विद्युत् जडित क्षमता २ हजार २ सय ५ मेगावाट पुग्यो- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

विद्युत् जडित क्षमता २ हजार २ सय ५ मेगावाट पुग्यो

कान्तिपुर संवाददाता

काठमाडौँ — नेपालको कुल जडित विद्युत् क्षमता २ हजार २ सय ५ मेगावाट बराबर पुगेको छ । २०७८ असार मसान्तसम्ममा १ हजार ६ सय ६५ मेगावाट रहेको जडित क्षमता फागुन मसान्तसम्म ८ महिनामा ५ सय ४० मेगावाट अर्थात् ३०.९ प्रतिशतले बढेको आर्थिक सर्वेक्षण २०७८/७९ मा उल्लेख छ ।

हाल राष्ट्रिय प्रसारणलाइनमा जोडिएको कुल बिजुलीमध्ये २ हजार २२ मेगावाट जलविद्युत्, ४९.७६ मेगावाट सौर्य प्लान्टबाट, ५३.४ मेगावाट थर्मल प्लान्टबाट, ७४ मेगावाट वैकल्पिक ऊर्जा प्रबर्द्धन केन्द्रबाट र ६ मेगावाट चिनी मिलबाट उत्पादन भइरहेको छ । जलविद्युत् आयोजनामध्ये नेपाल विद्युत् प्राधिकरणको स्वामित्वमा सञ्चालित परियोजनाबाट ५८१ मेगावाट र निजी क्षेत्रबाट सञ्चालित विद्युत् परियोजनाबाट १ हजार ४ सय ४० मेगावाट बिजुली उत्पादन भइरहेको छ ।

आर्थिक सर्वेक्षणअनुसार २०७८ फागुनसम्ममा ९४ प्रतिशत जनसंख्यामा विद्युतको पहुँच पुगेको छ । त्यस्तै विद्युत् उपयोग गर्ने ग्राहकको संख्या ५२ लाख २८ हजार पुगेको छ । यो संख्या सामुदायिक संस्थाबाहेक हो । हाल सामुदायिक संस्थातर्फ ५ लाख ८० हजार ग्राहकले विद्युत् सेवा उपयोग गरिरहेका छन् ।

हालसम्म ६६ केभी क्षमताभन्दा माथिको प्रसारणलाइन ४ हजार ७ सय ९५ सर्किट किलोमिटर पुगेको छ भने वितरणतर्फ १ लाख ६३ हजार २ सय २ किलोमिटर पुगेको छ । चालु आर्थिक वर्षको ८ महिना अवधिसम्ममा भारतबाट ५ सय ५७ गिगावाट आवर विद्युत् आयात भएको र १ सय ८३ गिगावाट आवर बराबर विद्युत् निर्यात भएको जनाइएको छ । चालु आर्थिक वर्षको अन्त्यसम्ममा विभिन्न १८ वटा विद्युत् आयोजना सम्पन्न भई ८ सय ४३ मेगावाट राष्ट्रिय प्रसारणलाइनमा जोडिने लक्ष्य राखिएको छ । त्यस्तै आगामी आर्थिक वर्ष २०७९/८० मा ४३ वटा आयोजना सम्पन्न भई थप ७ सय १३ मेगावाट बिजुली राष्ट्रिय प्रणालीमा जोडिने अनुमान छ । प्रसारणलाइनतर्फ चालु आर्थिक वर्षको अन्त्यसम्ममा विभिन्न ९ वटा आयोजनाको ५ सय ९३ सर्किट किलोमिटर निर्माण सम्पन्न हुने लक्ष्य राखिएको छ ।

प्रकाशित : जेष्ठ १५, २०७९ १४:०६
प्रतिक्रिया
पठाउनुहोस्

'पाइलटको मोबाइलको नेटवर्क चलिरहेको छ, हामी ट्रेसिङ गरिरहेका छौं'

कान्तिपुर संवाददाता

काठमाडौँ — आइतबार बिहानदेखि सम्पर्कविहीन भएको तारा एयरको 'अल्फा इको ट्यांगो' कल साइन भएको विमानका पाइलटको मोबाइलको नेटवर्क चलिरहेको पाइएको छ । जिल्ला प्रशासन कार्यालय मुस्ताङले विमानका पाइलटको मोबाइलमा टेलिकमको नेटवर्कले काम गरिरहेको पाइएको जनाएको छ । त्यही अनुसार लोकेसन ट्रेसिङको काम भइरहेको प्रशासकीय अधिकृत देवेन्द्रराज पाण्डेले कान्तिपुरलाई जानकारी दिए ।

उनले भने,'हामीले खोजी कार्यलाई तीव्रता दिइरहेका छौं । स्थल र हवाइ मार्गबाटै खोजी गरिरहेका छौं । पाइलटको मोबाइलमा टेलिकमको नेटवर्कले काम गरिरेहको पाइएको छ । हामीले त्यही अनुसार लोकेसन ट्रेसिङ गरिरेहका छौं ।' धावालागिरी हिमाल नजिकै नै पाइलटको मोबाइलमा टेलिकमको नेटवर्कले काम गरिरहेको देखिएको छ ।

कास्कीको पोखराबाट आइतबार बिहान ९ बजेर ५५ मिनेटमा जोमसोमका लागि उडेको तारा एयरको विमान सम्पर्कविहीन भएको छ । १० बजेर २० मिनेटमा अवतरण हुनुपर्ने अल्फा इको ट्यांगो कल साइन भएको जहाज ११ बजिसक्दा पनि सम्पर्कमा आएको छैन ।

विमानमा क्याप्टेन प्रभाकरप्रसाद घिमिरे, को-पाइलट उत्सव पोखरेल र एयर होस्टेज किस्मी थापा थिए । उक्त जहाजमा १३ नेपाली, ४ भारतीयसहित २ अन्य देशका नागरिक थिए ।

मुस्ताङका प्रमुख जिल्ला अधिकारी नेत्रप्रसाद शर्माका अनुसार एकपटक जोमसोम आकाशमा उडेको देखिएको जहाज धौलागिरि हिमालतर्फ फर्किएको र त्यसपछि सम्पर्कमा आएको छैन ।

प्रकाशित : जेष्ठ १५, २०७९ १४:०४
पूरा पढ्नुहोस्
प्रतिक्रिया
पठाउनुहोस्
×