विदेशी लगानी भित्र्याउन प्रशासनिक प्रक्रियामा सहजीकरण गर्छाैं: राजश्व सचिव
काठमाडौँ — राजश्व सचिव कृष्णहरि पुष्करले विदेशी लगानी भित्र्याउन कानुनी, प्राविधिक र प्रशासनिक प्रक्रियामा सहजीकरण गर्ने बताएका छन्। मेक इन नेपाल स्वदेशी समिट २०२२ मा बोल्दै उनले जटिलतालाई सरलीकरण गर्नेगरी गृहकार्य भइरहेको र त्यसलाई बजेटमार्फत सम्बोधन गरिने बताए ।
‘निजी क्षेत्र, व्यवसायीले भनेका विषयमा सरकारले विभिन्न तरिकाबाट सहयोग गर्छ । कानुनमा परिवर्तन वा सुधार गरेर हुन्छ कि सम्बन्धित क्षेत्रमा लगानी गर्न अनुदान दिएर हुन्छ, योजनागत रुपमा अर्थ मन्त्रालय अगाडि बढेको छ,’ राजश्व सचिव पुष्करले भने, ‘विशेषगरी नेपालमा विदेशी लगानी भित्र्याउन रहेका केही कानुनी प्रविधिक प्रशासनिक प्रक्रियाहरु सहजीकरण र सरलीकरण गर्नेगरी गृहकार्य भइरहेको छ । छिट्टै सम्बोधन हुन्छ ।’
त्यस्तै, नेपाल सरकारले पराम्परागत कार्य शैलीलाई सार्वजनिक निजी साझेदारीमार्फत अगाडि बढाउने प्रयास गरिरहेको उनले बताए । ‘जग्गाको प्रक्रियागत विषय, कानुनी प्रक्रिया व्यवस्थापन गर्देछौ,’ उनले भने, ‘आयात/निर्यातको हकमा निजी क्षेत्रले दिएको सुझाव अनुसार आन्तरिक उत्पादन, निर्यात बढाउन बजेटमार्फत सम्बोधन गर्नेछौं ।’