मुलुकमा खाद्य संकट निम्तिन सक्छ : अध्यक्ष गोल्छा- अर्थ / वाणिज्य - कान्तिपुर समाचार

मुलुकमा खाद्य संकट निम्तिन सक्छ : अध्यक्ष गोल्छा

कान्तिपुर संवाददाता

काठमाडौँ — नेपाल उद्योग वाणिज्य महासंघका अध्यक्ष शेखर गोल्छाले मुलुकमा खाद्यान्न संकट निम्तिन सक्ने बताएका छन् । देशको कृषि उत्पादनले बढ्दो खाद्यान्न आवश्यकतालाई पुरा गर्न नसकेको र वार्षिक करिब छ लाख मेट्रिक टन खाद्यान्न अपुग हुने गरेको सरकारी तथ्यांक रहेको उनले बताए ।

महासंघले आज आयोजना गरेको कार्यक्रममा बोल्दै गोल्छाले भने ‘रुस र युक्रेन युद्धको कारण उक्त देशहरुमा गहुँको उत्पादनमा कमी आएको छ । विश्वको दोस्रो सबैभन्दा बढी गहुँ उत्पादन गर्ने देश भारतले गहुँको निर्यात रोक्ने सूचना जारी गरिसकेको छ । इजिप्ट लगायतका केही युरोपेली मुलुकले पनि खाद्यान्न निर्यातमा कडाइ गर्न थालेका छन् । युक्रेनबाट नेपालमा कच्चा खाने तेल र खाद्यान्न लगायतका वस्तु ठूलो मात्रामा आयात हुने गर्दछ । हाल युक्रेनबाट हुने आयात प्रभावित भएको छ । विश्वव्यापी रुपमा खाद्यान्न आपूर्तिमा आइरहेको समस्याले समेत नेपालमा खाद्यान्न संकट निम्तिन सक्ने अवस्थालाई नजरअन्दाज गर्न सकिँदैन ।’

आयल निगमले एकैपटक पेट्रोल डिजेलमा प्रति लिटर १० रुपैयाँ मूल्य वृद्धि गर्दा पनि नोक्सानीको अवस्था देखिएकाले मूल्यवृद्धि अझै बढ्न सक्ने खतरा रहेको उनले औंल्याए । उनले भने ‘इन्धनको मूल्य बढ्दा ढुवानी र उत्पादनमा पनि केही हदसम्म लागत बढ्न जान्छ, यसले पनि बजार भाउ बढ्ने गर्दछ । रुस युक्रेन युद्धले मूल्यवृद्धि थप बढाइदियो ।’ विश्वभर नै बजार भाउ अहिले आकासिएको छ । संयूक्त राज्य अमेरिकामा मूल्यवृद्धिदर ८.३ प्रतिशत पुगेको, भारतमा सन् २०१४ यताकै उच्च मूल्यवृद्धि भएको बताउँदै उनले नेपाल अछुतो रहने अवस्थामा नरहेको उल्लेख गरे । नेपालमा सन् २०२० मे महिनामा प्रतिलिटर ८५ रुपैयाँ रहेको डिजेलको मूल्य निरन्तर बृद्धि भई हाल प्रति लिटर १५३ रुपैयाँ पुगेको छ । यसले ढुवानी खर्च वृद्धि हुँदा समग्र मूल्यवृद्धि बढेको छ ।


प्रकाशित : जेष्ठ ८, २०७९ १९:४९
प्रतिक्रिया
पठाउनुहोस्

मोरङको रंगेलीमा एमालेका बगडिया र पराजुली विजयी

९ वडामा एक सदस्यबाहेक सबैमा एमाले
विनोद भण्डारी

विराटनगर — मोरङको रंगेली नगरपालिकाको मेयर र उपमेयरमा एमालेका उम्मेदवार विजयी भएका छन् । पटकपटकको विवादले मतगणना रोकिएको यो नगरमा गठबन्धनका प्रतिनिधिले गणना बहिस्कार गरे पनि मोरङ प्रशासनमा सबै दलले सहमति जनाएपछि आइतबार सम्पन्न मतगणनामा रंगेलीको मेयरमा एमालेका निवर्तमान मेयर दीलीप बगडिया र उपमेयरमा भुमाकुमारी पराजुली विजयी भएका हुन् ।

यो नगरमा जनता समाजवादी पार्टीका एक जना वडा सदस्यबाहेक सबै वडामा एमालेका उम्मेदवार विजयी भएका छन् ।

मेयरमा बगडियाले गठबन्धनबाट कांग्रेसका मोदराज घिमिरेलाई ३ हजार ८ सय मतान्तरले पराजित गरेर लगातार दोस्रो पटक निर्वाचित भएका छन् । बगडियाले १२ हजार ८ सय ६१ मत ल्याउँदा घिमिरेले ९ हजार ६१ मत पाए ।

त्यसैगरी उपमेयरमा एमालेकै भुमा पराजुलीले ११ हजार ७ सय ९० मत ल्याउँदा गठबन्धनका पन्नालाल मण्डलले ५ हजार १ सय ७५ मत ल्याएको निर्वाचन अधिकृत रामहरी शर्मा काफ्लेले जानकारी दिए ।

मेयरमा विजयी बगोडया २०७४ को स्थानीय निर्वाचनमा माओवादी केन्द्रको तर्फबाट मेयरमा विजयी भएका थिए । उनी निर्वाचनको मिति घोषणा भएको केही दिनअघि एमालेमा प्रवेश गरेर मेयरका उम्मेदवार बनेका थिए ।

मुचुल्कामा उल्लेख भएभन्दा बढी मतपत्र भेटिएको विवादमा तीन दिनसम्म रंगेलीको मतगणना रोकिएको थियो । तर‚ निर्वाचन आयोगकको छानबिन समितिको प्रतिवदेनपछि निर्वाचन अधिकृतले गठबन्धन दलका प्रतिनिधिले बहिस्कार गरे पनि एमाले, राप्रपाका स्थानीय र जसपाका जिल्ला तहका प्रतिनिधिको उपस्थितिमा मतगणना सुरु गरेका थिए ।

सत्ता गठबन्धन दल कांग्रेस र माओवादी केन्द्र भने निर्वाचनमा धाँधली भएको भन्दै पुन मतदानको माग गर्दै सडकमा उत्रिँदा गठबन्धनकै अर्को घटक जसपाको जिल्ला तहका प्रतिनिधिले भने मतगणनामा सहभागीता जनाएका थिए ।

प्रकाशित : जेष्ठ ८, २०७९ १९:४७
पूरा पढ्नुहोस्
प्रतिक्रिया
पठाउनुहोस्
×