भैरहवास्थित गौतम बुद्ध अन्तर्राष्ट्रिय विमानस्थलबाट उडान संचालन गरिएपछि लुम्बिनी प्रदेशमात्र नभएर सुदूरपश्चिम, कर्णाली, वाग्मती र गण्डकी प्रदेशका श्रमिकलाई वैदेशिक रोजगारीमा जान सहज र पायक पर्ने उनले बताए ।

भैरहवाबाट वैदेशिक रोजगारीमा जाने नेपाली श्रमिकलाई छुट दिएर सुलभ सेवा दिनका लागि उनले होटल, ट्राभल एजेन्सी लगायतका सम्बद्ध व्यवसायीलाई आग्रह गरे । ‘स्वदेशका युवाशक्तिलाई विदेश पठाएर विकास गर्न नसकिने भएपनि बाध्यकारी अवस्था भएको छ’ मन्त्री श्रेष्ठले भने, ‘उनीहरुले विदेशमा सिकेका सीपलाई भित्र्याएर सदुपयोग गरिने छ ।’ यसका लागि सातै प्रदेशमा सीपमुलक तालिम प्रतिष्ठान स्थापना गर्न अहिलेको बजेटमा व्यवस्था गरिएको उनले बताए ।

सबै अनलाइन प्रकृयाबाट सेवा गरिने यस शाखा कार्यालयमा तत्कालका लागि शाखा अधिकृतस्तरको कर्मचारी सहितको टिमबाट सेवा सुरु गरिने र लगत्तै उपसचिव दरबन्दी सहितको टिमको व्यवस्थापन गरिने मन्त्री श्रेष्ठले बताए । मन्त्रालयका सचिव एकनारायण अर्यालले वैदेशिक रोजगारी सम्बन्धी सरकारले प्रदान गर्ने सेवालाई अब काठमाडौंमा मात्र सीमित नराखी भैरहवा र त्यसपछि पोखराबाट सुरु गरिने बताए । ‘राजधानीमा मात्र केन्द्रित रहेको सेवालाई अन्यत्रबाट पनि प्रदान गर्न समेनपावर व्यवसायी पनि सरकारको पछि पछि लाग्नुस्’ अर्यालले भने, ‘यसका लागि मेनपावर व्यवसायीलाई के सहयोग गर्नु पर्छ ? मन्त्रालय र सरकार तयार छ ।’


प्रकाशित : असार १, २०७९ १४:४२
प्रतिक्रिया
पठाउनुहोस्

भैरहवा नजिकै रात्रिबस दुर्घटना

माधव ढुंगाना

भैरहवा — जनकपुरबाट भैरहवातर्फ जाँदै गरेको यात्रुसहितको बस आइतबार बिहान भैरहवा-परासी हुलाकी राजमार्ग खण्डमा दुर्घटनामा परेको छ ।

दुर्घटनामा कति जनाको मृत्यु भयो भन्नेबारे प्रमाणित रुपमा खुल्न बाँकी छ । सुरक्षाकर्मी र स्थानीयको उद्धारमा करिब ३ दर्जन घाइते यात्रुलाई उद्धार गरी अस्पतालमा पुर्‍याइएको छ ।

लु २ ख ३८४१ नम्बरको उक्त रात्रिकालीन बस आइतबार बिहान पौने ५ बजेतिर भैरहवा नजिकैको रोहिणी खोलाको पुलबाट तल खोलामा खसेको हो । जिल्ला ट्राफिक प्रहरी कार्यालय रुपन्देहीका प्रहरी निरीक्षक केशव केसीले तीनवटा जेसीभीको माध्यमबाट दुर्घटनामा परेको बसलाई पल्टाएर यात्रुको उद्धार गर्ने क्रम जारी रहेको बताए ।

केसीका अनुसार अहिलेसम्म ३२ जना यात्रुलाई उद्धार गरी भैरहवास्थित भीम अस्पतालमा र युनिभर्सल शिक्षण अस्पतालमा पुर्‍याइएको छ । ‘दुर्घटनामा केही यात्रुको मृत्यु पनि भएको हुन सक्छ तर यसबारे अस्पतालबाटै प्रमाणित हुन सक्ला‚’ केसीले भने ।

प्रकाशित : जेष्ठ २२, २०७९ ०६:०५
पूरा पढ्नुहोस्
प्रतिक्रिया
पठाउनुहोस्
×