नेपाली चिकित्सक सगरमाथा आरोहणमा
काठमाडौँ — कोभिड–१९ महामारीविरुद्धको लडाइँमा अग्रपंक्तिमा खटिएका स्वास्थ्यकर्मीको सम्मानका लागि काठमाडौंकी एक ३० वर्षीया चिकित्सक सगरमाथा आरोहणमा निस्किएकी छन् । ग्रान्डी अन्तर्राष्ट्रिय अस्पतालमा कार्यरत अर्घाखाँचीकी मेडिकल अफिसर प्रिती भुसाल यसपटकको वसन्तकालीन हिमाल आरोहण सिजनमा सगरमाथा चढ्न शुक्रबार त्यसतर्फ लागेकी हुन् ।
‘कोभिड माहामारीका बेला फ्रन्टलाइनर चिकित्सक, नर्स, फर्मासिष्ट, अस्पताल प्रशासनका कर्मचारी, सरसफाइमा खटिने मजदुर, एम्बुलेन्स चालक, सामाजिक कार्यकर्तालगायतको योगदानको उच्च सम्मान गर्न सगरमाथा आरोहण गर्दैछु,’ आइतबार नाम्चे पुगेकी भुसालले कान्तिपुरसँग भनिन् ।
७५ हजार सलामी दस्तुर पर्यटन विभागमा बुझाई नेपाली आरोहण दलको एकल नेतृत्व गर्दै गएकी प्रितीलाई हिमालयन सेपर्ड इको टुरिजमका तर्फबाट पेम्बा दोर्जे शेर्पाले गाइड गर्ने छन् । ढाकाबाट एमबीबीएस अध्ययन गरेकी भुसालले आफ्नो आरोहण अभियानले जलवायु परिवर्तनको असर र उच्च हिमाली भेगमा बढ्दै गइरहेको प्रदूषणबारे पनि जागरण गराउने बताएकी छन् ।