क्रिप्टोकरेन्सीसँग सम्बन्धित एप, वेबसाइट बन्द गर्न निर्देशन

सोमबार (३० फागुन) मा सूचना जारी गर्दै प्राधिकरणले सबै इन्टरनेट सेवा प्रदायकलाई क्रिप्टोकरेन्सीसँग सम्बन्धित सबै भर्चुअल माध्यमहरू डिसेबल गर्न निर्देशन दिएको प्राधिकरणका प्रवक्ता सन्तोष पौडेलले बताए ।

‘त्यस्ता एपहरूलाई नेपालभित्र प्रयोग, सञ्चालन र व्यवस्थापन गर्न नपाउने गरी निषेध, डिसएबल तथा कालो सूचीमा राख्न निर्देशन दिइएको हो,’ उनले भने, ‘यस्ता एपहरू कतिवटा छन्, त्यसको विवरण हामीसँगै छैन ।’

नेपालमा गैरकानुनी र आर्थिक अपराधसँग सम्बन्धित मानिने क्रिप्टोकरेन्सी, बिटक्वाइन, हाइपर नेटवर्किङ, अनलाइन जुवाका सबै भर्चुअल माध्यमहरूलाई डिसएबल गर्न सूचना तथा प्रविधि मन्त्रालय र अर्थ मन्त्रालयले यसअघि प्राधिकरणलाई पत्राचार गरेको थियो । मन्त्रलायबाट पत्र आएपछि प्राधिकरणले आईएसपीहरूलाई निर्देशन दिएको छ ।

नेपालमा क्रिप्टोकरेन्सीसम्बन्धी गतिबिधि बढेको भन्दै केही समयअघि नेपाल राष्ट्र बैंकले पनि भर्चुअल मुद्राविरुद्धको कारबाहीलाई थप कडा बनाउने बताएको थियो ।