चरा ठोक्किएको आशंकामा गौतम बुद्ध विमानस्थलमा रोकियो विमान- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

चरा ठोक्किएको आशंकामा गौतम बुद्ध विमानस्थलमा रोकियो विमान

माधव ढुंगाना

भैरहवा — अवतरण गर्ने क्रममा विमानमा चरा ठोक्किएको आशंकापछि आइतबार राति कतारका लागि उड्नुपर्ने जजिरा एयरलाइन्सको विमान भैरहवास्थित गौतम बुद्ध अन्तर्राष्ट्रिय विमानस्थलमै रोकिएको छ ।  

कतारबाट नियमित उडान तालिकाअनुरुप उडान भरेर गौतम बुद्ध अन्तर्राष्ट्रिय विमानस्थलमा अवतरण गर्ने क्रममा विमानमा चरा ठोक्किएको विमानका चालकले बताएको विमानस्थलका निमित्त महाप्रबन्धक तथा प्रवक्ता श्याम किशोर साहले जनाए ।

‘उक्त जानकारी पाउनासाथ तत्काल विमानको जाँच गर्दा जहाजको अगाडि नोजमा र इन्जिन बाहिरको कभरमा रगतको टाटा देखियो‚’ साहले भने, ‘विमानमा चरा ठोक्किएको हुन सक्छ । तर, ठोक्किएको चराको अवशेष भने कतै पनि फेला परेन ।’

विमान र रन-वेमा कतै पनि ठोक्किएको चराको अवशेष फेला नपरेपछि चरा विमानको इन्जिनभित्र पसेको हुन सक्ने शंकाले प्राविधिक जाँच गर्नका लागि विमान रोकिएको उनले बताए ।

विमानको जाँचका लागि काठमाडौंबाट प्राविधिक आउने र सबै चेकजाँच गरेर विमान सुरक्षित रहेको प्रमाणित भएपछि मात्र बल्ल उडान हुने छ ।

जजिरा एयरलाइन्सको एयरबस-३२० विमान १ सय २१ जना यात्रु लिएर आइतबार राति २ बजे भैरहवामा अवतरण गरेको थियो । यो विमानले कतार-भैरहवाबीच हवाई उडान गरेको चौथो पटक हो ।

प्रकाशित : जेष्ठ ९, २०७९ १०:१०
प्रतिक्रिया
पठाउनुहोस्

सचिवालय सुदृढीकरण पहिलो काम : नवनिर्वाचित मेयर हमाल

चित्रांग थापा

धनगढी — सुदूरपश्चिम प्रदेशको एक्लो उपमहानगरपालिका धनगढीको प्रमुखमा स्वतन्त्र उम्मेदवार गोपाल हमाल भारी मतान्तरले विजयी भएका छन् । उनले सत्ता गठबन्धनबाट कांग्रेस केन्द्रीय सदस्य एवं निवर्तमान नगरप्रमुख नृपबहादुर वडलाई झन्डै दोब्बर मतले पराजित गरेका हुन् । आँप चुनाव चिह्न पाएका हमालले २६ हजार ८ सय ६५ मत र वडले १४ हजार ८ सय १७ मत पाए । उनै नवनिर्वाचित मेयर हमालसँग गरिएको संक्षिप्त कुराकानी :

पद बहालीपछि पहिलो महत्त्वपूर्ण काम के गर्नुहुन्छ ?

मेरो पहिलो प्राथमिकता उपमहानगरपालिकाको सचिवालय सुदृढीकरण गर्नेछ । आर्थिक वर्षको अन्त्यतिर आइपुगेका छौं । चालु आर्थिक वर्षका अधुरा योजना पूरा गर्ने गरी काम गर्नेछौं ।

भोट माग्दा गरेका वाचा पूरा गर्न कत्तिको चुनौती देख्नुभएको छ ?

शिक्षा, स्वास्थ्य सेवा र अव्यवस्थित सहरी क्षेत्रको विकास चुनौतीपूर्ण नै छन् । बेरोजगारी अर्को ठूलो समस्या छ । जसरी पनि धनगढी बनाउने योजना हो । चरणबद्ध रूपमा सबैबाट सहयोग लिएर अघि बढ्छु ।

विकासका कुरा गर्दा सबै काम एकैपटक सम्भव छ र ?

म आफू पूर्णरूपले समर्पित भएर काममा जुट्छु । विकासको कुरा गर्दा प्रणालीको विकास प्रमुख कुरा हो । सचिवालयलाई जवाफदेही बनाएर नगरको पञ्च वर्षीय योजनासँगै गुरुयोजना तयार गरेर अघि बढ्ने मेरो प्रतिबद्धता छ ।

नगरका प्रमुख समस्या के हुन् ?

अव्यवस्थित सहरीकरण प्रमुख समस्या हो । ऐलानी जग्गा व्यवस्थापन, तटबन्ध निर्माण, ढल निकासजस्ता सहरी क्षेत्रका समस्या समाधान गर्नका लागि हामी योजनाबद्ध तरिकाले अगाडि बढेमा पक्कै समाधान हुने विश्वास छ ।

प्रकाशित : जेष्ठ ९, २०७९ १०:०४
पूरा पढ्नुहोस्
प्रतिक्रिया
पठाउनुहोस्
×