‘सञ्चार तथा सूचना प्रविधिमा उल्लेख्य प्रगति’- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

‘सञ्चार तथा सूचना प्रविधिमा उल्लेख्य प्रगति’

सजना बराल

काठमाडौँ — देशमा सूचना तथा सञ्चारको पहुँचमा निरन्तर वृद्धि हुँदै गएको र प्रविधिको विस्तारमा उल्लेख्य प्रगति भइरहेको आर्थिक सर्वेक्षण ०७८/७९ ले देखाएको छ । प्रविधि विस्तारको फेहरिस्त प्रस्तुत गरिरहँदा गुणस्तरीय सेवा प्रवाहमा पनि सरकारले उत्तिकै ध्यान दिन जरुरी रहेको जानकारहरू बताउँछन् ।

शनिबार सार्वजनिक आर्थिक सर्वेक्षणमा इन्टरनेट ग्राहकको घनत्व लक्ष्यभन्दा २३ प्रतिशत बढी अर्थात् ११६.९१ प्रतिशत पुगेको उल्लेख छ । आव ०७७/७८ मा इन्टरनेट ग्राहक घनत्व ९०.५६ प्रतिशत मात्र थियो ।

२०७८ को फागुनसम्म डाटा/इन्टरनेट सेवा प्रयोगकर्ताको संख्या ३ करोड ६८ लाख ८९ हजार ७ सय ४१ छ । पाँच वर्षअघि इन्टरनेट प्रयोग गर्नेहरू साढे १ करोड मात्रै थिए । गत आवमा ६५.४७ प्रतिशत रहेको मोबाइल ब्रोडब्यान्ड सेवा अहिले ९०.९० प्रतिशत पुगेको भनिएको छ । सर्वेक्षणमा टेलिफोन सेवाको विस्तार र प्रयोगकर्ता संख्या पनि मनग्गे बढेको विवरण प्रस्तुत गरिएको छ । पछिल्लो तथ्यांकमा मोबाइल टेलिफोनका ग्राहक संख्या ४ करोड २२ लाख पुगेका छन् । यो पनि लक्ष्यभन्दा २२ लाख बढी हो । आधारभूत (फिक्स्ड) टेलिफोन सेवा पनि १६ हजारले बढेको छ । मुक्तिनाथ मन्दिर र अन्नपूर्ण सर्किटअन्तर्गतका सार्वजनिक स्थलमा वाइफाई हटस्पट सञ्चालनमा आएको विवरणमा पनि सर्वेक्षणमा समेटिएको छ ।

देशका ७ सय ३८ वटा पालिकामा ब्रोडब्यान्ड इन्टरनेट पहुँच पुगेको सर्वेक्षणले जनाएको छ । आव ०७६/७७ मा ४ सय ३१ पालिकामा ब्रोडब्यान्ड इन्टरनेट सेवा पुगेकामा त्यसपछि ०७७/७८ मा ७ सय १३ मा विस्तार भई हाल ७ सय ३८ पालिकामा द्रुत गतिको इन्टरनेट सेवा पुगेको भनिएको छ । कुल ६ हजार ७ सय ४३ वडामध्ये ६ हजार १ सय ९० मा इन्टनेट सेवा पुर्‍याइएको बताइएको छ । नेपाल दूरसञ्चार प्राधिकरणले ०७९ वैशाख मसान्तसम्मको विवरणमा पनि ग्रामीण दूरसञ्चार विकास कोष प्रयोग गरी सञ्चालनमा ल्याइएका इन्टरनेट जडानसम्बन्धी परियोजनामध्ये धेरैजसोको काम सकिएको उल्लेख छ । देशका ४२ निकायमा अनलाइनमार्फत सरकारी सेवा प्रवाह गर्ने लक्ष्य पूरा भएको सर्वेक्षणले देखाउँछ ।

हुलाकलगायत सरकारी निकायलाई कार्यालय स्वचालन प्रणाली (अफिस अटोमेसन सिस्टम) मा लैजाने काम सुरु भएको भनिएको छ । सरकारी निकायहरूलाई सर्भर, मेमोरी, स्टोरेज र नेटवर्क उपलब्ध गराउँदै आएको सरकारी क्लाउडमा हालसम्म २ सय ९५ निकायलाई स्रोत उपलब्ध गराइएको सर्वेक्षणमा उल्लेख छ । ‘स्थानीय तहहरूका लागि कमन टेम्प्लेटमा निर्मित मोबाइल एप्स’ को स्तरोन्नति गरी पालिकाहरूले प्रयोग गर्ने वेबसाइटसँग अन्तरआबद्ध गरिएको सरकारले जनाएको छ । अप्टिकल फाइबर र फिक्स्ड ब्रोडब्यान्ड सेवा विस्तारमा पनि उल्लेख्य प्रगति भएको सरकारी सर्वेक्षणले देखाउँछ ।

अवैध रूपमा भित्रिने मोबाइल फोन सेट नियन्त्रण रोक्न ल्याइने भनिएको मोबाइल डिभाइस व्यवस्थापन प्रणाली (एमडीएमएस) सञ्चालनमा आएको विवरण सर्वेक्षणमा छ । सिंहदबारमा रहेको राष्ट्रिय सूचना प्रविधि केन्द्रमा प्रणाली जडान गरी प्रारम्भिक रूपमा सञ्चालनमा आएको भनिएको छ ।

प्रकाशित : जेष्ठ १५, २०७९ ०७:२९
प्रतिक्रिया
पठाउनुहोस्

फ्रेन्च ओपन : स्वाटेक र झेङ भिड्ने

एएफपी

पेरिस — विश्व नम्बर एक इगा स्वाटेक लगातार ३१ खेल जित्दै शनिबार फ्रेन्च ओपन टेनिसको उपाधि होडमा कायम रहने शीर्ष दसकी एक्ली खेलाडी भएकी छन् । तेस्रो वरीयताकी स्पेनकी पाउला बाडोसा र सातौं वरीयताकी बेलारुसकी आर्यना सबालेन्का भने तेस्रो चरणबाटै बाहिरिएका छन् ।

सन् २०२० की च्याम्पियन स्वाटेकले तीनपल्ट सर्भिस गुमाए पनि ९५ औं वरीयताकी मोन्टोनेग्रोकी डान्का कोभिनिकमाथि ६–३ र ७–५ को जित रचिन् । कोभिनिचले दोस्रो सेटमा १–४ ले पछाडि परेको स्थितिमा सुधार गरेर ५–४ को अग्रता लिएकी थिइन् । तर, पोलिस खेलाडीले खेल नियन्त्रणमा लिँदै उत्कृष्ट सर्भिसमार्फत जित निकालिन् ।

‘म वास्तवमै आक्रामक खेल्न चाहन्थें तर कहिलेकाहीं लाग्थ्यो कि मैले अलि बढी नै शक्ति लगाएर प्रहार गरिरहेकी थिएँ, जसलाई नियन्त्रण गर्न गाह्रो भइरहेको थियो,’ २० वर्षीया स्वाटेकले भनिन् । स्वाटेकले लगातार हात पारेको जित टुरमा अमेरिकी सेरेना विलियम्सले सन् २०१३ मा निकालेको निरन्तर ३४ जितयताकै उत्कृष्ट हो । उनले अर्को चरणमा चिनियाँ किशोरी झेङ क्विनवेनको सामना गर्नेछिन् ।

डेब्युमै अन्तिम १६ मा स्थान बनाएकी झेङले लगातार ६१ औं ग्रान्ड स्लाम खेलिरहेकी फ्रान्सकी भेट्रान एलिजे कोर्नेटले प्रतिस्पर्धा त्यागेपछि सफलता पाएकी थिइन् । उनी ४४ मिनेटभित्र ६–०, ३–० ले अगाडि रहेको अवस्थामा कोर्नेट रिटायर्ड भएकी थिइन् । चिनियाँ ली नाले सन् २०११ मा फ्रेन्च ओपनको उपाधि जितेकी थिइन् । पेरिसमा अन्तिम १६ मा पुग्ने चौथो चिनियाँ बन्नेक्रममा झेङले यसअघि २०१८ की च्याम्पियन सिमोना हालेपलाई दोस्रो चरणमा हराएकी थिइन् ।

‘मैले गनुपर्ने सबै गरेकी थिएँ,’ १९ वर्षीया झेङले भनिन्, ‘मलाई सधैं थाह थियो कि मैले स्तर राम्रो बनाउनुपर्छ । अब यसलाई कायम राख्न चाहन्छु ।’

गत वर्ष क्वाटरफाइनल पुगेकी स्पेनी बाडोसा यसपालि चोटका कारण अन्तिम ३२ बाटै बाहिरिनुपर्‍यो । उनले रुसकी भेरोनिका कुडर्मेटोभा विरुद्ध ६–३, २–१ ले पछाडि रहेको अवस्थामा खेल त्यागेकी थिइन् । सबालेन्काको चुनौती इटालीकी क्यामिला जर्जीले ४–६, ६–१, ६–० ले समाप्त पारिन् । क्यामिला पहिलोपल्ट चौथो चरणमा प्रवेश गरेकी हुन् । पुरुषतर्फ शीष १० का खेलाडीमध्ये नौजना अझै प्रतिस्पर्धामा छन् । विश्व नम्बर एक डानिल मेद्भेदेभले सर्बियाली मियोमिर केच्मानोभिच (२८ औं वरीयता) लाई ६–२, ६–४, ६–२ ले पराजित गरे । तेस्रो चरणसम्म मेदभेदेभले कुनै पनि सेट गुमाएका छैनन् । उनले अन्तिम १६ को लागि यूएस ओपन च्याम्पियन मारिन सिलिच वा फ्रान्सेली जिल्स सिमोनविरुद्ध प्रतिस्पर्धा गर्नेछन् ।

रुसका मेदभेदेभ गत वर्ष क्वाटरफाइनल पुग्नुअघि पेरिसमा सुरुका चार यात्रामा पहिलो चरणबाटै फर्किएका थिए । ‘यो निकै कठिन रह्यो,’ युएस ओपन च्याम्पियन रहेका उनले भने, ‘सबैले भनिरहेका छन् कि पहिलो चरण पनि पार नगरी म कसरी विश्व नम्बर २ भएँ ।’ उनले करिअरका १३ मध्ये १२ उपाधि हार्डकोर्टमा जितेका छन् ।

प्रकाशित : जेष्ठ १५, २०७९ ०७:२७
पूरा पढ्नुहोस्
प्रतिक्रिया
पठाउनुहोस्
×