‘भिजिट भिसा’ पीडितलाई सम्बोधन गर्न ‘मार्सल टिम’ गठन- अर्थ / वाणिज्य - कान्तिपुर समाचार

‘भिजिट भिसा’ पीडितलाई सम्बोधन गर्न ‘मार्सल टिम’ गठन

दलालहरु पानी मुनि गए पनि अपराध छिप्दैन : श्रममन्त्री श्रेष्ठ
कान्तिपुर संवाददाता

काठमाडौँ — रोजगारीको आश्वासनमा‘भिजिट भिसा’मार्फत दुबईलगायत श्रम गन्तव्य मुलुकमा पुगेर पीडित भएकालाई सम्बोधन गर्न ‘मार्सल टिम’ गठन भएको छ ।

श्रम, रोजगार तथा सामाजिक सुरक्षामन्त्री कृष्णकुमार श्रेष्ठले पीडितको समस्याबमोजिम तत्कालै एक्सनमा जाने गरी मार्सल टिम बनाइएको जानकारी दिए । टिममा श्रम, रोजगार तथा सामाजिक सुरक्षा मन्त्रालयका उपसचिव विष्णु लामिछानेलगायत नेपाल प्रहरीका प्रतिनिधि छन् ।

‘मार्सल टिमले पीडितहरुको कुरा सुन्ने र दोषीलाई कारबाहीको दायरामा ल्याउनका लागि तत्काल एक्सन गर्छ, यो ठग र दलालहरुलाई तह लगाउन बनाइएको मार्सल टिम हो,’ मन्त्री श्रेष्ठले भने । दलालमार्फत रोजगारीको प्रलोभनमा परी भिजिट भिसामार्फत खाडी मुलुकमा पुर्‍याइएका नेपाली युवाहरुका समस्या सम्बोधन गर्न सरकारले गृह मन्त्रालयका सहसचिव फणिन्द्रमणि पोखरेलको संयोजकत्वमा मंगलबारमात्रै एक कार्यदल गठन गरेको थियो । बिहीबार श्रम मन्त्रालयमा मन्त्री श्रेष्ठसहित बसेको कार्यदल बैठकले मार्सल टिम गठनसहित विभिन्न निर्णय गरेको मन्त्री श्रेष्ठले जानकारी दिए ।

उनले नेपाली युवाहरुलाई दुःख दिने दलालहरुलाई सरकारले कारबाही गरेरै छाड्ने बताए । ‘दलालहरु पानीमुनि गए पनि अपराध छिप्दैन, मान्छे हो, गल्ती हुन्छ, तर यो त क्षमायोग्य गल्ती पनि होइन,’ मन्त्री श्रेष्ठले भने ।

उनका अनुसार मन्त्रालयले आगामी आइतबारदेखि २४ सैं घण्टा फोन उठ्ने गरी गुनासो सुनुवाइ कक्ष स्थापना गर्न लागेको बताए । सरकारले बनाएको कार्यदलमा पर्यटन, परराष्ट्र, श्रम, प्रहरी, अध्यागमन विभाग र वैदेशिक रोजगार बोर्डसमेत सदस्य छन् । सरकारले समितिलाई भिजिट भिसा उपलब्ध गराउन मापदण्ड बनाउने, त्रिभूवन अन्तर्राष्ट्रिय विमानस्थलमा आवागमन सहजीकरण, अध्यागमन प्रणाली सुधार, अन्तर्राष्ट्रिय आवागमन तालिका सुधार, ट्रान्जिट यात्रुहरुको व्यवस्थापन, श्रमिकहरु विदेशमा रहँदा भोगेका समस्या समाधान गर्ने लगायतका विषयमा सुझावसहितको प्रतिवेदन पेस गर्न १५ दिनको समय दिइएको छ ।

प्रकाशित : माघ १३, २०७८ १५:४४
प्रतिक्रिया
पठाउनुहोस्

वर्ल्डलिङ्कको इन्टरनेट रिफर गर्ने र पाउने दुबैलाई नेट टीभीसहित १ महिनाको इन्टरनेट प्याकेज निःशुल्क 

कान्तिपुर संवाददाता

काठमाडौँ — नेपालको सबैभन्दा ठूलो इन्टरनेट सेवाप्रदायक कम्पनी वर्ल्डलिङ्क कम्युनिकेसन्सले आकर्षक इन्टरनेट अफर सार्वजनिक गरेको छ । कम्पनीले रिफर गर्ने र पाउने दुवैलाई आईपीटीभी सहित निःशुल्क एक महिनाको इन्टरनेट प्याकेज दिने गरी यो अफर ल्याएको हो ।

बुधबारदेखि सुरु भएको यो अफरमा वर्ल्डलिङ्कका जुनसुकै विद्यमान ग्राहकले कम्पनीको इन्टरनेट जडान गर्नका लागि आफ्ना साथीभाई तथा आफन्तलाई रिफर गर्न सक्नेछन् । यसरी रिफर गरेपछि नयाँ ग्राहकले तीन महिना वा एक वर्षको इन्टरनेट प्याकेज लिनुपर्नेछ । त्यस लगत्तै दुवै ग्राहक (रिफर गर्ने र लिने) ले नेटटीभीसहित एक महिनाको इन्टरनेट निःशुल्क रुपमा पाउनेछन् । वर्ल्डलिङ्कले उपलब्ध गराइरहेका सबै इन्टरनेट प्याकेजमा यो अफर लागू हुने कम्पनीले जनाएको छ ।

कम्पनीले हाल १५० एमबीपीएस, २२५ एमबीपीएस, ३०० एमबीपीएस र ६०० एमबीपीएस गतिका इन्टरनेट प्याकेज उपलब्ध गराउँदै आएको छ । कम्पनीका अनुसार ग्राहकले जतिसुकै व्यक्तिलाई इन्टरनेट रिफर गर्न सक्नेछन् ।

यसरी तीन जनालाई इन्टरनेट रिफर गर्दा रिफर गर्ने व्यक्तिले तीन महिनाको इन्टरनेटसँगै फाइभजी सहितको डुअल ब्यान्डमा निःशुल्क रुपमा अपग्रेड हुन पाउनेछन् । त्यस्तै पाँच जनालाई रिफर गर्दा पाँच महिनाको इन्टरनेटसँगै कम्पनीको मेश वाईफाई बिकन १.१ समेत निःशुल्क रुपमा उपलब्ध गराइने कम्पनीले जनाएको छ ।

कम्पनीले यस पटकको रिफर अफर पहिलेको भन्दा अझ आकर्षक रुपमा तयार पारेको छ । यस पटकको अफरमा थप झन्झटिला र द्विविधा हुने कुनै पनि अतिरिक्त शर्तहरू राखिएका छैनन् । वर्ल्डलिङ्कका ग्राहकले यो अफरमा सहभागी हुन कम्पनीको वेबसाइट अथवा माई वर्ल्डलिङ्क एपमा रहेको ‘रिफर’ अप्सनमा जानुपर्ने हुन्छ । त्यसबाहेक कम्पनीको ग्राहक सेवा केन्द्रमा फोन गरेर तथा नजिकैको वर्ल्डलिङ्कको कार्यालय एवम् प्रतिनिधिकहाँ सम्पर्क गरेर पनि इन्टरनेट प्याकेज रिफर गर्न सकिनेछ ।

प्रकाशित : माघ १३, २०७८ १५:४३
पूरा पढ्नुहोस्
प्रतिक्रिया
पठाउनुहोस्
×