लुम्बिनी प्रादेशिक अस्पताल निर्माणमा 'सेटिङको ठेक्का' रद्द- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

लुम्बिनी प्रादेशिक अस्पताल निर्माणमा 'सेटिङको ठेक्का' रद्द

दवाव धान्न नसकेपछि प्राधिकरणका कार्यकारीले दिए राजीनामा
विमल खतिवडा

काठमाडौँ — लुम्बिनी प्रादेशिक अस्पताल निर्माणमा गरिएको ‘सेटिङ’ को ठेक्का रद्द भएको छ । सीमित निर्माण व्यवसायीले मात्र पाउने किसिमले ठेक्काको बोलपत्र आह्वान गरिएपछि मिलेमतो भएको आशंकामा आलोचना भएको थियो । चौतर्फी दवाव बढेपछि ठेक्का प्रक्रिया रद्द गरिएको लुम्बिनी अन्तर्गत प्रदेश पूर्वाधार विकास प्राधिकरणले जनाएको छ ।

ठेक्का रद्दसँगै प्राधिकरणका प्रमुख कार्यकारी निर्देशक अनन्तराज घिमिरेले सोमबार नै राजीनामा दिएका छन् । उनले दवाव धान्न नसकेको बताउँदै राजीनामा दिएका हुन् । ‘ठेक्कामा मिलेमतो जस्तो पनि देखियो, यसको भागिदार जीवनभर हुनु छैन भनेर मंगलबारबाट लागू हुनेगरी राजीनामा दिएको हुँ,’ कार्यकारी निर्देशक घिमिरेले भने ।’ उनले खरिद ऐन २०६३ को दफा २६ अनुसार ठेक्का प्रक्रिया रद्द गरेर राजीनामा दिएको दाबी गरे । राजीनामा पत्र लुम्बिनी प्रदेश सरकारलाई इमेल गरेर पठाइसकेको उनले जानकारी दिए ।

रसुवाका सांसद मोहन आचार्य र कांग्रेस निकट रमेश शर्माको निर्माण कम्पनीलाई मात्रै अनुकूल हुनेगरी मापदण्ड बनाएर अस्पताल निर्माणका लागि पाँच अर्ब रुपैयाँको ठेक्का दिन लागिएको थियो । गत फागुन ८ मा ठेक्काका लागि बोलपत्र आह्वान गरेको थियो ।

प्रतिस्पर्धाबिनै सांसद आचार्यको कम्पनीलाई ५ अर्बको ठेक्का

पूर्वाधार विकास प्राधिकरण दाङ प्रतिस्पर्धाबिना ठेकेदार सांसद आचार्यको रसुवा कन्स्ट्रक्सन र रमेशको शर्मा एन्ड कम्पनीलाई ठेक्का दिने तयारीमा थियो । खरिद ऐनमा नभएको मापदण्ड कायम गरी ठेक्का गरिएको भन्दै अन्य निर्माण व्यवसायीले विरोध गर्दै आएका थिए ।सार्वजनिक खरिद अनुगमन कार्यालयले प्राधिकरणलाई ध्यानाकर्षण पत्र पठाउँदै सो बोलपत्र उल्लिखित प्रावधानको प्रतिकूल देखिएको जनाएको थियो ।

प्रकाशित : चैत्र १४, २०७८ १८:२२
प्रतिक्रिया
पठाउनुहोस्

लामो दूरीका सवारी चले पनि यात्रु छैनन्

स्थानीय रूटमा चल्ने सवारीमा मनपरी भाडा
कोभिडको जोखिम कायमै तर छैन सावधानी
विमल खतिवडा

काठमाडौँ — करिब तीन महिनापछि लामा तथा मध्यम दूरीका सवारी शनिबारबाट सञ्चालनमा आएका छन् । कोभिडका कारण वैशाख १६ देखि गरिएको निषेधाज्ञासँगै ठप्प लामा तथा मध्यम दूरीका सवारीलाई साउन ४ मा बसेको मन्त्रिपरिषद् बैठकले सञ्चालन अनुमति दिएको थियो ।

काठमाडौंको नयाँ बसपार्कमा बस सफा गर्दै कर्मचारी । तस्बिर : कविन अधिकारी/कान्तिपुर

सोहीअनुसार जिल्ला प्रशासन कार्यालय काठमाडौंले शुक्रबार सार्वजनिक सूचना जारी गर्दै ठप्प सवारीलाई सञ्चालन गर्न भनेको थियो ।

त्रिभुवन विश्वविद्यालय, लोक सेवा आयोगलगायत निकायले परीक्षा तालिका सार्वजनिक गरेकाले देशका विभिन्न भागबाट आउने परीक्षार्थी तथा सर्वसाधारणको आवतजावतलाई सहज बनाउन स्वास्थ्य मापदण्ड अपनाउँदै सवारी चलाउन दिइएको जनाइएको छ । तर सवारी सञ्चालनमा आए पनि यात्रुको संख्या भने न्यून छ । पहिलो दिन यात्रुको चाप बढी हुने नयाँ बसपार्क, कोटेश्वर, गौशाला, चाबहिल, कलंकीलगायत स्थानका टिकट काउन्टर खुले पनि यात्रु त्यति छैनन् ।

उपत्यकाबाहिरबाट आउने यात्रुको चाप भने बढ्दो रहेको यातायात व्यवसायीले बताएका छन् । पहिलो दिन यात्रुको चाप कम रहेको नयाँ बसपार्क सञ्चालन गर्दै आएको ल्होत्से बहुउद्देश्यीय प्रालिका एचआर म्यानेजर पंकज मल्लले जानकारी दिए । बसपार्कबाट शनिबार साँझसम्म लामो दूरीका १ सय २० वटा बस छुटेको उनको भनाइ छ । ‘काठमाडौंबाट बाहिर जाने यात्रु एकदमै कम छन्,’ उनले भने, ‘उपत्यका भित्रिने यात्रु भने बढ्दो छन् ।’ यात्रुवाहक सवारी दिनदिनै सेनिटाइज गरेर मात्र चलाउने गरिएको छ । तर पनि सम्बन्धित निकायले स्वास्थ्य मापदण्ड पालना गरे/नगरेकोबारे जाँच गरे झन् राम्रो हुने उनको सुझाव छ ।

पहिलो दिन उपत्यकाबाट बाहिरिने सवारी र यात्रुको चाप कम रहेको महानगरीय ट्राफिक प्रहरी महाशाखाका प्रवक्ता एसपी सञ्जीव शर्मा दासले पनि बताए । ‘बस खालीखाली नै बाहिरिएका छन्,’ उनले भने । महाशाखाका अनुसार शनिबार साँझसम्म ३ हजार ५ सय ५१ सवारी भित्रिएका छन् । बाहिरिने सवारीको संख्या भने ३ हजार ५ सय ६९ छ । यसैगरी १६ हजार १ सय २८ यात्रु भित्रिएको र १३ हजार ८ सय ९४ ले उपत्यका छाडेको महाशाखाले जनाएको छ । यसअघि गत असार २१ देखि उपत्यकामा जोरबिजोर प्रणाली हटाएर सबै सवारी सञ्चालन खुला गरिएको थियो ।

काठमाडौंको नयाँ बसपार्कस्थित टिकट काउन्टर । तस्बिर : कविन अधिकारी/कान्तिपुर

पहिलो दिन भएकाले २० प्रतिशत मात्र लामा तथा मध्यम दूरीका सवारी सञ्चालनमा आएको नेपाल यातायात व्यवसायी राष्ट्रिय महासंघका महासचिव सरोज सिटौलाले बताए । ‘गाडी ग्यारेजमा थन्किएका छन्, चालकहरू आउने क्रम सुरु भएको छ,’ उनले भने । आफूहरूले स्वास्थ्य मापदण्ड अपनाएर गाडी चलाएको उनको भनाइ छ ।

यता उपत्यकाका काठमाडौं, भक्तपुर र ललितपुरमा सञ्चालन हुने सार्वजनिक सवारीमा भने स्वास्थ्य सावधानी नअपनाइएको गुनासो बढेको छ । यात्रुलाई मास्क अनिवार्य गरिए पनि गाडीमा सेनिटाइजर नराखिएको यात्रुहरूले बताएका छन् । सहचालकले पनि मास्क नै नलगाई यात्रु चढाउने गरेका छन् । उपत्यकाका भित्री रुटमा चल्ने सवारीमा यात्रु कोचाकोच राख्ने गरिएका गुनासा पनि छन् । विशेषगरी उपत्यकामा साँझपख गाडीमा यात्रुको भीड हुने गरेको छ । प्रहरीले भने बढी यात्रु बोक्ने सवारीलाई कारबाही गर्न सकेको छैन । उपत्यकाभित्र एउटै रुटमा चल्ने सवारीमा पनि यात्रुबाट फरकफरक भाडा उठाउने गरिएको पाइएको छ । सरकारले अन्तरप्रदेश भाडा समायोजन गरे पनि जिल्लाभित्र चल्ने सवारीको भाडाबारे भने कुनै निर्णय भएको छैन । यात्रुबाट दैनिक मनपरी भाडा असुलेको गुनासो आउने गरेको र त्यहीअनुसार असुल्ने सवारीलाई नियन्त्रणमा लिई कारबाही गरिरहेको महानगरीय ट्राफिक प्रहरी महाशाखाले जनाएको छ ।

नेपाल यातायात व्यवसायी राष्ट्रिय महासंघले भने भाडा समायोजनमा प्रदेश सरकारले ढिलाइ गरेको जनाएको छ । ‘संघीय सरकारले भाडा समायोजन गरिसकेको छ, प्रदेश सरकारले पनि गर्नुपर्छ,’ महासंघका महासचिव सिटौलाले भने, ‘सबै प्रदेशलाई भाडा समायोजन गर्न माग गर्दै ज्ञापन बुझाइसकेका छौं, निर्णयमा ढिलाइ नहोस् ।’ ट्याक्सीका हकमा भने स्थानीय सरकारले निर्णय गर्नुपर्ने उनको भनाइ छ ।

प्रकाशित : श्रावण १०, २०७८ ०७:२३
पूरा पढ्नुहोस्
प्रतिक्रिया
पठाउनुहोस्
x
×