१ करोड नाघे एनटीसीका फोरजी ग्राहक- अर्थ / वाणिज्य - कान्तिपुर समाचार

१ करोड नाघे एनटीसीका फोरजी ग्राहक

कान्तिपुर संवाददाता

काठमाडौँ — नेपाल टेलिकमको फोरजी सेवाका ग्राहक संख्या १ करोडभन्दा बढी पुगेको कम्पनीले जनाएको छ । २०७८ चैत महिनाको विवरणअनुसार फोरजी ग्राहक आधार १ करोड ४ लाख २१ हजार ९७६ पुगेको हो । यस अवधिमा कम्पनीका थ्रीजी ग्राहक आधार ९४ लाख ८२ हजार ५८० रहेको एनटीसीको तथ्यांक छ ।

समग्रमा कम्पनीका मोबाइल सेवा प्रयोगकर्ता २ करोड २० लाख ९१ हजार ७८५ भएकोमा बाँकी २१ लाख ८७ हजार २२९ टुजी प्रविधिका ग्राहक छन् । अघिल्लो महिना अर्थात २०७८ फागुनमा फोरजी ग्राहक आधार ९८ लाख ९३ हजार ८७४ र थ्रीजी ग्राहक आधार ९९ लाख ४३ हजार ७२९ रहेको थियो ।

नेपाल टेलिकमले नेपालमा नै पहिलो पटक २०७३ पौष १७ गतेबाट काठमाडौं र पोखराबाट शुरु गरेको फोरजी÷एलटीई सेवालाई २०७६ असोज १५ गतेदेखि अत्याधुनिक प्रविधिमा अपग्रेड गरी देशभर विस्तार गरिरहेको छ । ‘फोरजी सेवा प्रयोग गर्नका लागि उपयुक्त मोबाइल फोन सेटका साथै सिम कार्ड सेवा पनि चल्ने हुनुर्पछ र फोरजी नेटवर्क उलपब्ध भएको क्षेत्रमा हुनु जरुरी छ,’ विज्ञप्तीमा भनिएको छ, ‘आफ्नो मोबाइल फोनबाट *444‍# डायल गरी प्राप्त निर्देशन अनुरुप फोरजी सेवा प्रयोग गर्न सिम परिवर्तन गर्नुपर्ने वा नपर्ने थाहा पाउन र फोरजी एक्टिभेट गरी सेवा सुचारु समेत गर्न सकिन्छ ।’

कम्पनीले हाल उपलब्ध गराइरहेको फोरजी डाटा सेवामार्फत अधिकतम फाइदा लिनका लागि १८०० तथा ८०० मेगाहर्ज दुवै ब्यान्डमा चल्ने मोबाइल सेट प्रयोग गर्नु आवश्यक हुने कम्पनीले जनाएको छ । मोबाइल इन्टरनेटको क्षेत्रमा एलटीई भनिने फोरजी प्रविधि मोबाइलमार्फत उच्च गतिको इन्टरनेटका साथै उच्च गुणस्तरको भ्वाइस कल सेवा पनि उपयोग गर्न सकिने अत्याधुनिक प्रविधि हो । यसबाट तीब्र गतिको इन्टरनेट प्राप्त हुने भएकाले गुणस्तरीय श्रव्य–दृश्य सामाग्रीहरु, गेम लगायत बढी ब्याण्डविथ आवश्यक हुने सामग्रीहरु सजिलै प्रयोग गर्न सकिन्छ ।

प्रकाशित : जेष्ठ ७, २०७९ १३:४१
प्रतिक्रिया
पठाउनुहोस्

धनुषाको सबैला नगरपालिकामा माओवादी विजयी

कान्तिपुर संवाददाता

धनुषा — सबैला नगरपालिकाको मेयरमा नेपाल कम्युनिष्ट पार्टी (माओवादी केन्द्र) उम्मेदवार कारीराम यादव ४ हजार २ सय १२ मत ल्याई विजयी भएका छन् ।

उनले निकटतम् प्रतिद्वन्द्वी नेपाली कांग्रेस उम्मेदवार जगतसुन्‍दर साह मधुपलाई १ हजार ३६ मतान्तरले पराजित गरेका हुन् । पराजित जगत सुन्‍दर साह मधुपले ४ हजार ७६ मत ल्याएका छन् ।

यस्तै, उपमेयरमा नेपाल कम्युनिष्ट पार्टी (माओवादी केन्द्र)की उम्मेदवार रहिमा खातुन ४ हजार ६ सय ९९ मतसहित विजयी भएकी छन् । उनका निकटतम प्रतिद्वन्द्वी नेपाल कम्युनिस्ट पार्टी (एमाले)की उम्मेदवार किरणकुमारी कापरले ३ हजार ६ सय ४ मत ल्याएकी छन् ।

सबैला नेकपा माओवादी केन्द्रका नेता मातृका यादवको गृहनगरसमेत हो । मेयरमा निर्वाचित कारीराम उनका भाइसमेत हुन् ।

प्रकाशित : जेष्ठ ७, २०७९ १३:१५
पूरा पढ्नुहोस्
प्रतिक्रिया
पठाउनुहोस्
×