हस्तान्तरण भयो पोखरा विमानस्थल- अर्थ / वाणिज्य - कान्तिपुर समाचार

हस्तान्तरण भयो पोखरा विमानस्थल

लालप्रसाद शर्मा

पोखरा — जग्गा अधिग्रहण गरेको ४६ वर्षपछि पोखरामा बल्ल क्षेत्रीय अन्तर्राष्ट्रिय विमानस्थल निर्माण भएको छ । चीन सरकारले प्रायः सबै मुख्य संरचना निर्माण सम्पन्न भएको विमानस्थल शनिबार नेपाललाई हस्तान्तरण गरेको हो ।

चीनका विदेशमन्त्री वाङ यीले काठमाडौंमा समकक्षी नारायण खड्कालाई विमानस्थलको चाबी हस्तान्तरण गरे । पोखरामा संस्कृति, पर्यटन तथा नागरिक उड्डयनमन्त्री प्रेम आलेले विमानस्थल निर्माण गरेको चिनियाँ कम्पनी सीएएमसीई र परामर्शदातालाई कदरपत्र प्रदान गरे ।

विमानस्थलको मुख्य संरचना निर्माणको काम सकिएको विमानस्थल आयोजना प्रमुख विनेश मुनकर्मीले जानकारी दिए । यसैगरी सम्पूर्ण उपकरण र औजारको जडानको काम पनि पूरा भएको छ । एयरसाइडतर्फ २५ सय मिटर रनवे, डोमेस्टिक र इन्टरनेसनल एप्रोन, ह्यांगर, आइसोलेटेड पार्किङ, ट्याक्सी वे, एयरफिल्ड ग्राउन्ड लाइटिङलगायत मुख्य काम सकिइसकेका छन् । बिल्डिङतर्फ टर्मिनल, एटीसी टावर, ह्यांगरलगायत १४ वटा भवन बनेका छन् । सबै संरचना बनेर अहिले फिनिसिङका क्रममा छन् । ‘समग्रमा ९३ प्रतिशत काम सकिएको छ,’ उनले भने, ‘निर्माणको काम सकिएकाले सञ्चालन प्रक्रियामा अघि बढेको छ ।’ राष्ट्रिय गौरबको विमानस्थल चीन सरकारको सहुलियतपूर्ण झन्डै २२ अर्ब ऋणमा निर्माण गरिएको हो । आयोजनाको वित्तीय प्रगति भने ७४ प्रतिशत छ । ऋण रकममध्ये ७५ प्रतिशत एक्जिम बैंकको २ प्रतिशत ब्याज र २५ प्रतिशत चीन सरकारको निर्ब्याजी ऋण हो ।

सन् २०२१ जुलाई १० भित्र सक्ने गरी २०७३ वैशाख १ मा विमानस्थलको शिलान्यास गरिएको थियो । तर कोरोनाका कारण आवश्यक उपकरणलगायत सामान आयात र कामदारको समेत अभाव भएपछि एक वर्ष म्याद थपिएको हो । आगामी जुलाई १० भित्र बाँकी काम पनि सकिने मुनकर्मीले बताए ।

विमानस्थलमा बाढीको व्यवस्थापन, रिट्ठेपानी डाँडा काट्ने र पोखरा महानगरको ल्यान्डफिल साइट सार्ने चुनौती छन् । रिट्ठेपानी डाँडा छिट्टै कटान सुरु हुने नागरिक उड्डयन प्राधिकरणका महानिर्देशक प्रदीप अधिकारीको भनाइ छ । चार महिनाभित्र ल्यान्डफिल्ड साइट नसारिए विमानस्थल सञ्चालनमा नआउने उनले स्पष्ट पारे । ‘डाँडा काटेपछि परीक्षण उडान हुनेछ,’ उनले भने, ‘तर ल्यान्डफिल्ड साइड नसारिए उडान अनिश्चित हुन्छ ।’ ल्यान्डफिल साइट हटाउन पोखरा महानगरले स्थान हेरिरहेको भए पनि अझै यकिन हुन सकेको छैन ।

सन् २०१४ को मे ३१ मा नागरिक उड्डयन प्राधिकरण र ठेकेदार कम्पनी चाइना सीएएमसी इन्जिनियरिङ कम्पनी लिमिटेडबीच विमानस्थल निर्माणको ठेक्का सम्झौता भएको थियो । २०१६ मार्च २१ मा नेपाल र चीनको एक्जिम बैंकबीच ऋण सम्झौता भयो । नेपाल सरकार र प्राधिकरणबीच २०१६ जुन ५ मा अनुदान ऋण सम्झौता भयो । एक्जिम बैंकले २०१७ मे ३१ बाट ऋण प्रवाह गर्‍यो । २०१७ जुलाई ११ बाट काम सुरु भयो ।

विमानस्थल सञ्चालनमा आएपछि पोखरामा पर्यटकीय गतिविधि थप बढ्ने भएकाले सोहीअनुसार तारे होटलदेखि अन्य पूर्वाधार निर्माण गर्न संस्कृति, पर्यटन तथा नागरिक उड्डयनमन्त्री आलेले निजी क्षेत्रसँग अनुरोध गरे । पोखरामा हुने उडानका लागि कञ्चनपुरबाट बाहिरिने भए पनि भित्रिने रुट अहिलेसम्म यकिन नभएकाले दुईतर्फी रुटका लागि भारतसँग अनुरोध गरिएको उनले बताए । निर्माण कम्पनी सीएएमसीईका अध्यक्ष ली हाई सिनले विमानस्थल निर्माणले ४० वर्षभन्दा बढी समयदेखिको सपना पूरा गर्ने धारणा राखे । यसबाट नेपाल मात्र नभएर दक्षिण एसियाको हवाई यातायातमा महत्त्वपूर्ण योगदान पुग्ने उनको भनाइ छ ।

प्रकाशित : चैत्र १३, २०७८ ०७:३०
प्रतिक्रिया
पठाउनुहोस्

लागूऔषधका लागि अदालत तोडफोड

लालप्रसाद शर्मा

पोखरा — लागूऔषध दुर्व्यसनलगायत मुद्दामा पक्राउ परी सजाय भोगेका व्यक्तिले कास्की जिल्ला अदालत तोडफोड गरेको पाइएको छ । पोखरा-१५ टुटुंगाका २७ वर्षीय अर्जुन परियार (दावा) लाई प्रहरीले बुधबार राति पक्राउ गरी बिहीबार सार्वजनिक गरेको छ । 

मंगलबार राति अदालतको एक र ६ नम्बर इजलास कक्षको ढोका र दराज फोरेर मिसिल र अन्य महत्त्वपूर्ण कागजात चलाएको अवस्थामा बुधबार बिहान भेटिएको थियो । प्रहरीका अनुसार अर्जुन मंगलबार राति ९ देखि १० बजेको बीचमा फिर्केखोलाबाट अदालतभित्र पसेका थिए । अदालतसँगैको फिर्केखोला त्यस्तो ठाउँ हो‚ जहाँ बरामद लागूऔषध जलाउने गरिन्छ ।

खोलाकिनारमा लागूऔषध जलाएको ठाउँमा अर्जुनले खोतलेको र फेनरागन र नुर्फिन गरी दुई एम्पुल लागूऔषध पनि भेटेको प्रहरीको दाबी छ । त्यसपछि उनी ‘सामान’ (लागूऔषध) भेटिने‚ नभए पैसा पाइने आशमा अदालतको नयाँ भवनको दोस्रो र तेस्रो तलामा रहेका इजलास कक्षका ढोका फोरेर पसेको कास्की प्रहरीका प्रवक्ता डीएसपी सुन्दर तिवारीले बताए ।

‘यसअघि विभिन्न ८ वटा मुद्दा बेहोरिसकेका अर्जुनले लागूऔषध नष्ट गर्ने स्थान देखेका रहेछन्‚’ उनले भने, ‘त्यसैले लागूऔषधकै खोजीमा अदालत छिरेको देखिन्छ ।’ पेसीमा जाने क्रममा लागूऔषध लगेर डिस्पोज गरेको देखेकाले अदालतभित्र लागूऔषध हुनेरहेछ भन्ने बुझेर खोजीमा आएको उनले बयानमा भनेका छन् । कुनै पनि कागजात भने नलगेको उनले बताएका छन् ।

अर्जुनविरुद्ध कास्की जिल्ला अदालतमा अनधिकृत प्रवेश तथा आपराधिक उपद्रवसम्बन्धी र नकबजनी चोरी उद्योगमा मुद्दा चलाइएको प्रहरीले जनाएको छ ।

कास्की जिल्ला अदालतका सूचना अधिकारी नीलप्रसाद पनेरुले अहिलेसम्म कुनै पनि मिसिल हराएको नभेटिएको बताए । ‘मिसिलभित्रका कुनै प्रमाणहरू चोरिएको आशंकामा प्रमाणित गर्ने काम भइरहेको छ‚’ उनले भने । अदालतको मुख्य प्रवेशद्वारमा चौबीसै घण्टा प्रहरीको सुरक्षा रहने र ठीक अगाडि वडा प्रहरी कार्यालय बैदाम भए पनि अर्जुन अदालतमा प्रवेश गर्न सफल भएका थिए ।

अर्जुनविरुद्ध २०७३ जेठ ६ मा अभद्र व्यवहार मुद्दा, भदौमा अभद्र व्यवहारमा अर्को मुद्दा परेको थियो । उनीविरुद्ध सोही वर्षको असोजमा चोरी मुद्दा, २०७४ कात्तिकमा लागूऔषधसम्बन्धी मुद्दा, माघमा जिल्ला प्रहरी रुपन्देहीमा अभद्र व्यवहारसम्बन्धी मुद्दा, २०७५ असारमा लागूऔषध, २०७६ मंसिरमा अभद्र व्यवहारसम्बन्धी मुद्दा चलेको थियो । यसका साथै २०७६ चैत ९ गते वडा प्रहरी कार्यालय बैदाममा लागूऔषध कसुरमा पक्राउपछि कारागार चलान भएका अर्जुन २०७८ फागुन २३ मा थुनामुक्त भएका थिए ।

प्रकाशित : चैत्र १०, २०७८ १५:४१
पूरा पढ्नुहोस्
प्रतिक्रिया
पठाउनुहोस्
×